Ads by Google Ads by Google

Aloaia tautua ni isi o tagata faigaluega i le atunu’u

Susuga James Taylor (pito i luma), o se tagata faigaluega pito i tele tausaga o lana tautua i le atunu’u ma le malo, lea ua atoa i le tausaga lenei le 60 tausaga o lana tautua. O lo o galue o ia i le Ofisa o Feso’otaiga a Amerika Samoa (ASTCA).  [ata AF]Le tofa a Leoo Va’a Ma’o (ogatotonu), lea na aloaia i le vaiaso na te’a nei tausaga e 50 o lana tautua i le malo ma le atunu’u.  [ata AF]
ausage@samoanews.com

O se tasi o vaega o le polokalame a le malo e fa’atauaina ai tagata faigaluega i totonu o Amerika Samoa, lea sa fa’ataunu’uina i le aso Faraile na te’a nei i le malae ta’aalo o le Veterans Memorial Stadium i Tafuna, o le aloaia lea o le tautua a i latou ua lagomau mai Tia Sa sa tautua i vaega eseese o le malo, aemaise ai o le tautua a ni isi ua silia i le ta’i 50 tausaga o tautua pea ma galulue mo le malo ma le atunu’u.

 

O le mae’a ai o saunoaga fa’apitoa o le polokalame a le malo i le vaiaso na te’a nei, na talosagaina ai loa e le afioga i le Fa’atonusili o le Matagaluega o Tagata Faigaluega a le malo sa fai ma fofoga o le polokalame, le tofa Le’i Sonny Thompson le aofia ina ia tutula’i mo ni nai sekone, e fa’ailoa ai lo latou fa’aaloalogia o soifua o i latou sa tautua i le malo ua lagomau mai Tia Sa.

 

E to’a 39 i latou sa tolaulauina e le tofa a Le’i o latou suafa, atoa ai ma igoa o Ofisa eseese o le malo ma kamupani tua sa galulue ai mo le tele o tausaga.

 

O ni isi o i latou sa aofia ai i lea lisi o le afioga i le ali’i Senatoa ia Saole Mila, lea sa galue muamua o se Fa’amasino Lagolago mo le Fa’amasinoga Maualuga a Amerika Samoa, a o lei tofia e avea ma Senatoa mo le itumalo o Saole, o le tofa a Paopaoailua Joe Fiaui, lea fo’i sa avea ma faipule mo le itumalo o le Maoputasi #5 e aofia ai le afioaga i Aua, ao lei tofia e le afioga i le ali’i kovana ia Lolo Matalasi Moliga e avea ma sui so’oupu o le Ofisa o le Kovana ma le Fono Faitulafono, mo le fa’afaigofie lea ona silafia e le faigamalo o mataupu o lo o atugalu i ai le Fono Faitulafono.

 

O le mae’a ai ona tolaulauina o suafa o i latou sa galulue mo le malo ma pisinisi tua ua fai i luga le tuligasi’a, sa fa’apea ai fo’i ona tolaulauina suafa o i latou e to’a 9 ua silia i le 50 tausaga le umi o le latou tautua i le malo ma le atunu’u.

 

O i latou nei e aofia ai le susuga ia James Taylor mai le Ofisa o Feso’otaiga a Amerika Samoa (ASTCA), lea ua atoa i le tausaga lenei le 60 tausaga o lana tautua, sosoo ai le tama’ita’i tausima’i ia Tinousi Jennings mai le Matagaluega o le Soifua Maloloina, lea ua atoa le 54 tausaga o lana tautua, o afioga i ali’i Senatoa ia Galea’i M. Tu’ufuli, Gaea Perefoti Failautusi ma Soliai Tuipine Fuimaono, lea ua atoa le ta’i 51 tausaga o le latou tautua, ma le tofa ia Leoo Va’a Ma’o, o le Failautusi o le Senate i le Fono Faitulafono, ma Margaret Willis o le ASTCA ua atoa le ta’i 50 tausaga o le la tautua.

 

E tusa ai o le saunoaga a le tofa a Le’i, o le vaiaso nei lea ua fa’amoemoe e tauaaoina ai e i latou nei ni meaalofa mai le faigamalo, e aloaia ma fa’afetaia ai la latou tautua i le malo ma le atunu’u mo le tele o tausaga.

