Aloaia fa’aiuga Palota ina ua leai ni tagi na fa’aulu Fa’amasinoga
O le itula e 4:30 i le afiafi o le aso Lua, Novema 16, 2016 na tu’u aloaia mai ai e le Komesina o le Ofisa o Palota le fa’aiuga aloaia mo le faiga palota a Amerika Samoa mo lenei tausaga 2016, e aloaia ai sui ua manumalo i le sailiga tofi a le atunu’u mo le tofi Kovana ma le Lutena Kovana, Faipule i le Konekeresi, atoa ai ma tofi Faipule mo le Fono Faitulafono, ina ua leai se sui na faila sana tagi fa’asaga i le palota ua mae’a atu.
E pei ona taua e le afioga i le Komesina o Palota ia Uiagalelei Dr. Sialofi Uiagalelei i se pepa o fa’amatalaga e fa’apea, ina ia tusa ai ma le tulafono, ua aloaia nei le fa’aiuga o le faiga palota ia Novema 8 ina ua tapunia aloaia le taimi e tatau ai ona faila se tagi fa’asaga i mataupu o le palota, ma atagia mai ai le leai o se sui tauva na faila sana tagi.
Mo le tofi Kovana ma le Lutena Kovana, ua aloaia nei le toe filifilia o le tofa i le tootoo ia Lolo Matalasi Moliga ma le afioga a Lemanu Peleti Sialega Mauga e avea ma ta’ita’i o le malo mo le isi 4 tausaga o lo o lumana’i nei, ina ua la ausia palota e 7,236, tusa lea o le 60.2% o palota uma sa mafai ona faitauina.
O le paga a Faoa ma Sanitoa na la mauaina palota e 4,306, tusa lea o le 35.8% o palota a faitauina, ma le paga a Tuika ma Salanoa e 484 le aofa’i o palota na la mauaina, tusa lea o le 4.0% o palota sa faitauina.
I le tausinioga mo le nofoa i le Konekeresi a Amerika, ua toe filifilia mai ai le afioga i le tama’ita’i faipule ia Aumua Amata, na te toe tauaveina le nofoa a le atunu’u mo le isi 2 tausaga ma lana nofoaiga lona lua.
Mai sui e to’alima sa latou tausinio mo le nofoa i le Konekeresi, e 8,924 le aofa’i o palota na mafai ona maua e Aumua, tusa lea o le 75.4% o palota sa faitauina.
O le lona lua o Vaitinasa Dr. Salu Finau i le aofa’i o ana palota na maua e 1,581, tusa lea o le 13.4% o palota sa faitauina; sosoo ai ma Paepaetele M. Jamais e 978 ana palota na maua, tusa lea o le 8.3%; o Meleage S. Chapman i le tulaga fa i le aofa’i o ana palota na maua e 181, tusa lea o le 1.5% o palota sa faitauina, ma Tim Jones i le tulaga lima i le aofa’i o ana palota na maua e 171, tusa lea o le 1.4% o palota sa faitauina.
Mo le maota o sui a Amerika Samoa, ua tula’i mai ai sui fou e 6 ua manumalo mai i nofoa a latou itumalo, e fa’aopoopo i sui tuai e to’a 15 ua mafai ona latou toe manumalo mai i nofoa a o latou itumalo.
O sui faipule fou mo le nofoaiga lona 35 a le Fono Faitulafono e aofia ai Kitara Vaiau mo le Itumalo #4 o Saole, na ia maua palota e 169, ma ua sui tulaga i le afioga a Talaimatai E. Su’a e na o le 117 ana palota na maua; mo le Itumalo 8 o le Maoputasi #2, ua manumalo mai ai Vailiuama S. Leasiolagi i palota e 224 na ia maua, ma ua sui tulaga i le afioga a Maugaoali’i S. Anoa’i e 223 ana palota na maua.
O le Itumalo #12 i le Ituau lea e to’alua ona sui faipule, o lo o tumau pea le afioga ia Manumaua W. Wilson, fa’atasi ai ma sui fou ia Sataua Dr. Mataese Samuelu lea ua sui tulaga ia Vaiaitu Mulinu’u Filo T. Maluia, ina ua ia maua palot e 766 ia Maluia e 672.
Mo le itumalo #13 i Fofo, ua manumalo mai ai le isi faipule fou ia Fagaoatua D. Salave’a i palota e 348, ma ua sui tulaga ai i le afioga ia Puletuimalo D. Koko e 284 ana palota sa maua.
Mo le itumalo #15 o Tualauta, o lo o tumau pea le afioga ia Vui Florence Saulo mo le isi nofoa o le itumalo, ae o le isi nofoa lea sa tauaveina e le afioga i le alii faipule ia Larry Sanitoa, lea e lei toe tauva ina ua fa’alauiloa le la paga ma Faoa A. Sunia i le tofi kovana ma le lutena kovana, lea ua manumalo mai ai le susuga ia Samuel Ioka Ale Meleisea i palota e 978 sa ia maua, ae 760 palota sa maua e Vui.
Ma le itumalo #17 o Leasina, ua manumalo mai ai le isi sui fou, o se tasi ua tele tausaga o tautua i le maota o sui, le afioga a Gafatasi Afalava, i palota e 272 sa ia maua, ma ua sui tulaga ai i le tamaitai faipule ia Atalina Asifoa sa ia nofoia le nofoa i ana palota na maua e 132.
O le lisi la lenei o faipule o le a avea ma sui o le maota o sui i le nofoaiga lona 35 o le a sosoo nei:
Itumalo #1 - Manu’a #1: Fetu Fetui Jr 500 ma Vesi Talalelei Fautanu Jr 374
Itumalo #2 - Manu’a #2: Toeaina Faufanu Autele 153
Itumalo #3 - Vaifanua: Lavea Fatulegae’e Palepoi Mauga 408
Itumalo #4 - Saole: Kitara Vaiau 169
Itumalo #5 - Sua #1: Puleleiite Li’a Tufele Jr 161
Itumalo #6 - Sua #2: Matagi David Sialega Mauga 170
Itumalo #7 - Maoputasi #1: Vailoata Eteuati Amituana’i 332
Itumalo #8 - Maoputasi #2: Vailiuama Steve Leasiolagi 224
Itumalo #9 - Maoputasi #3: Ve’evalu Meauta L. Mageo 287
Itumalo #10 - Maoputasi #4: Vaetasi Tuumolimoli S. Moliga 148
Itumalo #11 - Maoputasi #5: Faimealelei A. F. Allen 220
Itumalo #12 - Ituau: Manumaua Wayne Wilson 1,037 ma Sataua Dr. Mataese Samuelu 766
Itumalo #13 - Fofo: Fagaotaua Dorian T. Salave’a 348
Itumalo #14 - Alataua: Savali Talavou Ale 408
Itumalo #15 - Tualauta: Samuelu Ioka Ale Meleisea 978 ma Vui Florence Saulo 760
Itumalo #16 - Tualatai: Timusa Tini Lam Yuen 278
Itumalo #17 - Leasina: Gafatasi Afalava 272
Motu o Swains - Su’a Alexander Eli Jennings.