O se tasi o vaega o le sauniga na fa’auuina ai ali’i ma tama’ita’i Leoleo ua aloaia lo latou tauaveina o a’upega i le taimi e fa’atino ai a latou tiute, lea na fa’ataunu’uina i le nofoaga autu a Fitafita Tuai i Tafuna i le vaiaso na te’a nei, o le aloaiaina lea o le tautua a le susuga a Ernie Haleck, lea sa gafa ma le aoaoga e tapena ai Leoleo mo le tauaveina o a’upega.

O le Komesina o le Matagaluega o Leoleo, tofa Le’i Sonny Thompson na ia tauaaoina atu se fa’ailoga taualoa i le susuga a Haleck, e fa’afetaia ma aloaia ai lana auaunaga mo le Matagaluega o Leoleo, e ala i le fa’ataunu’uina o aoaoga e tapena ai ali’i ma tama’ita’i Leoleo mo le tauaveina o a’upega i taimi e fa’atino ai a latou galuega.

Na taua e Le’i le fa’agae’etia o le Matagaluega atoa e tusa ai o le fesoasoani ua mafai ona tuuina ai e Haleck e a’oa’oina ai Leoleo i le isi la’asaga fou o le olaga tautua.

Saunoa Le’i e fa’apea, o le avanoa ua mafai ona a’oa’oina ai ali’i ma tama’ita’i Leoleo i isi aoaoga fou e fesoasoani ai i le fa’atinoina o le latou galuega, ua atagia mai ai le si’itia o le tomai o i latou e tautua ai i le puipuiina o le saogalemu o le atunu’u.

“O se auaunaga e le mafai ona fa’agaloina. E anoanoa’i le mau fa’amatalaga fou ua mafai ona matou aoaoina mai le susuga a Haleck. O nei fa’amatalaga eseese uma o le a fesoasoani lea i le fa’atinoina o le tautua a ali’i ma tama’ita’i Leoleo, ma si’itia ai lo latou iloa i auala e fa’aleleia atili ai la latou auaunaga mo le atunu’u,” o le saunoaga lea a Le’i.

Na fa’afetaia e Haleck le avanoa ua mafai ona ia maua e galulue fa’atasi ai ma le Ofisa o Leoleo i le fa’ataunu’uina o aoaoga e fesoasoani ai i le latou pito laau.

Mai tausaga e 40 na galue ai i le Matagaluega o Leoleo a le aai o Los Anegeles (LAPD), e 30 tausaga sa avea ai o ia ma Faiaoga mo le a’oa’oina o metotia e fa’aaoga ai a’upega i galuega Fa’a Leoleo. O le taimi nei, ua avea Haleck ma Faiaoga Sinia a le LAPD i le fa’atinoina o aoaoga o le fa’aaogaina o a’upega.

Sa ia taua i le taimi o le faauuga i le vaiaso na te’a nei le tele o Ofisa o Leoleo i ni isi o setete o le malo tele ua ia malaga ma fa’atino ai aoaoga eseese, ina ia fesoasoani ai i le fa’aleleia atili o le auaunaga a Leoleo. O nei aoaoga ua mafai fo’i ona fa’amanuiaina ai le Ofisa o Leoleo a Amerika Samoa, fa’apea ai ma Leoleo o le malaeva’alele a le malo i Tafuna.

O le la’asaga lona lua o nei aoaoga mo Leoleo ua fa’amoemoe e fa’ataunu’uina i le masina o Mati o le tausaga fou, ma ua fa’amoemoe e toe malaga mai ai le susuga Haleck mo le fa’atinoina o ia aoaoga, ina ia fesoasoani atili ai pea i auala e fa’aleleia ai le tautua a le Ofisa o Leoleo.