Ads by Google Ads by Google

6 fanau a’oga filifilia fa’aaliga fa’asaeanisi i Amerika


O se va’aiga i le to’aono o fanau maua togi maualuluga i le fa’aaliga o galuega fa’atino fa’asaeanisi i le teritori, ma o le a malaga i le tauvaga o Galuega Fa’atino Faasaeanisi e faia i Los Angeles i Kalefonia ia Me, 2017. O le to’atasi o nei sui, tupito i le agavale o Ms Taualoa Muese mai Manulele Tausala Elementary na ia maua tulaga togisilia i galuega fa’atino mai Aoga Tulaga Muamua. Afai e malaga o ia, e na’o na maimoa i le tauvaga atoa, ae o le isi to’alima mai A’oga Maualuluga, o le a tauva latou galuega fa’atino. [ata: Leua Aiono Frost]

Mai le aotelega o galuega fa’atino Fa’asaeanisi sa fa’aalia e fanau aoga mai le vasega Level K5 seia i le Level 12 i Amerika Samoa atoa, ua mautu ai le to’aono o i latou o le a tauva i le tauvaga galuega fa’atino Fa’asaeanisi e faia i Los Angeles i le masina oMe.

 

O i latou nei sa fatato’a fa’ailoa i se fa’atasiga mo sui uma na tauva mai  aoga ta’itasi i le USAmry Reserve i Tafuna i le aso Lulu nei.

 

O sui lautogia ua aofia ai: Gabrielle Langkilde mai Fa’asao Marist High School i lana galuega tau le Siomaga ma ua ia avea fo’i le togisilia i galuega fa’atino a le vasega o A’oga Maualuluga.

 

Tulaga lua o Shobita Rajamohan mai le South Pacific Academy i lana galuega fa’atino tau le Lalolagi & Vateatea. Tulaga tolu Da In Myung mai le South Pacific Academy i lana galuega fa’asaeanisi i le Su’esuega o La’au. O le tulaga fa o Brodie Blizzard mai le a’oga maualuga a le Manumalo Baptist i lana galuega Fa’a-Inisinia, ma le lona lima o Alofa Aitulagi mai Manumalo Baptist, lea sa ia fa’atinoa se galuega tau le Siomaga.

 

O i latou nei e to’alima,  ua talia fo’i e le Komiti o le Faaaliga Fa’asaeanisi i le Iunaite Setete, ae ese mai ai le sui e maimoa fa’apitoa mai le vasega o galuega fa’asaeanisi a a’oga Tulaga Muamua uma i le teritori.

 

O lona uiga o le to’atasi lea e fa’aopoopo i lea to’alima mai a’oga maualuluga o le a malaga fa’atasi i lenei tausaga. O le sui ua manumalo A’oga Tulaga Muamua i lenei tausaga o le tamaitai o Tagaloa Muese o le Manulele Tausala i Nuuuli.

 

Na fa’asalalau lona agaga fa’afetai i le to’atele i lena taimi na fa’alauiloa ai lona avea ma sui ua atagia e malaga fa’atasi ma i latou e to’alima i Los Angeles.

 

Peita’i, e i ai fo’i ma le vaega e to’asefulu ua mae’a fa’alauiloa, e mafai ona avea ma sui e fa’aalia latou galuega fa’asaeanisi i le Broadcom Masters, o le latou vaega e ao ina faia i le taimi nei, e fa’atumu e i latou le talosaga i le Initenti, e faia lava e le fanau a’oga lea na tauva lana galuega fa’atino fa’asaeanisi i le tauvaga o lenei tausaga.

 

Afai e pasia ma talia mai, ona see atu fo’i lea o lana galuega i se fa’aaliga fa’apitoa. O lea to’asefulu, ua aofia ai ma Tagaloa Muese.

 

O le isi to’aiva e aofia ai: Danielle Magalasin mai le Samoa Baptist; Jade Kruse mai le Manumalo Baptist; Ruelroy Luvu mai le Manumalo Baptist; Rasheed Levy V. Ganda mai le Samoa Baptist; Georgina Alofa mai le Manumalo Baptist; Brandon mai le Samoa Baptist; William Spitzenberg mai le Manumalo Baptist; Arianne Adriano mai le South Pacific Academy; Kevin Lo mai le Pacific Horizons; Joanya Tafua mai le Manuelle Elementary; Jaedyn  Alefosio mai le Alofau Elementary; Helena Willis mai le St Theresa; Marianive Tauave mai le Manulele Elementary ma Janice Mase mai le Iakina Elementary.

 

E ui ina ua lisia na’o nei suafa o le fanau ua fa’amanuiaina a latou galuega fa’atino, ae o lo’o i ai le isi to’atele na’ua e 172 i latou na fa’aalia latou galuega fa’atino i le vasega o Aoga Tulaga Muamua ma le to’a 169 mai a’oga maualuluga.