333 tagata, 105 aiga fa’asoa i ai Alofa Foa’i Fua - Kerisimasi 2017


O nisi o le to'a 44 o Sui na ofo mai le latou tautua i le Alofa Foa'i Fua i le taimi na tatala ai le latou foa'i i le aso To'ona'i na te'a i Utulei. [ata: Foa'i]

O i latou na tofu sao i le taumafaiga e tufatufaina atu meaalofa tau lavalava, se'avae ma isi oloa tau le tausiga o aiga. O i latou nei o Aioletuna Sunia, sui peresetene o le Alofa Foa'i Fua, ma le Tausala Lalelei o le Pasefika Matau'aina Toomalatai ma le ali'i peresetene o le Alofa Foai Fua - Ti'a Reid. [ata: foa'i]

Mai i fa'amaumauga a le Alofa Foa'i Fua ma le Pacific Global Citizens, ua fa'amautu ai le aofaiga o e na soloa'i atu ma fa'aaogaina le foa'i a lea sosaiete alofa e 333 tagata, aiga e 105 sa latou mauaina ni mea o mo'omia mo le fanau i totonu o latou lotoifale, e ala lea i lavalava, seevae ma nisi o sapalai e fa'aaoga mo latou aiga.

 

E le gata i le foa'i sa fa'atautaia i le Fale Laumei i le aso To'ona'i, ae ua mae'a fa'ataunu'u fo'i le latou foa'i o mea ta'alo e fa'afiafiaina ai le fanau o lo'o mama'i i le Pediatric Ward i le falema'i tele i Faga'alu.

 

E to'a 25 i latou na taua'aoina i ai meaalofa i le aso Faraile, 12:00 i le aoauli, a'o lumana'i le foa'i tele i aiga o i ai le mana'omia ma le mamalu lautele. O nofoaga fa'apitoa fo'i o lo'o alaala le tumau ai aiga ua a'afia latou lotoifale i sauaga, ua mae'a taua'aoina i ai nisi o mea fale ma masini e fa'aaoga mo le fa'avelaina o mea taumafa i umukuka i totonu o maota ma laoa, lea ua maea taua'ao i ai nei foa'i atoa ma mea'ai tu'u apa, lavalava ma isi sapalai.

 

O mea uma nei sa maua mai le foa'i mai a le atunu'u lautele, i tagata ta'ito'atasi, aiga, ae maise o pisinisi, faleoloa ma Kamupani i le atunu'u. Fa'afetai i lo outou sao lea ua mae'a taua'aoina nei mea uma, ina ia fa'afiafiaina nei aiga uma sa i ai le mana'omia.

 

"Itiiti pe tele, ae ua e foa'i ma le loto,” o se tasi lea o auau o le tautalaga a le Kovana Sili Lolo Moliga i lenei tausaga i le atunu'u.

 

O se mea sili ona lelei, ona o le Alofa Foa'i Fua o se poloketi o lo'o fa'atautaia mai e tupulaga talavou o le atunu'u, i latou ua mafai ona faigaluega, ma ua latou manatu e ao ina tutusa ona fa'afiafiaina uma le fanauiti ma latou aiga, e pei fo'i o i latou, i lenei vaitau fiafia o le tausaga.

 

I lea aso ma lona fa'amoemoe maualuga e fa'asoa atu i le 105 aiga na aga'i atu e talia le vala'au e saili ai ni mea o mana'omia i le Alofa Foa'i Fua, na ta'i 20-25 sui e aga'i i totonu i le vaega lona lua o i latou na maimoaina ma filifili i oloa sa folasia i luga o laulau i totonu o le Fale Laumei.

 

O le vaega muamua na aga'i i totonu o sui o Aiga na aofia i le Lisi ma'oti o i latou ua fa'amaonia e le Alofa Foa'i Fua ma le Pacific Global e matua sili ona mana'omia e i latou lenei foa'i.

 

E to'a 44 i latou na ofo mai o latou taimi, o tupulaga talavou uma fo'i, ina ia fesoasoani i le fa'amoemoe o lea aso, ma fa'agaoioia ai le galuega foa'i e o'o lava i fa'amaumauga.

 

E to'a 15 i latou na foa'i sa aofia fa'atasi ma le Alofa Foa'i Fua i lea fa'amoemoe, ma sa aofia ai ma le Tausala Lalelei o le Pasefika i lenei vasega o e na fesoasoani.

 

I le taimi nei o le Alofa Foa'i Fua o lo ua avea nei Patrick Ti'a Reid ma Peresetene, Sui Peresetene ai Aioletuna Sunia, ae failautusi ai le tama'ita'i o Jewel Tuiasosopo.

Comment Here