 

Na taua e le tofa a Leoo lona agaga fiafia ina ua mafai ona aulia nei tausaga e tele o lana tautua i le malo ma le atunu’u, ae o loo maua pea lona malosi e fa’aauau ai lana tautua.

 

I le tele ai o tausaga o galue mo le Ofisa Fa’asalalau a le malo, le KVZK-TV, aemaise ai o le Fono Faitulafono i le Senate, na ia taua ai lona naunau pea e fa’aauau lana tautua mo le atunu’u mo ni isi tausaga o lo o totoe o lona malosi.

 

Ae na taua e le susuga a Taylor i le Samoa News e fa’apea, e leai se isi itu e pito sili ona lagona ai lona fiafia i aso uma, nai lo le alafa’i mai i aso ta’itasi o loo maua le malosi e fa’aauau ai lana tautua mo Amerika Samoa.

 

Na taua e le susuga a Taylor e fa’apea, o le tele o tausaga o lana tautua mo Amerika Samoa, o le fa’aopoopo fo’i lena o lona malosi e tautua ai mo lona aiga, le atunu’u ma le malo.

 

Ina ua fesiligia e le Samoa News le susuga a Taylor pe ua i ai sona lagona e malolo mai lana galuega, sa ia soisoi ma saunoa e fa’apea, “Afai lava e aumai e le Atua le malosi ia te a’u, ou te fa’aauau pea ona ou tautua mo le malo ma le atunu’u, aemaise ai lo’u aiga, o lo’u itumalo ma la’u Ekalesia”.

 

E lanu fefiloi finagalo fa’aalia o ni isi o tagata faigaluega sa mafai ona fesiligia e le Samoa News, e tusa ai o ni o latou lagona e fa’atatau i le fa’atauaina e le malo o la latou tautua i totonu o galuega o lo o galulue ai.

 

Na taua e le susuga ia Ali’iva’a Ponifasio Taula, o se Tama ua 34 tausaga o lana tautua i totonu o kamupani tua, o se lagona fiafia fuafuaga a le malo sa fa’agasolo mai i lenei 4 tausaga ua savalia, o le taumafai lea ina ia tu’u fa’atasi tagata faigaluega a le malo ma kamupani tua, ma latou fa’amanatu fa’atasi le taua o lo latou sao i galuega fa’atino i aso ta’itasi.

 

“O le lona 40 lenei o tausaga talu ona ou aumau i Amerika Samoa, ae o le 34 lenei o tausaga talu ona ou galue i kamupani tua, e aofia ai ma le kamupani faufale lea o loo o’u galue ai nei mo le 15 tausaga, ma ou te talitonu, o avanoa fa’apenei e tatau ona fa’aauau pea e soo se faigamalo e tula’i mai i le lumana’i, ina ia fa’aauau ai pea le mafuta fa’atasi o tagata faigaluega a le malo ma kamupani tua, ma aloaia ai le tautua matavela o lo o fa’atinoina e tagata faigaluega i totonu o le atunu’u i aso ta’itasi”, o le saunoaga lea a le tofa a Ali’iva’a.

 

E ese mai i tagata ua silia i le ta’i 20 ma ona tupu tausaga o le latou tautua, o ni isi o tagata sa vaaia le agaga fiafia i lenei fa’amoemoe, o tagata faigaluega fa’atoa amata la latou auaunaga fa’a tagata faigaluega i totonu o le atunu’u, e pei ona i ai le susuga ia Vallen Lima, o se ali’i e 26 tausaga le matua ua savali i le 2 tausaga talu ona galue i le Ofisa o Galuega Lautele a le malo.

 

Na taua e le susuga a Vallen le fa’ateia o ia ina ua tolaulauina suafa o i latou ua silia i le ta’i 50 tausaga o le latou tautua, ma ua avea ai o se lu’i tele mo ia lea tulaga, i le tatau lea ona ia ausia nei tausaga e tele o le olaga galue.

 

“Afai ua mafai e nei Tama ma Tina o le atunu’u ona ausia nei tausaga e tele o galulue pea mo Amerika Samoa, aisea ou te le mafaia ai, o se lu’i taua mo a’u le tatau ona tautua fa’amaoni ma tautua filiga”, o le saunoaga lea a Vallen.