Ads by Google Ads by Google

$4 miliona aofa’i tagi Rev. Amaama fa’asaga Ta’itaifono EFKAS ma isi

ausage@samoanews.com

E $4 miliona le aofa’i o le tagi ua faila e le Failautusi Aoao a le Ekalesia Faapotopotoga Kerisiano i Amerika Samoa (EFKAS) ia Rev. Amaama Tofaeono, fa’asaga i le Ta’ita’ifono o le Ekalesia Aoao, susuga Rev. Elder Eveni Mamoe ma isi, ona o le mataupu e pei ona finauina i luma o le Vaega Iloilo o le Fa’amasinoga Maualuga a Amerika Samoa, ma tu’uaia ai lona igoa ta’uleleia i ni tu’uaiga e le fa’amaonia, ae ua avea ai ma itu ua ta’uvalea ai lona igoa ma lona aiga, ma i’u ina aveesea fa’amalosi mai ai tofi o le Ekalesia sa ia te ia.

 

O isi Ta’ita’i o le Ekalesia o lo o aofia i le tagi a Rev. Amaama e aofia ai le Sui Ta’ita’ifono ia Rev. Elder Fiti Aofia; Failautusi o le Komiti a le Au Toeaiina ia Rev. Elder Leatulagi, fa’apea ai ma Rev. Elder Faaeteete Saifoloi.

 

E le gata la o lea ua i luma o le fa’amasinoga le tagi a Rev. Amaama fa’asaga i Ta’ita’i o le Ekalesia, ae ua ia talosagaina fo’i se poloaiga a le fa’a’masinoga e fa’ataunu’u aloaia ai se iloiloga o le mataupu e pei ona finauina i le va o ia ma ta’ita’i o le Ekalesia, ina ia mafai ai ona iloilo ma fesiligia fa’amatalaga uma ua fa’asalalau fa’asaga ia te ia ma lona faletua ia Joan Aleluia Tofaeono.

 

E 4 vaega o le tagi a Rev. Amaama fa’asaga i Ta’ita’i o le Ekalesia ua taoto atu i luma o le Fa’amasinoga, ma le fa’amoemoe o le a iloilo ma talia e le fa’amasinoga.

 

O ia vaega e 4 o le tagi e aofia ai le Aveesea o le tofi Failautusi Aoao mai ia Rev. Amaama i se auala e le sa’o; Aveesea o lona Tofiga o le Faifeau Fa’auu i se auala e le sa’o; Faia o molimau tu’u gutu ma molimau tusitusia e le fa’amaonia fa’asaga ia te ia, atoa ai ma le Faia o tu’uaiga e fa’aleaga ma ta’uleagaina ai lona tagata.

 

I le vaega o le tagi e aofia ai le Aveesea o le tofi Failautusi Aoao mai ia Rev. Amaama i se auala e le sa’o, o lo o taua ai e le itu tete’e e fa’apea, o Rev. Amaama na tofia e le Ekalesia Aoao e fai ma Failautusi Aoao o le Ekalesia mo le 4 tausaga, e leai fo’i ni gaioiga fa’asolitulafono e ono lagolagoina ai le fa’aiuga ua faia e aveesea ai le tofi o le Failautusi Aoao mai ia te ia, a o le i oo i le taimi e fa’amuta aloaia ai le umi o lana konekarate sa tu’uina atu e le Ekalesia.

 

Talu ai o lea fa’aiuga ua faia e Ta’ita’i o le Ekalesia Aoao, na mafua ai loa ona le toe maua e Rev. Amaama lona totogi atoa ai ma fa’amanuiaga uma e agava’a i ai o ia i lalo o le tofiga o le Failautusi Aoao, ma, o le umi o le a le maua ai pea e Rev. Amaama fa’amanuiaga tau tupe e tatau ona agava’a ai o ia, o le a fuafua lea i se fa’aiuga e tu’uina mai e le Fa’amasinoga, i le fa’aleaoga lea o lona toe tauaveina o le tofiga o le Failautusi Aoao, poo le toe fa’aauau lea ona ia tauave o lenei tofiga taua a le Ekalesia.

 

Ma, talu mai le taimi na aveese ai lea tofiga mai ia Rev. Amaama, ua a’afia o ia i lagona o le mafaufau, ma ua fai ma auala ua a’afia ai tulaga manuia o le malosi o le tino, ma ua ia talosagaina ai le fa’amasinoga e poloa’i Ta’ita’i o le Ekalesia ina ia latou totogi le $1 miliona e tusa ai o ia tulaga fa’aletonu.

