Ads by Google Ads by Google

Aloaia soifua galue o le ali’i fitafita na malemo i Alega


O se sauniga faapitoa lea sa faia i le nofoaga autu a le Army Reserve i Tafuna i le aoauli o le aso Faraile na te’a nei, na aloaia ai le soifua galue o le ali’i fitafita ia Sgt. First Class Albert H. Chung. Na auai i lenei sauniga e Le Lutena Kovana ia Lemanu Peleti Mauga, sui o le US Army mai fafo, atoa ai ma ni isi o le atunu’u na mafai ona auai i lenei sauniga lotu taua.
ausage@samoanews.com

O se sauniga faapitoa lea sa faia i le nofoaga autu a le Army Reserve i Tafuna i le aoauli o le aso Faraile na te’a nei, na aloaia ai le soifua galue o le ali’i fitafita ia Sgt. First Class Albert H. Chung, a o lumana’i ai le momoliina atu o lona tino maliu i Kalefonia i le po lava lea.

 

Na auai i lenei sauniga sui o le US Army mai fafo, faapea ai ma i latou o lo o galulue i le Army Reserve Center i Tafuna. Sa i ai fo’i sui o le vaega a le 79R Career Recruiter, o i latou ia sa malaga fa’atasi mai ma le ali’i fitafita ua maliu mo le fa’atinoina o le latou galuega i Amerika Samoa nei.

 

O le afioga i le Lutena Kovana ia Lemanu Peleti Mauga, o se tasi o fitafita tuai sa tautua i vaega ‘au a le malo tele ua malolo litaea, fa’apea ai ma le afioga i le Faatonu ia Tauapa’i Laupola, atoa ai ma ni isi o le atunu’u na mafai ona auai i le molimauina o lenei sauniga lotu taua.

 

Sa auai fo’i le susuga a Candyman ma lona faletua ia Tisa Faamuli, o i laua ia e pulea le pisinisi a le Tisa’s Barefoot Bar. O le susuga a Candyman, o ia lea sa lavea’iina soifua o ali’i fitafita sa malelemo fa’atasi ma SFC Chung i le taimi o le fa’alavelave, atoa ai ma lona sailia o le tino o le ali’i fitafita i le taimi na malemo ai o ia.

 

E pei o tulaga masani i sauniga lotu faapenei mo fitafita ua maliliu, e le gata e aloaia la latou tautua, ae maua fo’i avanoa o isi ona uso ma tuafafine fitafita e molimau ai i le latou mafutaga.

 

E le gata sa lagiina le vi’i o le tagavai a Amerika, ae sa fa’apapaina fo’i fana e sui o le Army Reserve atoa ai ma le iliina o le pu, o tu ia ma aga e fa’ailoa ai le aloaia o le tautua o le soifua tautua o se fitafita ua maliu.

 

O le susuga a Rev. Fouvale Asiata, o se tasi ua malolo ritaea mai i vaega ‘au a le malo tele, a o lea ua avea nei ma Faifeau a le Ekalesia EFKAS i Matu’u & Faganeanea, na saunia le tatalo e amata aloaia ai le sauniga lotu mo le ali’i fitafita.

 

O SFC Chung, e 33 tausaga o lona soifua, na soifua mai i lona aiga i Ohio i le aso 9 Mati 1986. Na fa’atauto o ia e avea ma fitafita i le Ami i le aso 23 o Novema 2003, ina ua atoa le 17 o ona tausaga.

 

E tele agava’a ma aoaoga na ausia e ia a o tautua ai i vaega ‘au a le malo tele. I totonu o tausaga a o tautua i vaega ‘au, e fa’alua ona tofia o ia e tau i le taua i Iraq. O le aso 28 Setema 2005 e oo atu i le aso 15 Setema 2006, o le ulua’i taimi lea na tofia ai o ia e auai i le taua i Iraq, ma le va o le aso 12 Oketopa 2007 e oo atu i le aso 14 Novema 2008 na tofia lona lua ai o ia e tautua i le taua.

