Ads by Google Ads by Google

Aloaia le tautua a Fitafita o le taua ma o latou aiga


Le afioga i le Lutena Kovana lea ua sauni e saunoa i le aso faapitoa mo Fitafita i le taeao nei. [ata AF]
ausage@samoanews.com

O se tasi o vaega o le polokalame a le malo mo le fa’atauaina o le tautua a Fitafita o le taua mo lenei tausaga, o le aofia atu ai lea ma le fa’atauaina o latou aiga, e pei ona fa’amaonia mai e le Taitai o le Ofisa o Fitafita Tuai a le malo, susuga Rosie Fualaau Tago Lancaster.

 

O le itula e 9:00 i le taeao nei i le nofoaga autu o Fitafita tuai i le Tafuna Industrial Park, ua fa’amoemoe e fa’ataunu’u aloaia ai le sauniga e fa’amanatu ai soifua o Fitafita o le taua, e pei fo’i ona fa’amanatuina i totonu o le malo tele o Amerika ia Novema 11 o tausaga ta’itasi.

 

Saunoa Lancaster e fa’apea, e ui o lo o aloaia pea aiga o fitafita o le taua i tausaga ta’itasi, peita’i o se fuafuaga mo le polokalame mo lenei tausaga, o le avea lea o le sauniga e fa’amanatu ai le tautua sa ofoina atu e fitafita o le taua ua maliliu, o se sauniga fa’aleaiga, ina ia mafai ai ona aloaia le sao ma le tautua a aiga.

 

O le polokalame masani lava e pei ona fa’atinoina i tausaga uma, lea fo’i ua fa’amoemoe e fa’agasolo i le taeao nei.

 

O le afioga i le Lutena Kovana ia Lemanu P. Mauga lea ua fa’amoemoe e saunoa i le saunoaga autu o le aso, e fai ai ma sui o le afioga i le Kovana ia Lolo M. Moliga ma le malo o Amerika Samoa, e le o auai ona o lo o toesea i fonotaga i le laumua i Uosigitone.