Ads by Google Ads by Google

50 tausaga tautua matavela Judith Anne Payes i le LBJ


O se va’aiga i le aufaigaluega e feso’ota’i ma le tama’ita’i o Judith Anne Payes i le ofisa o faamauamuga a le falema’i o le LBJ. O le aso Faraile ua te’a na faamanatu ai le 50 tausaga o lana tautua i le falema’i.l [ata: Leua Aiono Frost]

O le aoauli o le aso Faraile na faia ai le ‘aiga fiafia e fa’ailogaina le tautua matavela a Judith Anne Payes, ma o se tautua ua iloga i le falema’i tele i Faga’alu, i le ofisa o “Fa’amaumauga mo Tagata Gasegase” po’o le ofisa e i ai faila mo tagata gasegase.

 

Na auai i lea faatasiga, le afioga Taufete’e John Faumuina, le Pule Sili o le LBJ ma ia taua’aoina aloaia tusitusiga e fa’amau fa’ailoga ai le 50 tausaga o le tautua a Payes, fa’atasi ai ma le Fa’ailoga ua tusia ai:  “Tautua e Fa’ataua ai le Auaunaga Maumaua’i”

 

“Fa’afetai mo lau tautua ua au, o lau tautua le fa’atuaoia e faigata fo’i ona maua se tasi ua agava’a na te suia. Mo le 50 tausaga o e galue ponoua’i i le vaega o Fa’amaumauga mo Faila o Tagata Gasegase o le atunu’u se’ia oo ina avea fo’i oe ma pule o lea lava matagaluega i lona suiga fou ua i ai, ua iloga lau galue,” o a Taufete’e lea.

 

“E te le fa’avaivai, e mamao lau Tofa, ma o se pule fo’i sa fa’atuatuaina ma e mau lava lau fa’autautaga i ou faiva fa’ata’ita’i o lea itu taua o fa’amaumauga o taua mo tagata uma i o latou faila.”

 

“O lona igoa ia i matou o Grandma, aua e leai se tasi lava o value i totonu o lenei falema’i ua ausia lea ituaiga tautua umi fa’apenei, ma le isi, ua matua leai se vaipanoa o le matou galuega i tulaga o fa’amaumauga, e na te le silafia, ma e fiafia lava e fa’asino i matou i le faiga o le galuega, pe afai e te fia iloa se mea tau matou tiute fai i aso ta’itasi,” o se tala lea a se tasi o tama’ita’i ua loa fo’i i lea potu o fa’amaumauga, ma o se tasi ua silia ma le 10 tausaga o lana tautua i lea lava galuega faatasi ma Payes.

 

Ina ua fesiligia Payes i lona olaga galue sa ia fa’ailoa mai, “Na atoa loa le 18 o ou tausaga, amata loa na ou faigaluega i le Falema’i tuai, ao i ai i Utulei le tatou falema’i.”

 

E oo fo’i i le taimi na masi’i ai le falema’i i Faga’alu, sa ia iloa lelei fo’i le faigata o lena si’itaga o le galuega, peita’i, fa’afetai sa gafatia uma lava e tagata faigaluega lea fesuia’iga o nofoaga.

 

“O Iuni 6, 1968 na siitia ai le galuega i Faga’alu, ma o le matata lava lea sa ou galue mai ai i le amataga o lou olaga faigaluega, seia oo mai i le taimi nei, o lo’o faia pea lava, ae ua suia laitiiti ona ua fa’aaoga masini Komipiuta e fa’aulufale ai fa’amaumauga o faila o tagata gasegase, ma ua atili ona faigofie toe vave fo’i le galuega i lenei faiga fou,” o se saunoaga lea a Payes.

 

O le tupu’aga mai o lenei tama’ita’i, e soifua lava o ia e pei o se tasi e leai sona tupuaga mai Amerika Samoa, ona e le tautala o ia i le gagana Samoa, ae aua nei e mao ai, e malamalama lelei o ia pe a talanoa nisi i le gagana Samoa.

 

“O lo’u tina o Oilau Mutu o le aiga Sa Fa’agata, peita’i o le oo mai o si o’u tama o Robert Charles Payes i o tatou laufanua nei, ma avea ma Harbor Master o le Matagaluega o Uafu & Taulaga i Fagatogo, lea na mafana ai le la’ua mafutaga, fa’aipoipo ma maua ai fo’i i maua ma si ou tuagane o Mike Payes.”

 

Na amata a’oa’oga iinei, ona siitia lea o aoga i Hawaii, ma ina ua mae’a aoga maualuluga i Hawaii taliu mai loa ma faigaluega i le Falema’i i Utulei. O lona uiga, ua atoa le 68 o ona tausaga.

 

O le vaega lenei o le falemai, o lo’o fa’auluulu i le itu o le MIS - Medical Information Services, ma o lo’o i lalo o le fa’afoega a le ali’i o Ray Talalelei Tulafono Jr., ona talu ona fa’atulaia mai le ituaiga polokalama fou fa’akomipiuta e fa’amaumau ai uma fa’amaumauga o faila mo tagata gasegase o le atunu’u ma ua suia ai fo’i ma le galuega e fa’atino e Payes i le tolu tausaga ua te’a.

 

Ua fa’aigoaina nei le tofi o galue ai: Coding Manager, peita’i o le tofiga lava e tasi sa ia galue mai ai mo tausaga e tele o le Records Manager. O le isi lea vaega e sili ona taua tele i le togafitiga o gasegase, aua e tatau lava ona mua’i taga’i toto’a le mamalu o ali’i ma tama’ita’i Foma’i, a’o le’i togafitia se tasi, i le faila mo ni fa’amaumauga o ituaiga gasegase o maua ai le sui, atoa ai ma vailaau sa fa’atulaga e foma’i sa va’aia i latou muamua, ina ia te’a pe togafitia ai le gasegase sa maua muamua ai.

 

E tusa ai ma se tala a Tulafono Jr. sa ia fa’ailoa mai, “O se fiafiaga ia te a’u, ona o se tasi muamua lenei ua agavaa i le 50 tasuaga talu mai ona galue punoua’i i lana auaunaga i le tatou falema’i, o se tasi mai la’u vaega. Ia o Grandma ia i matou, aua e fesili lava Mulimau ia Muamai i le galuega, e ui ina e eseese ala o le tomai, ua mafua ai ona ou nofo i le nofoa sa tatau ona se’ei ai o ia i le matou galuega. O ia o se ma’a taua i le matou galuega!”

 

O Payes, e le’i faia lava sona aiga, ua foliga mai e fa’aipoipo lelei o ia i lana galuega, e pei o lena fuaitau. I le taimi nei ua toe lava o i la’ua ma si ona tuagane nisi o lona aiga la te vavalalata tautoto, ia ona oo ane loa lea i le pa’ia lasilasi o le la’ua aiga to’atele Sa Fa’agata i Fagatogo.