Ads by Google Ads by Google

30+ Aufaipese-polokalame o Pesepesega o le Kerisimasi


Le aufaipese a le Ekalesia Metotisi mai Pava’ia’i i le taimi o le latou fa’afiafiaga i Pesepesega o le Kerisimasi o lenei tausaga. [ata AF]
ausage@samoanews.com

E silia i le 30 aufaipese ua lautogia mo fa’afiafiaga i le polokalame lona 39 o Pesepesega o le Kerisimasi a le malo, lea na tatalaina i le po ana po i le Malaeoletalu i Fagatogo.

 

E pei ona fa’atulaga i le polokalame a le Komiti Fa’afoe o lo o latou fa’atautaia lenei fa’amoemoe, mai aufaipese e to’a 37 ua lautogia mo le polokalame o lenei tausaga, o le to’a 11 o ia aufaipese sa fa’afiafia i le po anapo ina ua tatala aloaia le polokalame, ae ta’i 13 aufaipese o le a fa’afiafia i le po lona lua ma le po fa’ai’u o le polokalame.

 

O le polokalame o Pesepesega o le Kerisimasi o lo o galulue fa’atasi ai le Ofisa o Tu ma Aganu’u a le malo faapea ai le Matagaluega o Autalavou, Tina ma Tamata’ita’i, i lalo o le fa’amalumaluga a afioga i Fa’atonusili o ia Matagaluega e lua a le malo, le tofa Paogofie Fiaigoa, o le faatonusili le tumau o le Ofisa o Tu ma Aganuu, ma Jonathan Fanene o le faatonusili o le Ofisa o Tupulaga Talavou.

 

O le sauniga lotu na tatala aloaia ai le polokalame i le po anapo na taitaia lea e le susuga Rev. Elder Kereti Faiai o le Ekalesia EFKAS mai Afono, ma viiga o le Atua na lagiina lava e le aufaipese a le Ekalesia a Afono.

 

O le fofoga o le polokalame o le tofa Fagafaga Daniel Langkilde, o ia lea o le Fa’atonusili o le Ofisa o Fa’asalalauga a le malo, o le tofa Paogofie na fa’afeiloaia le mamalu o le auvalaaulia, ae o le saunoaga autu o le po na saunoa i ai le afioga i le ali’i kovana, tofa Lolo Matalasi Moliga.

 

O le fa’aolaina o moli mo le laau kerisimasi na fa’atinoina lea e le faletua o le afioga i le ali’i kovana, le faletua ia Cynthia Moliga, ma sosoo ai loa ma le amataina o fa’afiafiaga mai aufaipese ua lautogia, lea na taitaia lava e le aufaipese a le Ekalesia EFKAS mai Afono.

 

Na taua e le tofa Paogofie i le Samoa News e fa’apea, o le agaga o lenei polokalame e pei ona fa’agasolo mai ai i le tele o tausaga ua mavae, ia mafai ai ona faia se sao o aufaipese a Ekalesia, autalavou ma faalapotopotoga e momoli mai ai le agaga o le kerisimasi i tausaga taitasi.

 

“O le agaga o le kerisimasi e pei ona fa’amanatuina ai e Samoa ma le lalolagi atoa, o le agaga o le ofo atu o meaalofa atoa ai ma le agaga o le fa’afetai, e fa’apena fo’i le autu o lenei polokalame o lo o faatinoina i tausaga ta’itasi”, o le saunoaga lea a Paogofie.

 

O le po o le aso Lua o le vaiaso nei, Tesema 20 ua fa’amoemoe e fa’amuta aloaia ai lenei polokalame, ma sauni atu ai loa le atunu’u i le fa’amanatuina o le Kerisimasi i le fa’aiuga o le vaiaso nei.