O lo o fa’agasolo i le taimi nei suesuega a le Vaega Suesue a le Ofisa o Leoleo, i tu’uaiga fou ua alia’e mai i le Falepuipui o Tamaiti i Tafuna, fa’asaga i se ali’i Leoleo sa ia fa’ataga se ali’i talavou o lo o loka i le Falepuipui a Tamaiti e alu i tua mai le lotoa i le leva o le po.

O tu’uaiga e aofia ai le fa’ataga e le ali’i Leoleo lea o le tamaititi e 17 tausaga le matua e alu i tua i le po e feiloa’i ma lana uo tama’ita’i o lo o fa’atali mai i le vaega o lo o i ai le Ofisa o Galuega a le malo.

Na faamaonia mai e ni isi e silafia lenei mataupu, le mae’a lea ona saunia e le Pule o le Falepuipui o Tamaiti o sana ripoti e uiga i lenei mataupu, ma ua tu’uina atu i le Komesina o Leoleo e silasila i ai.

O le mataupu lenei na tofu mai i le Samoa News, ina ua talosagaina e le Tina o le ali’i e 17 tausaga o lo o a’afia se fesoasoani a le nusipepa e faalauiloa ai tulaga uma e faatatau i le mataupu a si ana tama, ina ua fiu e fesiligia le Ofisa o Leoleo mo se fesoasoani.

O le mataupu lenei na mafai ona silafia e le Tina, ina ua alu atu o ia e asi lana tama i le aso 2 Novema 2017 i le falepuipui, ae fa’afuase’i ai ona ia vaaia Leoleo mai le Vaega Suesue a le Ofisa o Leoleo, faapea ai ma se loia a le malo na aga’i atu e fesiligia ma su’esu’e lana tama e uiga i lenei mataupu.

O le le talitonuina e le Tina o Leoleo ma le loia a le malo latou te fesiligia ma suesue lana tama, na mafua ai ona ia talosagaina le tatau lea ona i ai se Loia e tula’i mo lana tama i le taimi o le suesuega.

Na faafesootai e le loia a le malo le tama’ita’i loia ia Kate Hannaher mai le Ofisa o Loia Fautua, ma mafai ai loa ona aga’i atu o ia e auai i le fa’atalatalanoaga sa faia. O le mae’a ai o le fa’atalatalanoaga sa faia, na fa’amatala uma ai loa e le tamaititi o lo o a’afia mea uma sa tutupu, e aofia ai ma le fa’ataga o ia e le Leoleo e alu i tua ma le lotoa i le po e vaai lana uo tama’ita’i.

O le tama’ita’i e pei ona taua i lenei ripoti, sa taofia fo’i o ia i totonu o le Falepuipui a Tamaiti. Na taua e le Tina i le Samoa News e fa’apea, o lona popolega e uiga i lenei mataupu, o le saogalemu o lana tama.

“O lea sa tuu mai la’u tama atoa ai ma isi tamaiti o lo o taofia i le Falepuipui e vaai ma leoleo fa’alelei, ae foliga mai ua le fa’amaoni Leoleo i le fa’atinoina o a latou tiute. O le latou tiute o le tausi ma vaai faalelei pagota, ae le o le fa’ataga e o i tua i le leva o le po. Faapefea la pe ana tula’i mai se fa’alavelave ma oti ai la’u tama ina ua tatala i tua e le Leoleo, o ai e tu’uaia i lenei mataupu,” o le saunoaga lea a le Tina.

O tu’uaiga e pei ona alia’e mai i le Falepuipui a Tamaiti, e tutusa lelei lava fo’i ma tu’uaiga na alia’e muamua mai i le tausaga na te’a nei, lea na mafua ai ona molia ni Leoleo se to’afa i le masina o Aperila o le tausaga na te’a nei, ma tu’uaia i moliaga eseese e aofia ai le fa’asosola i tua o pagota, atoa ai ma le faia o uiga mataga i pagota tama’ita’i.

Na faamaonia mai e le tama’ita’i Loia ia Hannaher i le Samoa News, le mae’a lea ona ia talanoa i loia a le malo e uiga i lenei mataupu, ma ua tatau fo’i ona faia sa latou faaiuga e fa’atatau i tu’uaiga o lo o alia’e mai i totonu o le Falepuipui o Tamaiti.

O se tasi o itu o lo o pito sili ona popole i ai lagona o le tama’ita’i loia o Hannaher, o le saogalemu o fanau o lo o taofia i le falepuipui. Sa ia taua fo’i le tele o fa’aletonu o lo o tula’i mai i le tulaga o le falepuipui i le taimi nei, e pei o le leai lea o ni faailoilo pe a tutupu ni afi.

O lo o faagasolo pea i le taimi nei suesuega a Leoleo e uiga i lenei mataupu.