 

O molimau e fa’atatau i le soifua tautua a lenei ali’i fitafita, na molimauina ai, o ia o se tagata e pele ia te ia lana galuega.

 

Na taua e le ali’i fitafita ia Commander Miguel Diaz mai Guam e fa’apea, o SFC Chung, o se ali’i fitafita ua tele tausaga o la galulue fa’atasi i le US Army, o se tagata e ese le naunau e fa’ailoa atu i isi fo’i Ta’ita’i galuega o lo o ia galue e fa’atino.

 

“O se ali’i fitafita e loto alofa, aga malie, ae sili ai lona naunau e fa’ataua le galuega ua tofia o ia e galue ai. E naunau e fa’ailoa atu i isi tupulaga le taua o le avea ma fitafita, e mimita fo’i e fa’ailoa lona tulaga, o ia o se tagata e tupuga mai i matua mai Kolea o lo o tautua i totonu o le Ami a le malo tele o Amerika,” o le molimau lea a le ali’i fitafita ia Diaz e fa’atatau i lana uo o SFC Chung.

 

Na tauae le ali’i fitafita o Curtis Hulzhizer le tu’u fesili pea o lona mafaufau i le mafu’aaga o le fa’alavelave ua mafua ai ona maliu SFC Chung.

 

Sa ia fa’amatala se fa’alavelave e tutusa lelei ma le fa’alavelave lea ua maliu ai SFC Chung na a’afia ai lona Tama ao tautua i vaega ‘au a le malo tele, ae na mafai ona fa’asaoina lona ola.

 

“Afai na mafai ona fa’asaoina le ola o lo’u Tama, aisea ua le mafai ai ona fa’asaoina mai le ola o SFC Chung,” o le fesili lea a Hulzhizer ma ona loimata i le taimi o lana molimau.

 

“E le mafai e se isi ona tali lena fesili, ae avea upu mai le Tusi Paia tatou te maua ai le loto mafanafana ao tatou taumafai e fa’agalogalo le motusia o le mafutaga ma SFC Chung. Ou te tatalo fo’i ina ia avea le olaga o lenei ali’i fitafita ma mea uma sa ia faia, o se lesona taua mo i tatou, ina ia fai ma fa’ata’ita’iga mo tatou uma,” o le molimau lea a Hulzhizer.

 

Na taua e ni isi o fitafita sa auai i le sauniga faapitoa lo latou misia o le ali’i fitafita ua maliu, ona o lona naunau ina ia to’atele tupulaga e lesitala ma fa’atauto i le Ami.

 

Na taua e se tasi o ali’i fitafita e faapea, o le aso lea na latou taunu’u mai ai i le atunu’u, sa latou pisi uma ai i le tau fa’atumuina o pepa o i latou ua lesitala, aemaise ai pepa e manaomia mo i latou ua sauni e fa’atauto, ae fa’afuase’i ai le vaaia o SFC Chung ua alu i le fale’aiga e fa’atau mai sana meaai ina ua fia tausami o ia, peita’i o le itu na faateia ai i latou uma, ina ua toe fo’i atu o ia ma le fa’atauga tele lava, e tofu lava le tagata ma le burger mai le fale’aiga o le Carl’s JR.

 

“O ona uiga masani ia e fa’agalo gata ai o ia i le mafutaga,” o le molimau lea a le isi fitafita.

 

O SFC, o se tasi lea o sui o le Vaega faapitoa sa malaga mai mo le fa’amautuina o tupulaga Amerika Samoa ua filifili e fia ulufale atu i le Ami. O le latou taelega i le ‘ava i Alega i le aso Sa, Aokuso 6, na tula’i mai ai le fa’alavelave ua mafua ai ona maliu o ia, ina ua tafefea ma ni isi o ali’i fitafita sa latou taeele ma malemo ai, ae fa’asaoina mai soifua o isi ona uso a fitafita sa latou malaga fa’atasi.