2 tausima'i Pasi Galulue Matagaluega Soifua Maloloina


O lo ua i ai nei sui Tausima'i Pasi e to'alua mai le Uniform Services University ma e galulue fua i le DOH mo le 3 vaiaso. O i la'ua nei o Major Douglas A. Taylor o le US Army ma LT Chrstopher Johnson o le US Navy. [ata: Leua Aiono Frost]

E to'alua ni ali'i Tausima'i Pasi na malaga mai e fa'aaoga le konekarate na sainia e Kovana Lolo M. Moliga ina ia autova'a mai ali'i ma tama'ita'i o lo'o a'o'oga i le Iunivesite a le US Armed Forces (Uniform Servies University) i Portland, Oregon, ina ia galulue ma fa'asoa mai so latou malamalama ua mae'a aotauina ai i latou i lea Iunivesite.

 

O nei sui e to'alua lo'o tautua i le Militeri, Major Douglas Taylor mai le USArmy, o lo'o a'oa'oina fa'apitoa i mataupu fa'atausima'i tau le mafaufau, (Phsychiatric Mental Clinic) ma ua agava'a o ia e va'aia gasegase tau le mafaufau i le teritori.

 

O lo'o sailia lona fa'ailoga Doctrate ma o se vaega lea o ana aoaoga e aga atu ina fa'au'u ma umia lona fa'ailoga lea. Ua sefulu ai lenei o tausaga talu mai ona tauto o ia i le US Army.

 

O Lieutenant Christopher Johnson, o se tasi mai le vaega a le US Navy ua aoaoina fa'apitoa i mataupu tau le soifua maloloina o Aiga, Family Care & Pediattric Care, ua fa'aaoga lona tomai e fefa'asoa'i ai i tausima'i iinei ina ia fa'alautele lona iloa i le soifuaga o tatou tagata ae maise o le tausiga o tagata lautele, lea o lo'o fa'atinoina nei e le Matagaluega o le Soifua Maloloina.

 

E tolu vaiaso lea ua o mai ai nei sui mo lea fa'amoemoe, peita'i ua fa'aalia e Taylor, "O lea ua ou mautinoa nei se aoga tele o le ma'ua filifiliga e o mai iinei, e fou le ma o'o mai ae o le aganu'u ma uiga o tagata Samoa ua matua fa'afiafiaina ai i ma'ua ma ua fia umiumi atu lava se taimi e faia ai le ma'ua galuega iinei, ae i ai se isi fo'i taimi e toe maua se avanoa, o le a toe taliu mai lava."

 

Ua fa'ailoa fo'i e Johnson, "O lo'o to'atele i matou o taumafai i o matou fa'ailoga i le Iunivesite lea a le Vaega Au, ona o lea ua mae'a tatala atu le avanoa e le Kovana Sili o Amerika Samoa e autova'a mai ai matou e fa'amae'a suesuega ma galulue e fa'ata'ita'i le tomai ua mae'a a'otauina ai, o se isi lea ala e mafai ona ma'ua fa'ailoa ai i nisi o matou saili le atamai fa'atasi, ia o mai i le tatou malo nei e tuli ai latou suesuega ma galuega fa'atino e agava'a ai i fa'ailoga o tausaili."

 

I le saunoaga a Lolo,  sa ia fa'afetaia ai le o'o mai o nei sui e fa'aaoga lea avanoa na sainia e ia ia Aperila 2016. "O le lua o'o mai o se mea aoga tele mo i matou i le teritori, o le a fa'aaogaina le atamai ua mae'a faofale ia te oulua e fa'asoa i o matou tagata faigaluega fa'atausima'i iinei, o le a si'itia ai fo'i le atamai mo i latou, ae o oulua fo'i latou, o le a lua iloa ai le matou aganu'u, ma fa'atusalia i ai matou gasegase o maua ai tagata, o togafitiga fo'i o fa'atautaia mo le soifua laulelei o le lautele o le atunu'u, ae maise e i ai lua lipoti tusitusia e mafai ona matou fa'aaogaina mo nisi fo’i mea e fia fa'amaonia ma fa'amauina e tusa o le soifua maloloina o matou tagata."