 

I le vaega lona lua o le tagi o le Aveesea lea o lona Tofiga o le Faifeau Fa’auu i se auala e le sa’o, ua talosagaina ai fo’i e Rev. Amaama le fa’amasinoga ina ia poloa’i Ta’ita’i o le Ekalesia ina ia totogi atu le tusa ma le $1 miliona e tusa ai o mafatiaga ua oo atu ia te ia ona o ia tulaga.

 

E pei ona taua i le tagi a le itu tete’e, o Rev. Amaama, o ia o se Faifeau Fa’au’u a le Ekalesia EFKAS. Sa iloiloina e le Komiti Faapitoa lona tulaga e avea ai o ia ma Faifeau fa’au’u, lea na tu’uina atu ma iloilo e le Komiti a le Au Toeaiina le fautuaga, ma fa’amaonia aloaia ai loa i le Fonotele a le Ekalesia Aoao.

 

O lo o finau mai le itu tete’e e fa’apea, e leai se gaioiga fa’asolitulafono na faia e Rev. Amaama na mafua ai ona faia le fa’aiuga a le Komiti a le Au Toeaiina e fa’aleaoga lona tofi o le Faifeau Fa’au’u, e leai fo’i se malosi i lalo o le Fa’avae a le Ekalesia Aoao e mafai ai e le Komiti a le Au Toeaiina ona latou fa’amalolo lona tofiga o le Faifeau Fa’au’u, se’i vagana le Fonotele Aoao a le Ekalesia o lo o i ai lea malosiaga.

 

E talitonu le itu tete’e, o le fa’aiuga e aveesea ai le tofiga o le Faifeau Fa’au’u mai ia Rev. Amaama, na faia lea e le Komiti a le Au Toeaiina ma le fa’amoemoe ina ia faigofie ai ona aveesea le tofiga o le Failautusi Aoao mai ia te ia, ona o se tasi o agava’a e mafai ai ona umia e se tasi le tofi o le Failautusi Aoao, o le avea lea o ia ma Faifeau Fa’au’u.

 

I le faia ai e le Komiti a le Au Toeaiina o lea fa’aiuga, na mafua ai loa ona le toe maua e Rev. Amaama ma lona aiga fa’amanuiaga tau tupe sa agava’a i ai i latou, ma ua tula’i mai ai isi a’afiaga i le tulaga o le soifua manuia o le aiga, a’afiaga o lagona atoa ai ma mafatiaga, ma ua talosagaina ai loa le fa’amasinoga ina ia poloa’i Ta’ita’i o le Ekalesia e latou te totogi le $1 miliona ona o le fa’aiuga ua latou faia.

 

I le vaega lona tolu o le tagi e aofia ai le Faia o molimau tu’u gutu ma molimau tusitusia e le fa’amaonia fa’asaga ia Rev. Amaama, o lo o atagia mai ai le le fa’amaonia o molimau ma fa’atalaga sa fa’asalalau solo e le susuga Rev. Elder Saifoloi atoa ai ma isi e uiga i lenei mataupu.

 

Finau le itu tete’e e fa’apea, o fa’amatalaga sese ma le le fa’amaonia sa faia e Rev. Elder Saifoloi, na fa’avae ai i luga le fa’aiuga e aveese mai ai le tofi Faifeau Fa’au’u atoa ai ma le Failautusi Aoao mai ia Rev. Amaama.

 

Ona o lea tulaga, sa le toe mafai ai e Rev. Amaama ma lona aiga ona maua penefiti ma fa’amanuiaga sa tatau ona agava’a i ai latou, ma ua talosagaina ai le fa’amasinoga ina ia poloaina le itu tagi latou te totogi le $1 miliona mo a’afiaga ua oo i ai le ua molia ma lona aiga ona o le fa’aiuga sa latou faia.

 

Ma le vaega mulimuli o le tagi a le itu tete’e, o le Faia o tu’uaiga e fa’aleaga ma ta’uleagaina ai Rev. Amaama ma lona tagata ta’uleleia, e talitonu le itu tete’e o molimau ma fa’amatalaga sa faia e Rev. Elder Saifoloi, o ni fa’amatalaga e le sa’o toe leai ni mau fa’amaonia e fa’avae mai ai, ae ua avea lea ma itu ua ta’uleagaina ai lona tagata ma lona aiga.

 

Ina ia toe fa’aleleia lagona mafatia ua a’afia ai Rev. Amaama ma lona aiga, ua talosagaina ai le fa’amasinoga ina ia poloaina le itu tagi latou te totogi le tusa ma le $1 miliona e tusa ai o le fa’aiuga ua latou faia.