E to’a 119 i latou o Toa o le Vasa sa fa’au’uina i le aso ananafi mai Fagaitua High. E to’alua sui o le vasega fa’aiuaso sa le auai, ae to’atasi ua folau i lagima, le susuga Taupule Talosaga, na maliu ae ua mae’a pasia togi mo lona fa’ailoga, ma sa taua’aoina uma ona fa’ailoga ma tusi pasi e si ona tina. O le tasi o le tama’ita’i fa’au’u, ua fa’ailoa mai, ua mae’a malaga atu o ia i fafo, ae o le a fa’ao’o atu ia te ia lona tusi pasi ma fa’ailoga e lona aiga.

O le sauniga sa matagofie ona vi’iga sa saunia e le vasega fa’aiuaso, ae o le tatalo amata ma toe fa’ai’u ai le polokalama fa’asolo na si’itia fa’apitoa lea e le susuga le Feagaiga Rev Suli Faiilagi. Na tula’i fo’i le susuga le ali’i pule aoga Suaese Ta’ase mo lana lauga fa’afeiloa’ia i le mamalu o le au valaaulia e aofia ai Kovana Sili, Lolo Moliga, Sui Kovana Lemanu Peleti Mauga, Fa’atonusili o A’oga Dr. Ruth Matagi-Tofiga, ma le afioga le Faipule i le Konekeresi Aumua Amata.

O le fofoga fa’apitoa o le aso, na lafo lea i le kovana sili ma sa ia tima’i i le fanau fa’au’u 2017, “Ia outou o atu ma pulea mea uma! O le manulauti tonu lea fa’asino i Toa o le Vasa! O tagata folau o tagata saili malo, o tagala e naunau ina ia latou pulea mea uma e tulaueleele atu i ai! Lea ua tu’u atu outou tou te o, ua maea fa’aauupegaina outou mo outou faiva, ua uma le galuega tapena a faia’oga ma ua ia te outou le agava’a e sailimalo ai.”

Sa ia toe fa’amanatu i le fanau fa’au’u, “Ia mautu le fa’avae na tapena ia te oe le Toa o le Vasa, ia gafatia ona fa’ataututu ma lu’iga o lo’o aga mai i le lumana’i, aua a le mautu le fa’avae lea ia te oe, ua vave ona tineia i mea faigata o lo’o fa’aolioli mai.”

Lona lua o mea sa fautuaina ai, “Ia talitonu ia te oe ua e mafaia mea uma e ono o’o mai i le lumana’i, ona e taumafai ai lea ma fa’asaga e saili le lumana’i manuia.”

Peita’i sa ia toe fa’ailo le vaivaiga i matua i nei vaitau, “Ua matele fo’i tatou matua, ua le matua fai o tatou faiva o le fa’amausali atoatoa o le fa’avae mo fanau ina ia mausali ao le’i tu’u atu i latou e o, ua matele i tatou ina fa’avaivai ma fa’amatuu e fai le mea e fa’amalie ai loto o le fanau, a o’o ina lutia lo latou sa i fita o le olaga, ona le gafatia lea e le fanau ona fa’ataututu nei fa’afitauli, a’o le fa’apogai, o i tatou matua ua le a’oa’oina i latou ia mautu le fa’avae o latou olaga.”

“Aoao le tama ia tusa ma ona ala, pe a oo ina matua, e le toe te’a ese ai o ia!” Matua o le tatou faiva lava lena!

Mo le fanau fa’au’u, sa ia fa’ailoa mai, “Ua mae’a fausia lou fa’avae mautu, oe le tama ma le teine fa’au’u. O atu la’ia ma pulea le lumana’i. Ae tau ina manatua, o le umi ona e tausaili mea uma, o le tele fo’i lea o manuia e te maua. Pu’upu’u lau folauga tausaili, e laiti fo’i manuia e te maua. Ia e moemiti i miti u’umi ma le fiagata, o le tetele fo’i na o manuia e te maua ai.”

O le toe fa’atonuga lenei mo le Toa o le Vasa, “Aua ne’i e alu e taumafai se mea itiiti e vave ona e maua, ae taumafai mo le mea sili ona faigata, e sili fo’i ona manuia e te maua ai.”

Na taua’oina fa’ailoga ma sa tolaulauina fo’i i latou ua fa’au’u ma togi maualuluga e to’a tolu i latou na fa’asalalauina ua maua le tulaga lua i le tu’ufa’atasiga o togi i mataupu uma sa tau’avea i le a’oga i lenei tausaga. O i latou nei o Tedy Barber mai Alofau i lana GPA 3.99, Faga’alu ma Tula; O’Riley Le’au mai Aua ma Leone ma Gingerlei Va’a mai Tula.

Peita’i o le togisilia o le tama’ita’i lea o Tamara Makalio mai Utusi’a i Fagaitua ma Aua. O lona GPA e 4.0, SAT 1050, ma ua tele fo’i ana sikolasipi ua ofoina mai fafo, peita’i, ua fa’ailoa e ia, o le a nofo e aoga i le isi lua tausaga i le ASCC. E ui ina o ia lea sa mauaina le isi fa’ailoga fa’asikolasipi i aoga i fafo a le malo, ae o lea ua fa’afofogaina lea tulaga e le sui mamalu o le Komiti Fa’afoe a Sikolasipi a le Malo, Faiivae A. Godinet.

Toatele isi fanau fa’aiuaso sa maua fo’i avanoa mo a’oa’oga i fafo, ma ua latou naunau ina ia fa’aauau ai iina latou aoga i le tausaga a’oga fou. Avanoa fa’asikolasipi ua maua mai fa’alapotopotoga ma kamupani i Amerika Samoa, maua ai e le tama o O’Riley Le’au le sikolasipi mai le Viking’s Alumni. Mai le McDonald’s American Samoa ua maua ai e Jemima Nafatali,  Rosanly Talosaga ma O’Riley Le’au. Sikolasipi mai le Matagaluega o le Soifua Maloloina ua mauaina lea e Tedy Barber ma le sikolasipi a le Blue Sky Communications ua maua lea e Tedy Barber.

O le to’asefulu ole fanau e maualuluga togi i le vasega fa’ai’uaso ua lisia mai: Tamara Makalio, O’Riley Le’au, Gingerlei Va’a, Tedy Barber, Rosanly Taulaga, Raemos Fano, Jemima Nafatali, Zachary Falesoani, Rita Jennings ma Satauroolealofa Pulu.

Fa’ailoga fa’apitoa sa taua’aoina mo sui o le vasega fa’au’u ua agava’a ai:  Tammy Malae Fa’ailoga mo le Igilisi Maualuga: Jemima Nafatali. Army Recruiting Office Award maua lea e Rita Jennings ma Maurice Lotovale. Inspirational Award na mauaina lea e Tedy Barber. Citizenship Award na maua lea e August Tipeni Isaia. Leadership Award na maua lea e Bluesman Ta’ala. Student Athlete mo lenei tausaga na maua lea e Raemos Fano mo alii a’o le tama’ita’i o Agape Mafua mo tama’ita’i.

O le fa’ailoga mai le Methodist Congregation ua mauaina lea e Liliah Apelu