 

"Pe afai e te lua sauni e tu'umuli i le mae'a ai o le lua tolu vaiaso, e ao ina oulua toe fa'aavanoa se taimi, e te lua toe va'aia ai a'u i lenei Ofisa, ona i ai lea o se fesili ou te mana'omia ai sa oulua fa'asoa mai,” o se isi lea ona mana'oga sa ia fa'ailoa i nei sui i le taeao ananafi i lona Ofisa.

 

Foa'i e le NOAA $940,000 Coastal Zone Management

 

Fa'ailoa mai le agaga fa'afetai o le Faipule i Uosigitone Aumua Amata ina ua mautu le foa'i a le NOAA e ala i se alagatupe e $940,000 mo le puipuiga malu o le Apitagalu ma le Gataifale, ae maise ia tumau puna'oa o le gataifale o Amerika Samoa.

 

"Ou te fa'afetaia lenei faatupega ua toina mai e le National Oceanic & Atmospheric Administration e sapaia ai galuega puipuia lelei o le apitagalu o Amerika Samoa,” o sana fa'amatalaga lea. "E mautinoa le taua ona fa'atumau o le sosia o le gataifale o Amerika Samoa aua le lumana'i o le atunu'u.”

 

O lea alagatupe ua fa'auia mai i le Matagaluega o Fefa'atauaiga lea e mautu i ai le vaega o le Puipuiga o le Gataifale o Amerika Samoa po'o le National Coastal Zone Management.

 

Ua toina mai lea fa'atupega ina ia mautu ai le polokalama ua mae'a pasia e le NOAA e fa'atautaia e le Pulega o le Apigalu & Gataifale o Amerika Samoa lea fo'i o le a alo atu e fa'atino fa'alaua'itele. O lea polokalama e fa'apa'aga ai Amerika Samoa ma le Feterale ina ia fa'asao, toe faaleleia ma ia fa'atautaia galuega atina'e mo le lelei atili o le Apitagalu ma le Gataifale.

 

O lenei alagatupe ua toina mai e mafai ona fa'aaoga e matua ave'esea ai nisi o mea ua matauina e ono fa'aleagaina ai le gataifale ma le ola o meaola uma o ofaga ai, ia fa'atumau ai le lelei o le nofoaga mo i'a ma 'amu po'o le a'au, ae maise fo'i e fa'aaoga mo le saogalemu o le laueleele mai le sologa aga'i i le sami ma fa'apogaia ai nisi fa'aletonu o le gataifale.

 

Foa'i Hawaiian Air i le Hope House i Fatuoaiga

 

I le vaiaso na te'a sa faia ai le foa'i a le Hawaiian Airlines i le Hope House i Fatuoaiga ina ia fesoasoani ia i latou mo le fa'amanatuina o le 30 tausaga talu ona fa'atuina lea fo'i tautua ma le nofoaga ua tausia fa'apitoa ai gasegase ua tausi moega, ae maise o tama ma tina matutua, ma fanau ua fa'ataotolia i gasegase tumau tau le tino po'o le mafaufau.

 

O lo ua mae'a taua'aoina i le pulega o le Nofoaga o Fa'amoemoega le meaalofa e "2 Pepa Malaga ma toe taliu mai i le tatou Malo," ma le fa'amoemoe e fa'aaogaina mo le fa'amanatuina o le latou tausaga.

 

O le pule o le Hawaii Air i le latou Ofisa iinei Tuli Fruean ma Sia Passi -Burgos sa avea ma sui o lea Kamupani e fa'ao'o atu lea meaalofa taua.

 

Na avatu fa'atasi lea meaalofa ma pusa lavalava na foa'i mai e le Pulega o le Hawaiian Air Honolulu, ma sa fa'auia mai e le susuga le Sui Peresetene o le Goodwill ina ia avea ma se fa'amomoli mo le Hope House ma o lo'o tausia fa'apitoa ai.

 

O le susuga le sui o le Komiti Fa'afoe o le Hope House Ta'afano Joe Tavale sa avea ma sui mamalu o le Hope House e taliaina aloa'ia lenei foa'i taua lava mo le fa'amanatuga o le latou 30 tausaga.

Comment Here