Ads by Google Ads by Google

Aloaia le faia Tuuga Fautasi mo le fu’a o lenei tausaga


[ata: SN]
ausage@samoanews.com

Ua aloaia nei le fa’aiuga a le Komiti o le Fu’a o lenei tausaga, o le a fa’ataunu’uina o le Tuuga Fautasi i le fa’amanatuina o le 118 tausaga o le fu’a a le atunu’u i le aso 17 Aperila, 2018.

 

E ui i le tau nenefu laititi o le tulaga na taoto ai lenei mataupu i finagalo o ni isi o Kapeteni o Fautasi i le atunu’u, ae o le fonotaga sa faia i le vaiaso nei i le va o le Komiti o le Fu’a ma ali’i vaa i le potu fono a le Ofisa o Mataupu Tau Samoa, na aloaia ai loa le fa’aiuga i le fa’ataunu’uina lea o le tuuga fautasi mo lenei tausaga.

 

E ui fo’i sa i ai ni isi o afioaga sa fa’aalia e o latou sui sa auai i le ulua’i fonotaga, le le mautonu lea pe tausinio a latou Sa i lenei tausaga, peita’i o le fonotaga i le vaiaso nei na manino ai loa, o le a tausinio uma Sa i totonu o le atunu’u i le tuuga o lenei tausaga, se’i vagana ai Sa e lua mai le afioaga o Nuuuli, le Manulele Tausala 1 & 2, e le o mautu mai pea se faaiuga i le taimi nei e pei ona saunoa le afioga i le Maopu ia Soliai T. Fuimaono.

 

Ae mo isi afioaga uma e aofia ai ma le afioaga i Fagasa, ua mae’a ona fono afioaga ma ua tasi le faafitiga o aleaga, o le a tausinio uma a latou Sa i le tuugao lenei tausaga.

 

O le mafua’aga e pei ona faia ai le fautuaga ina ia taofi tuuga fautasi mo le fu’a o lenei tausaga, o le agaga lea o le Komiti o le Fu’a e galulue fa’atasi ma le malo e ala i le taumafai e fa’asao tupe a le malo, ae ave le fa’amuamua e fesoasoani ai i aiga na pagatia i le ‘afa o Gita e pei ona aafia ai le atunuu i le masina na te’a nei.

 

O le afioga i le Maoputasi ia Mauga Tasi Asuega, o ia lea o le isi taitai o le Komiti o le Fu’a na taitaia uma fonotaga e lua sa faia ma ali’i vaa.

 

I le ulua’i fonotaga i le vaiaso na te’a nei, na saunoa ai Mauga e fa’apea, e le o se tulaga lelei le pagatia o aiga o le atunuu ona o le afatia o maota ma laoa, ae silasila mai o loo taumafai pea Ta’ita’i o le atunuu e fa’aalu tupe i isi fuafuaga ae fa’atuatuana’i le ofo muamua atu o le fesoasoani mo i latou.

 

I le talitonuga o le afioga i le Maoputasi, e tatau ona ave le fa’amuamua a le malo i le fesoasoani lea i tagata pagatia, e aofia ai ma le fa’asao o tupe mai le soona fa’aalu, ina ia silasila mai fo’i le malo Feterale ma latou molimauina ai, o loo naunau le malo e ave le fa’amuamua i ona tagatanu’u.

 

Saunoa atili Mauga i le ulua’i fonotaga e fa’apea, ua mae’a fo’i ona faia le faaiuga a le Komiti ina ia taofia le taamilosaga o Kirikiti Faasamoa.

 

I le tulaga o fa’afiafiaga o le fu’a e aofia ai pese ma siva faaleaganu’u, o loo fa’aauau pea tulaga ia i le polokalame o le fu’a o lenei tausaga.

 

E 4 au fa’afiafia ua lautogia e fa’afiafia i le fu’a o lenei tausaga, e 3 mai Amerika Samoa nei ma le valaaulia e tasi mai Samoa. O valaaulia mai Amerika Samoa nei e aofia ai aoga e 3 e pei o Fagaitua, Faasao Malisi, ma le Kolisi Tuufaatasi.

 

I se tusi sa tuuina atu e le Taitai o le ofisa a le Kovana i Faatonusili ma Faauluuluga uma o Ofisa ma Matagaluega a le malo, o loo taua ai le fautuaina lea e le alii kovana ia Lolo Matalasi Moliga o le tatau lea ona auai uma tagata faigaluega a le malo i le solo o le savali o le fu’a o lenei tausaga.

 

O le agaga o le ali’i kovana e pei ona taua e Fiu Saelua i lana tusi, ia iloa ai le lagolagoina o fuafuaga a le malo.