Aiaiga fou mai le Fa’atonusili pe a toe talia taro mai Samoa


[ata: foa'i]
ausage@samoanews.com

Ua i ai nei ni aiaiga fou ua sauni le Ofisa o Fa’atoaga e fa’ataoto, pe afai ae toe talia le auina mai i totonu o le atunu’u o le taro mai Samoa.

 

O ia aiaiga fou e pei ona fa’amaonia e le afioga Rev. Filifa’atali Michael Fuiava, e aofia ai le le toe taliaina lea o le aumaia e tagata faipisinisi o le taro mai Samoa, poo i latou o lo o fa’aigoaina e le to’atele o “middle man”, ae o le a na o le aufai fa’atoaga lava a Samoa e faataga ona latou aumaia le taro i totonu o Amerika Samoa.

 

“O le fuafuaga e pei ona fuafua le Ofisa o Fa’atoaga e fa’ataoto, ina ia fa’a faigofie ai ona foia fa’afitauli e alia’e mai i le taro mai Samoa, ma mafai ai ona feso’ota’i sa’o atu la matou Ofisa i sui o le aufai fa’atoaga a Samoa, nai lo le tau tulituli solo o le au faipisinisi o lo o latou fa’atauina le taro mai le aufai fa’atoaga i Samoa, ona o mai lea e la’u mai i Tutuila nei,” o se saunoaga lea a Filifa’atali i le Samoa News.

 

O le fonotaga a le aufai fa’atoaga i le vaiaso na te’a nei, na fa’aalia ai e ni isi o le aufai fa’atoaga le mataupu e faatatau i tagata faipisinisi o lo o latou la’u mai le taro ma fa’atau i Amerika Samoa.

 

O ni isi o fa’asea mai le aufai fa’atoaga a le atunu’u, ona ua avea i latou nei ma auala ua maualuga ai le tau o le taro mai Samoa, ona o lo o naunau i latou e saili sa latou polofiti, ae avea ma auala e taugata ai le maketi ma pologa ai le atunu’u.

 

Na taua e se tasi o fai fa’atoaga i le Samoa News le tatau lea ona taofi le toe aumaia e le aufaipisinisi o le taro mai Samoa, sei vagana lava le aufai fa’atoaga Samoa e fa’ataga ona latou la’uina maia le taro e fa’atau iinei.

 

O se tasi o mataupu na fefa’asoaa’i ai le aufai fa’atoaga ma le afioga i le Fa’atonusili i le fonotaga i le vaiaso na te’a nei, o le fesili pe gafatia e le aufai fa’atoaga a Amerika Samoa ona sapalai le taro mo le atunu’u atoa, ona o lea ua tele masina e le o toe aumaia le taro mai Samoa.

 

Na taua e ni isi o le aufai fa’atoaga i le Samoa News, le lava ma totoe lea o le taro o lo o mafai ona sapalai e le aufai fa’atoaga a le atunu’u e tali ai manaoga i faleoloa, maketi, atoa ai ma le polokalame a le School Lunch a le Ofisa o Aoga a le malo.

 

Saunoa Filifa’atali e fa’apea, o lo o tumau pea le fa’aiuga e pei ona taofia ai le aumaia o le taro mai Samoa e oo mai i le taimi nei, ona o lo o fa’atali sa latou tali e tusa ai o fesili sa auina atu i ai.

 

“Afai loa e maua mai tali o fesili e pei ona tu’uina atu i le Ofisa o Faatoaga a Samoa, ona iloilo loa lea e le Ofisa o Fa’atoaga o le isi la’asaga e tatau ona la’asia,” o le saunoaga lea a Filifa’atali.

 

I luma o le maota o sui i le vaiaso nei, na tula’i ai le afioga i le ali’i faipule mai Manu’a #2 ia Toeaina Faufano Autele ma ia fa’aalia lona lagona fa’anoanoa, i le tulaga o lo o fa’aauau ai pea ona taofia e le Ofisa o Fa’atoaga a le atunu’u le taro mai Samoa, ae o lo o fa’aauau pea ona talia e isi atunu’u o le lalolagi e aofia ai Niu Sila, Ausetalia, Hawaii ma le Iunaite Setete.

 

Na taua e le Minisita o le Ofisa o Fa’atoaga a Samoa, afioga ia Laaulialemalietoa Lauatea Polataivao Fosi i sana tusi sa tu’uina mai ia Filifa’atali, lona fa’anoanoa i le taofi lea e Amerika Samoa o le taro mai Samoa, ae o lo o talia e atunu’u tetele o le lalolagi.

 

Ona o tulaga e pei ona tula’i mai i le taro a Samoa, na taua ai loa e le ali’i Minisita ia Filifa’atali, le le toe manana’o lea o le aufai fa’atoaga a Samoa e la’u mai la latou taro e fa’atau iinei, ae o le a saili isi maketi i fafo e la’u i ai la latou sapalai.

 

Ae na taua e Filifa’atali e fa’apea, o lona tiute i lalo o le tulafono, ia mautinoa o lo o saogalemu fa’atoaga ma taumafa mo le fofoga taumafa a le atunu’u.

Comment Here