Ads by Google Ads by Google

14 faiaoga agava’a mo aoaoga i potu a’oga


O se vaaiga i le to’a 14 o sui faia’oga ua umia tusi pasi o latou a’oa’oga fa’apitoa mo le fanau a’oga i totonu o potu aoga a le malo. [ata: Leua Aiono Frost]

O le aso Tofi ua te’a na fa’ai’u ai le tapenaga o faia’oga e to’a 14, i a latou a’oga fa’apitoa, o tulafono e ao ina mataituina i totonu o potu a’oga i taimi a’o fa’atautaia vasega e i latou mo le fanau a’oga; o nisi o mea taua e ao ona tima’ia ai i latou e tusa o latou matafaioi e tatau ona fa’ataunu’u i aso taitasi i le a’oa’oga o fanau, ae maise o lona toe tali atu i le Matagaluega e tusa o lona vala’auina, o se faiaoga i le potu a’oga.

 

E tele vala o a’oa’oga nei, e ta’i tolu aso fa’apitoa e ao ina auai ai le faia’oga mo nei a’oa’oga fa’apitoa, ona fa’ato’a taua’aoina lea ia i latou o tusi pasi, e avea o se faia’oga i le potu a’oga i aoga a le malo.

 

O nisi o nei a’oga fa’apitoa mo faia’oga, e mafai ai fo’i ona fesili pe fetufa’i le faiaoga ma le vaega a le OCI ma le Teacher Quality a le Matagaluega o A’oga, lea ua nafa ma lea tulaga.

 

Sa fa’ailoa ia i latou, e le tatau ona faia ni a latou meaa’oga i totonu o le potu a’oga, ae ia latou mataituina le agatonu o le fanau ia a’oa’oina lelei. “Ua to’atele i tatou ua saillia fa’ailoga maualuluga, ma e tele fo’i tou meaa’oga o lo’o mana’omia ona faia mo fa’ailoga, peita’i o le taimi o le vasega, e le o sou taimi e faia ai au meaa’oga, ae o le taimi mo le fanau a’oga ia a’oa’o lelei i a latou mataupu o tau’avea e oe le faia’oga. Aua ne’i e sasi i lena itu, aua ua fa’amalosia fo’i le asiasiga atu a le Pule A’oga po’o le sui pule i lou potu ina ia fa’amauina fo’i au galuega.”

 

E amata mai lava i le fa’ataotoga o le vasega a le faia’oga i aso ta’itasi, sa fa’apupula atili le aoga o lea ulua’i sitepu i le fa’atulagaga o lou aso atoa i le potu a’oga.

 

Na fa’amanino i le vasega o faiaoga le vaega o le tulafono ua fa’amamafaina ai, le a’oa’oina o le fanau i le potu a’oga, ia le sasi ai fo’i lana fa’atinoga o latou tiute. Peita’i, i le aotelega o mea uma na toe fa’amanatu i le vasega, sa toe fa’apea ai le tama’ita’i o Diana Ameperosa, “Ae ua tatou iloa patino lava, o le fua va’aia o tatou fanau a’oga e iloga ai lau galuega sa fa’atinoina i le tausaga a’oga, o le a fua mai lea i le fanau a’oga. O latou togi ua fa’ailoa ai lo latou malamalama lelei, o le aotelega o le latou atamai e faitau ma le malamalama lelei i tusi ua talafeagai ma latou vasega ua oo i ai, o mea na e iloa ai, a tatou galuega fa’afaia’oga.”

 

“E ui ina e tigaina tele lea faiva, ae a atamamai alo o le atunu’u, ua mafaia e le vasega uma o faia’oga ona si’i le alafua e fa’atautaia ai le tatou malo, aua e to’atele lava faia’oga, e tofu fo’i le to’atele ma fa’ailoga maualuluga, ae a le mafai ona malamalama le fanau i le a’oa’oga o e fa’atinoa, e le o se sasi a le tamaititi la lea itu, a’o oe le faia’oga,” o se tima’i lea a Elia Savall, sa ia fa’asoa atu i le vasega o faia’oga.

 

E ese mai le tiute ma aia tatau, ua i ai fo’i nai fa’amama avega ua fa’atulaga e lea vaega o le matagaluega o a’oga ua latou ofoina atu ina ia fa’afiafiaina le agaga o le faia’oga, ma atili ai ona fiafia e fa’atautaia ona tiute fa’afaia’oga i le potu a’oga. O ia mea, ua mafai ona fa’atauva ai i latou ina ia avea ma “Faia’oga o le Tausaga.”

 

O i latou ua taua’aoina tusi pasi i le vasega o faia’oga e aofia ai: Sopi, Tautinei; Lemautu, Tafifua; Vaimasanuu, Sesilia; Folau, Fa’auifono; Samuelu, Gary; Ipuniu, Vaeleti; Savali, Athena; Lang, Tufanua; Tufuga, Aolele; Mahuka, Pemerika; Pati, Tosia; Isaako, Derek, Imo, Johnny; Fonotia, Ropeta.

 

O lo’o i ai nisi o faia’oga o lo’o fa’aauau seia mae’a lelei latou a’oa’oga mo aso e tolu, ona fa’ato’a taua’aoina lea o latou tusi pasi, ae o lenei vaega ua mae’a avea i latou ma faia’oga i le taimi nei aua o lea ua atoatoa latou a’oa’oga fa’apitoa nei.