Na fa’ataunu’uina le sauniga o le Fa’au’uga mo le Vasega Fa’aiuaso a Kanana Fou High School i le latou Faleta’alo taeao ananafi ma e to’a 35 i latou na fa’au’u mai ai.

Mai tausaga e tele ua mae’a talu ona fa’atula’ia le Aoga Maualuga i Kanana Fou, ua latou fa’ailoa mai, “Ua maoa’e taumafaiga a le fanau ua fa’ai’uaso nei e ala i tapula’a fou ua ausia tau le sailia o le atamai lautele. Ua faateleina le fanau e ausia sikolasipi a le tatou Malo ma avanoa sikolasipi fo’i mai Iunivesite i fafo fa’apea ma le Militeri.” O se saunoaga fa’apitoa lea na fa’afofogaina e le mamalu o matua ma i latou uma na auai o le vasega fo’i i sui vala’aulia faapitoa mo le fa’amoemoe o le vasega fa’aiuaso 2017.

“E le o se mea e mitamitavale ai, ae o le fa’afetai e si’i a’e i le Atua o mea uma, aua ana le seanoa ma Ia, e leai ni aso lelei fa’apenei e ausia mo le fanau,” o se tasi lea o tima’iga a le susuga le Fofoga Fa’apitoa mo le Vasega fa’aiuaso, le susuga Rev. Elder Fa’aeteete Saifoloi, Sui Taitaifono a le EFKAS.

O le manulauti a le vasega fa’aiuaso sa latou si’itia mai ai le mau:Salamo 37:4 - “Ia fiafia lava outou i le Ali’i, ona faia lea e Ia o mea e mana’o i ai lou loto!” E le o asa le faiva o le fanau fa’au’u i lenei tausaga, aua ua tonu la latou folauga ma lona tapasa.

Na tutula’i le sui o le Malo, le afioga le Lutena Kovana, Lemanu Peleti Mauga, sa ia toe fa’apipi’i atu sana fa’ala’ei’au, “Aua ne’i manatu outou ua le pale i se tulaga togisilia, ausia togi maualuluga, pe ua le fa’ailoa mai fo’i ni a’oga maualuluga o le a aga’i atu i ai i le isi tausaga aoga, aua sa ou i ai fo’i i lena tulaga, i le tausaga o lo’u fa’au’uga. Na uma lava le fa’au’uga, nofo i lalo o le niu, ma va’ai toto’a i le lumana’i, fa’ato’a mafaufau ai loa e saili i le vaega au. Lea ua ou tu atu, o se molimau ola o le soifua fa’amanuia o le Atua i le olaga talavou o alo o Samoa i so’o se taimi, aua o lo’o tatalo fa’amanuia ma saili manuia fo’i tatou matua mo i tatou uma, a’o tatou ola usiusita’i i matua i mea uma, ma ola taqua’i i lo tatou Atua, e o’o mai lava taimi lelei mo i tatou uma.”

I le tautalaga fa’apitoa a le sui na filifilia e le vasega e toe tima’ia o latou talavou a’o le’i folau atu o latou Sa i le lautele o le lalolagi o lumana’i, sa ia toe si’itia mai le mau Fa’ataoto 1:12 “Ia e Manatua le na faia oe i aso o lou taule’ale’a…”

“Afai e te faia lea, e le vale sou taui ma le fa’asinomaga a le Atua ia te oe ma lou olaga saili.” Sa ia toe fa’afesiligia le fanau fa’au’u, “Fa’amata o ai na mafua ai mea lelei ua outou maua? Ua mafua ai fo’i lenei aso? Ua ala ai ona fa’aoaina lima o outou matua ina ia mafai ona totogia tou a’oga, fa’atauina mea uma mo outou ina ia tapena fa’amatagofie lenei aso?”

Na tali le vasega, “O le Atua!” Na ia fa’afetaia le tali, peita’i, sa ia fa’ailoa mai, ae mafai ona fa’apea mai nisi, “O matou matua!” Ua tonu fo’i lea tali, ae o le tali sa’o lava, O lo tatou Atua, aua o lea ua outou mautinoa i la outou manulauti. Fa’afetai la ona o lo outou fiafia i le Atua, e faia fo’i e Ia mea e mana’o i ai outou loto.”

Mai le vasega fa’aiuaso o lenei tausaga, e i ai se tasi o i latou ua atoa lelei le fitu o Iunivesite o lo’o maua ai lona avanoa e a’oga ai ma ua ofoina mai ai sikolasipi e totogia ai ana a’oa’oga, e afua mai le $40,000 seia oo i le $70,000. O le tama’ita’i lea na ia mauaina le tulaga togisilia Precious C. Ameperosa, i lana SAT 1,150. O le sui na tulaga lua, o Adrian Bangui, o lo’o ia ausia fo’i le togisilia i le suera ACT 22 ona togi, ae o lo’o ia mauaina fo’i le avanoa i Leeward Community College/ University of Hawaii.

O le tama’ita’i o Sulufaigaosoara R. Shallout o lana ACT 19, ASVAB 38, ma ua talia mai lana talosaga i le Georgia Military College, George St Martin’s University Washington, ae talia fo’i i le ASCC. O Sinjin Elisara Ala ua talia mai i le Georgia Military College ma lana sikolasipi mai le ROTC  e $70,000 mo ana aoga i le 4 tausaga ae talia fo’i i le tatou ASCC, aua o togi ua ia ausia SAT1120, ASVAB 72.

O Tabatha Fiva Po’a i lana SAT 980, ASVAB 41, ua talia mai i le St Martin’s University, Washington, Talia i le Chaminade University, fa’apea fo’i ma le Kapiolani Community College ae maua ma lona avanoa i le ASCC. O le tama’ita’i o Elizabeth Sagaia Lualua i lona togi SAT 930; ua talia mai o ia i le Georgia Military College, fa’apea ma le St Martin’s University i Washington ma le ASCC fo’i.

O nisi na o taumafaiga ua iloga mai le matagofie i lenei tausaga i le vasega faaiuaso, ae o lo’o i ai fo’i nisi o le fanau ua maua avanoa i le US Navy le tama’ita’i o Annie Luaga Tupola, ma Liulagi Allen Iloa i lana SAT 990, ASVAB 41 ua talia mai i New Mexico Military Institute, New Mexico.

O le faia’oga na filifilia mo lenei tausaga i fa’ailoga a le PTA ua mauaina lea e le tama’ita’i faia’oga Liantluangi Renthlei, o kosi fa’apisinisi o le a’oga maualuga i Kanana Fou.