Ads by Google Ads by Google

Alo o Amerika Samoa sa tiute i Latvia i Europa ma isi fitafita

Mai le kamupani atoa e 27 na malaga, e i ai ona soa kamupani ma o le vaega lea a le Ordinance e alai ai le fitafita tiute mai Amerika Samoa, SPC Uluenga, Faaati Lehualani. L-R: Randy Gillis [E le’i alu i le vaega mo Europa], SPC Uluenga, Faaati Lehualani; SPC Lambert, Tyler; SGT Vazquez, Hector; PFC Espinoza, Esteban ma SPC Quiles, Fernando.  [ata: Leua Aiono Frost]

O le sauniga mamalu na tapena e le First Battalion 58th Aviation Regiment i le nofoaga a le militeri i Fort Rucker, Enterprise, Alabama, sa latou fa’afeiloa’i aloa’ia ai Fitafita Tiute e to’a 27, na tu’ua lea nofoaga ae malaga e fa’atino le auaunaga i Latvia i Europa, ma ua toe taliu manuia mai.

 

E 9 masina o lenei tautua mai ia Novema 2015 ae toe taliu mai ia Iulai 2016. Na fa’aigoaina le kamupani na masi’i mo tiute i Europa, o le Air Traffic Control Company ma sa fa’atautaia tiute fa’atulaga e sapaia ai le latou misiona o le “Operation Atlantic Resolve.”

 

Mai lea to’a 27 o fitafita a le Army, to’atasi  le alo o Amerika Samoa, SPC Uluenga, Fa’aati Lehualani mai le afio’aga o Futiga ma Nuuuli.

 

“E matua mamao nei atunu’u i Europa, e malulu fo’i, peita’i, e to’atasi lava le isi alo o Amerika Samoa na ou fetaui i ai, ao fa’aaunu’ua ai fo’i i tiute, o le tuagane lea o Emmerson Sooa’emalelagi mai Nuuuli, ae na fa’ato’a fetaui ma’ua ae ua taliu mai o ia mai lana tiute, lea sa matou fa’aauauina,” o se tala fiafia lea e tusa ai o se fa’afesili pe i ai se alo o Samoa na fetaui i ai i lea umi na masii ai i Europa.

 

I se talanoa mai a le Taitai o lea misiona, Chief Warren 2 Clark, Jason, na ia fa’ailoa ai ituaiga tiute na nafa ma i latou, e aofia ai le “Toe fa’aleleia o satellite, masini feso’ota’i ai feuta’iga i le initeneti po’o uaealesi i le va o nofoaga o le Militeri ma isi Kamupani o lo’o fa’atulaga i nofoaga eseese i atunu’u uma o lo’o i le li’o o le Konetineta o Europa.”

 

O le taua o le latou galuega, “Ia toe fa’aleleia le tele o mea e ao ina mautinoa le anagata e tusa ai o a’afiaga o le suiga o le tau, ia maumaua’i le lelei o nei mea faigaluega ia le afaina tiute fa’atino o fitafita ma le Vaega Au, pe a o’o ina mo’omia le fa’aaogaina i se vaitau o i luma. Ae maise fo’i, o lo’o fa’aauau pea lava ona fa’atino tiute o le militeri i totonu o atunu’u o le atu Europa i le taimi nei.”

 

O le vaega fo’i lea o nofoaga o le US Army sa fa’aaogaina i le vaitau o le Operation Iraqi Freedom, ma e tatau lava ona tapenapena pea e le faatamala fo’i le vaega au i le toe fa’aaogaina i nisi fuafuaga o i luma, aua e le nofoa’i lava fo’i vevesi o fa’aauau pea i le atu Europa.

 

O Lehualani sa aoaoina i le Manuele Tausala Elementary, soso’o ma le Manulele Junior High, 2 tausaga i Tafuna High ae toe siitia i le Nuuuli Voctech High mo lana vase 11 ma le 12, ma fa’au’u mai ai i le tausaga 2010. Ulufale i le ASCC ma sailia lona fa’ailoga Associate of Arts ma su’e mai ai mo le Militeri.

 

Asia togi mo le US Air Force ona tu’u lea o le aiga e ulufale i le Fuava’alele i Washington State, peita’i, sa naunau pea ia mo sana auaunaga i le US Army, ma sa ulufale mo BCT i Fort Jackson, South Carolina, soso’o ma lana AIT i Georgia Fort Gordon, ma si’itia mai ai loa i Fort Rucker, Alabama mo lana tautua fa’aauau i le Army.

 

Ua si’itia lona tulaga i le E4 i le taimi a’o auai i tiute i Latvia ma sa fa’ae’e ia te ia lea fa’amanuiaga a’o i lea atunu’u. Na amata mai lana auaunaga a’o Pvt2.

 

“Ou te fa’afetai i le Atua mo lana puipuiga mo i matou uma o fitafita tiute, ae sili ona ou fa’afetai i le tapua’iga mau a lo’u malo ma ona tagatanu’u uma o lo’o tapua’ia o matou raiva i nofoaga o vevesi. E le galo fo’i le tapua’iga a si o’u tina ma le vasega o tuagane, uso ma aiga e fa’asino i nai o’u matua. Ou te misia pea lava le mafanafana o le alofa ma le puipuigamalu a matua ma tuagane pele i taimi o faiva i nei atunuu mamao ese mai ma outou. Peita’i o le tautoga e ao ina fa’atino faiva, timu pe la, malulu pe vevela, ae feiloa’i pea ma outou i talosaga si’itia i le Atua o mea uma, na te puipui mai ma fa’aola i matou mai ala o le tautua, tausia le saogalemu o le Iunaite Setete o Amerika ma le lalolagi atoa,” o sana tala lea.

 

Lehualani, o se alo e fa’asino i le tama ua tu’ua le malo, Leo Inoke Sione Uluenga o Futiga, Nuuuli ma Taufusi ma le tina o Leua.