Ads by Google Ads by Google

Aloaia e le malo tautua a Tama ma Tina matutua

ausage@samoanews.com

O le taeao ananafi na fa’ataunu’uina ai e le malo la latou polokalame masani lea ua 4 tausaga o fa’agasolo mai pea, o le tufatufaina lea o meaalofa e aloaia ai le tautua a Tama ma Tina matutua i le atunu’u i le masina fa’ai’u lenei o le tausaga, lea na fa’ataunu’uina i le maota o Tupulaga Talavou i Pago Pago.

 

Na matua fa’atumulia le maota o Tupulaga i le mamalu o Tama ma Tina matutua na fa’amalo’ulo’u atu e auai i lenei polokalame, ma i ai fo’i le avanoa e feiloa’i ai i Ta’ita’i o le malo fa’apea ai afioga i Fa’atonusili o matagaluega ma ofisa eseese a le malo.

 

A o le i amataina le sauniga lotu, na maua le avanoa o le afioga i le ali’i kovana ia Lolo Matalasi Moliga e feiloa’i atu ai i Tama ma Tina matutua, e ala i le lulu aao ma fa’atalofa ma le to’atele o i latou na maua le avanoa e feiloa’i atu ai.

 

O se sauniga lotu puupuu na saunia e le susuga i le Faifeau Toeaina ia Rev. Elder Fiti Aofia na tatala aloaia ai le polokalame, ma sosoo ai loa ma le saunoaga autu o le aso mai le afioga i le ali’i kovana.

 

“E leai se isi itu e pito sili ona taua i o matou loto i lenei aso (aso ananafi) nai lo le agaga o le fiafia ma le fa’afetai, ina ua mafai ona toe maua lenei avanoa tatou te feiloa’i ma mafuta fiafia ai, e ui fo’i ua to’atele ni isi o Tama ma Tina matutua o le atunu’u ua afe moe la latou folauga, ae fa’afetai o lo o maua pea e le to’atele le malosi tatou te mafuta fiafia ai”, o le saunoaga fa’afeiloa’i lea a le ali’i kovana.

 

I le autu ai o le polokalame o fa’aupuga nei, “Toe Tepa Tasi i le Tuana’i”, na taua ai e Lolo le taua tele i le malo o le toe tepa i tausaga e tele ua tuana’i, ma toe mafaufau ai i le tautua ma le auaunaga sa fa’atinoina e i latou ua avea nei o Tama ma Tina matutua, lea sa latou asaina mai ai le fita o le ala, ma tau saili se manuia aua lumana’i lalovaoa o Tutuila ma Manu’a.

 

“E le faigofie la outou tautua i le tele o tausaga ua mavae. E ui i lo outou lima vaivai, ae sa outou galulue punoua’i ma le fa’amalosi, ona o lo outou naunau ia maua se lumana’i lelei mo tupulaga o Amerika Samoa. E taua la outou sao, lea ua mafai ai e le malo ona see i ma’a o malie i lenei taeao”, o le isi lea saunoaga a le ali’i kovana na fa’alogoina ai le tau fai pati o le mamalu o le aofia na auai i lenei fa’atasiga.

 

Na fa’amanino e Lolo i Tama ma Tina matutua e fa’apea, o se tasi o anavatau a le la faigamalo ma Lemanu ina ua fa’atoa tula’i mai i le 2013, o le ave lea o le fa’ataua i tagata matutua e tusa ai o le latou tautua i le atunu’u i tausaga ua mavae, ma, atonu e le lava meaalofa fa’atauva’a ua saunia e le malo mo i latou, peita’i o lo o afifi atu ai i nei meaalofa le agaga fa’afetai o ta’ita’i o le malo e fai ai ma sui o le atunu’u atoa, e tusa ai o le latou tautua.

 

Ae ui i le fa’amuta aloaia ai o le tautua a Tama ma Tina matutua mai galuega sa latou tautua ai i le atunu’u ma le malo i tausaga ua mavae, peita’i o lo o molimauina pea le fa’aauau o le latou tautua i totonu o aiga, ekalesia, nu’u ma itumalo, e ala i le tausiaina o fanau ma tapu’e o latou olaga talavou ina ia iloa ma malamalama i le taua o tu ma agaifanua a Samoa.

 

“E ui ua matua lo outou soifua ma ua vaaia le fa’aifo o lo outou malosi, ae o lo o molimauina pea le tele o galuega lelei o loo outou fa’atinoina mo le atunu’u, e le gata o la outou tatalo i le alo ma le po, ae o la outou tu’u alalo ma fautuaga o lo o mafua ai ona sologa manuia fuafuaga fa’ataoto i totonu o aiga”, o le saunoaga lea a le ali’i kovana.

 

I le fa’aiuga o lana saunoaga, na ia toe fa’atepa ai le mamalu o le aofia i le mafua’aga na tusia ai e le Atua le Tulafono e 5 ma tu’u atu ia Isaraelu e tausi ma fa’amamalu, ona o le manatu e tatau i tupulaga talavou ona iloa ‘ava ma fa’aalo’alo i o latou matua, o iina e afua mai ai manuia o le olaga.

 

“Ou te tatalo atu ina ia tatou fa’aauau pea ona fa’ataua o tatou matua faapea ai Tina ma Tama matutua uma o le atunu’u, o iina o lo o taoto ai fa’avae o le ola manuia o soo se tagata soifua”, o le fa’aiuga lea o le saunoaga a le ali’i kovana.

 

Na fa’ailoa e le tofa Fiu Saelua i tagata matutua e fa’apea, e na o i latou lava e fa’alua ona fa’ataua e le malo la latou tautua i le tausaga, e le gata o le aso faapitoa mo Tagata Matutua i le masina o Me, ae fa’apea fo’i ma le polokalame o le Kerisimasi i le fa’aiuga o le tausaga, ona o le naunau o le malo ia si’i maualuga ma fa’ataua le tautua a tagata matutua.

 

O le mae’a ai o saunoaga fa’apitoa o le polokalame, na aga’i atu ai loa le faletua o le ali’i kovana ia Cynthia Molia mo le tauaaoina atu o meaalofa i Tina ma Tama matutua ua ausia tausaga maualuluga.

 

O le fa’ailoga taualoa muamua na tauaao atu lea e le malo i le afioga a Ale Tifimalae Ale, lea sa avea ma Fa’atonusili o le Ofisa o Tagata Matutua ua fa’amavae i le masina na te’a nei, ona o tulaga le atoatoa i lona soifua maloloina.

 

O isi fa’ailoga taualoa na fa’apitoa lea i Tina e to’alua ua ausia le ta’i 101 tausaga o la soifua, sosoo ai loa ma le Tama e to’atasi ua ausia le 97 tausaga o lona soifua. O le mae’a ai o fa’ailoga fa’apitoa, na tauaaoina ai loa fa’ailoga mo Tagata Matutua uma lava sa auai i le polokalame, lea na tufatufaina e le faletua o le ali’i kovana, fa’apea ai sui o le Kapeneta i afioga i ali’i ma tama’ita’i Fa’atonusili.

 

O meaalofa sa tauaao ina atu i Tama ma Tina matutua, na saunia lea e Matagaluega ma Ofisa eseese uma a le malo.