Ads by Google Ads by Google

2 siamupini - Laumua o Tumua liki volipolo fu’a 2017


O se vaaiga i le ‘au a tama matutua mai le Laumua o Tumua, sa masi’i mai mo le Liki Volley Ball Fa’avaomalo mo le tatou sisigafu’a 2017, ua toe taliu atu nei ma le siamupini ae o lo’o malo fo’i le latou ‘au a tama U19, i le latou fo’i Liki 2017. E lua lelei Ipu o lo’o malaga ma lea ‘aumalaga i Samoa. [ata: Leua Aiono Frost]

I le ta’amilosaga volipolo Fa’avaomalo sa fa’atautaia mo le Sisigafu’a 2017, lea na fa’ato’a amatalia i le aso To’ona’i Aperila 15, o le vaiaso o le sisigafu’a ma fa’asolo mai ai ma mae’a ia Aperila 22, 2017 ua mae’a nei ma ua fa’afetaia lenei tausaga i le tele o ‘au na masi’i mai fafo, e aofia ai Samoa Tuto’atasi, Seattle Uosigitone, Honolulu Hawaii, na fili fa’atasi ma ‘au fa’alotoifale sa mafai ona tauva i lenei tausaga.

 

“O lenei tausaga, e le’i faigofie i a tatou ‘au volley ball iinei, ua malolosi lava ‘au mai fafo na masi’i mai, ma o le a tou va’aia lava i le fa’aiuga o ta’aloga o lenei liki i ‘au manualo le moni o lenei fa’amatalaga. Peita’i, o le mea tonu lava lea o lo’o mo’omia tele e i tatou i a tatou ‘au fa’alotoifale i lenei fa’agatama, e tatau ona matua fili i le fai i latou e tatau ona manumalo. Fa’afetai tele ai le agaga, ona o le tele fo’i o ‘au na masi’i mai fafo mo lenei fa’amoemoe i lenei tausaga. Ia tutumau ai pea le tatou taumafai e aumaia ‘au mai fafo e fa’aleleia atili ai tatou tomai i le ta’aloga,” O se saunoaga lea a le susuga le failautusi o le Asosi Volipolo a Amerika Samoa, Jose Afu Muasau.

 

Mai le liki atoa sa fa’atautaia na maua mai le i’uga ina ua mae’a ta’aloga fita ia Aperila 22, ua tula’i mai le ‘au masi’i mai Samoa, “Laumua o Tumua” i le siamupini o le Alii matutua ma ua latou si’ia fo’i le Ipu o le Siamupini i Samoa. Tulaga lua po’o le ‘au sa latou saili siamupini o le Au Volley Ball masi’i mai Hawaii. O le sui ua avea nei ma Tama Ta’alo Lelei i le Liki atoa ua maua lea e le alii o Nonu mai le Laumua o Tumua.

 

E valu ‘au sa tauivi mai i lea pool e 2 ‘au a le Laumua na masi’i mai, Stars, Alisi, Ranger, Asomua e 2 fo’i ‘au ma le Mikasa.

 

I le vaega o ‘au Volley Ball a le 19 tausaga & Under ua sola fo’i le ‘au a le Laumua o Tumua ma le Ipu i Samoa o le U19. O le ‘au sa latou ivi mo lea ipu ua tulaga lua i lenei tausaga  o tama o le taulaga - Laumuatasi mai Pago Pago.

 

O le tama ta’alo lelei mo lea vaega i le U19 o le susuga Sam Tagiilima Lavi mai le Laumua o Tumua.

 

I le vaega a le Queens ua sola ma le ‘au a le Seattle Divas mai Washington State le mea atoa, le latou talita ma le fa’ailoga. O le ‘au tulaga lua o le “Tuila Girls” ma o se ‘au fou ua fa’aulu mai i lenei tausaga. A’o tama’ita’i Samoa lava o le laueleele. O le Kuini ta’alo lelei i lenei liki ua manumalo ai Victoria Karina Hunt mai Seattle.

 

O le vaega a tamaita’i na tauva ai ‘au a tama’ita’i mai Seattle, Hawaii ma Amerika Samoa, ua matua’i ese ai le va’aiga i le tula’i mai mai Honolulu, Hawaii, ua sola i latou ma le talita faapea faailoga uma na atofa mo se ‘au siampini a tama’ita’i i lenei tausaga. O le ‘au na latou fetaui e saili le siamupini ma ua latou maua le tulaga lua o le ‘au malosi mai le Tualauta, Pavaiai Youth Girls.

 

O le sui ta’alo lelei ua fa’amautu mai i ‘au a tama’ita’i i lenei tausaga o le tama’ita’i tu’i lelei o Rachelle Sua’ava mai Honolulu.

 

Ua fa’ailoa mai le agaga fiafia ma le fa’afetai tele o le Laulauafono a le Komiti o lea liki ma o i latou fo’i o lo’o fa’atautaia le Asosi Volleyball a Amerika Samoa, ona o le galulue fa’atasi o ‘au uma sa auai i lenei liki ma le latou fo’i komiti o ta’aloga i lenei tausaga.

 

“Matua matagofie lava le fa’agasologa o lenei liki, ae ua matua manaia atili fo’i ona ua tele ‘au filogia mai fafo ma nisi o ‘au fou ua mafai ona fa’aulu mai e fia tauva mo le siamupini i vaega ta’itasi o lenei liki. Ua talosaga atu ina ia toe auai mai fo’i i le isi liki volley ball i le tausaga fou, ina ia una’i malosi taumafaiga a alo o le atunu’u i lea fo’i fa’agatama.”

 

Ua amatalia fo’i ona faia koleniga fa’apitoa mo le masina o Iuni 2017, lea e auai atu ai fo’i nisi o tatou ‘au mo Samoa i le Tutoatasi.

 

Ua fa’ailoa mai e Muasau, “O lenei le ta’aloga e tatau lava ona maua ai pine a le tatou malo, ae sili ona fa’afetai, o lea ua amata ona fua mai galuega ua loa o taumafaia pea, ia matua filiga fanau i lenei faagatama tama aua o le fiafia ia i ai o tatou fanau talavou.”