O le aso Faraile ua te’a i le faleta'alo o le Kolisi Tu'ufa'atasi sa fa'ataunu'u ai le fa'au'uga lona 67 o le vasega fa'aiuaso afa mulimuli o le tausaga 2017. Sa auai i le sauniga matua ma aiga o le au fa'au'u, sui o le malo fa’atasi ai ma le Kovana Sili Lolo Matalasi Moliga, fa'apea le Komiti Fa'afoe a le kolisi.

E to'a 103 i latou na fa'au'u ma fa'ailoga Associates of Arts, Associates of Science ma fa'ailoga Bachelors of Education - Elementary Education. Peita'i, e i ai le isi to'a lima o e na fa'au'u ma tusi pasi maualuluga o Masters mai Iunivesite i fafo, ae sa fa'aaogaina lea fa'au'uga e savavali ai ma talia o latou fa'ailoga.

Na saunoa fa'amalosi'au le tama'ita'i Peresetene o le Kolisi. Dr. Rosevonne Makaiwi Pato i le fanau, "O le aso lenei o lau ulua'i la'asaga i le lalolagi tele o lo'o fa'atali mai mo oe. Ia e matua fuli e fai lou faiva ia e manumalo. Fa'ailoa i ai, ua leva ona tapena oe e lou aiga, o lau ekalesia ma lau a'oga, ina ia e ola ma agava'a uma o le tagata ua mafai ona tuto'atasi e tapena lona lalolagi.”

O le sao o le afioga le Kovana Sili na soso'o ai, lea sa ia toe fa'ailoa i le au fa’au’u. "O i tatou o tagata Samoa, ia e mua'i iloa lena mea, a'o le'i e taumafai e saili lou tusi pasi maualuga lena e te fa'anaunau i ai.”

"Ou te tima'i atu ia te outou ao outou alofaiva i o outou lumana’i, ia muamua e iloa ona puipui lou ola, sapai lau tu ma agaifanua, puipui lau gagana aua o lou tofi ma teuteu lo'u siosiomaga e fa'amemeo ai i le lalolagi atoa,” o sana lea tima'i.

Sa ia toe fa'atepa le vasega fa'au'u i le taua o le tutumau i ana agaifanua, "E te tiu ai o oe o le Samoa, taofiofi i ou eleele ma au aia tatau i lou nu'u na e fanau mai ai! Va'ai i tatou e fai ma va'aiga le setete o Hawaii, lea ua amata ona avea tagatanuu o Hawaii ma tagata maumau solo ua leai se fa'asinomaga i totonu lava o lona atunu'u. Aisea? Ua mao tu'ulima lo latou tofi i le eleele ma a latou agaifanua."

I ana toe upu sa ia fa'apea ai, "Outou o le a o atu i fafo, fa'amuamua mai o oe o le Samoa ae fa'amulimuli ane i lou avea ma se foma'i e te toe fo'i mai e tautua ai nai ou aiga, ma lou malo ma e aoga ai i lau ekalesia."

O le sao o le ali'i fofoga fa'aptoa mo le fanau fa'au'u, William Ena Spitzenberg, sa ia fafagu mai le agaga moni o tama fanau a Amerika Samoa ua toe taliu mai, ina ia fai sona sao mo ona tagata. "E mafai ona e ave'esea le tama mai lona nu'u, ae le mafai ona e ave'esea le nu'u mai le tama!” - o lana muagagana lea na amata ai ona manatu fa'aalia mo le vasega fa'aiuaso.

“O le aso lenei, ua fa'asinotonu i se isi la'asaga o le tou olaga taumafai ua mae'a ona faia, ma ua ausia lea fo'i matati'a, peita'i, e le tatau ai ia te outou ona tou fa'atalitali manuia, ae toe taumafai atili mo nisi la'asaga maualuluga e sili atu lona taui nai lo se manu ua aeae i lenei aso!"

"Ia aoga sa'u fa'asoa mo outou le au fa'au'u i lenei aso, aua afai ou te tepa i le amataga o lo'u olaga, e le o eseese lava i tatou. O nai matua, sa le mae'a ni a'oa'oga maualuluga e pei ona tatou i ai nei. Peita'i, o le la'ua naunauta'i ina ia suia le fua ou te ola ai, ia lelei a'u a'oa'oga ina ia si'itia ai sa'u taumafaiga nai lo le mea sa la'ua taumafai mai ai. O i la'ua lava na mautu ai lo'u iloa, o le ki o le ola fa'amanuiaina i lenei olaga fa'aletino, o le atamai!"

"Soso'o ane ai, e tatau muamua ona ou ausia togi maualuluga, ia fa'amautu ai lo'u gafatia ona maua avanoa e totogia ai e le Malo o'u pili i a'oga maualuluga, aua e le taitai ona au i ai le fa'asoa tau le tamaoaiga i nai o'u matua."

"Sa ou va'aia le usu po o nai o'u matua e tusa o le 2:00 i le vaveao e faigaluega, ina ia mafai ona fa'aa'oga i matou uma. O a'u fo'i na muaimalae e malaga i fafo e a'oga i le avanoa fa'asikolasipi a le Malo, ae to'aono lea e fa'atupe atu pea. E pau lava lea o se mafaufauga na mafai ai ona tu i luga i le tau malulu ma taumafai e alu e su'e le su'ega, e le'i faigofie le tauiviga a matua ma galuega fita, le tau fa'asoasoa o le tupe ina ia tofusia le fanau ma maua le a'oa'oga e mo'omia e ola lelei ai i le lumana'i."

"Aisea ua ou fa'ailoa atu ai nei mea uma? Ina ia fesoasoani i lau fa'ai'uga faia pe a e lutia i au a'oa'oga i fafo, tautuana sa mua'i uia fo'i lena ala, ma o au fa'aiuga e mafai ai ona tonu lou ala ma to'ai taunu'u ai i le taunu'uga o fa'anaunau i ai nai ou matua, lou aiga, ae maise lava o oe!"

E tolu ni filifiliga sa ia fa'ailoa e ao ina fesoasoani ai i le vasega fa'au'u.

"Muamua - Filifili i le taimi nei i se mea e te mana'o e fai, ona e tumau ai lea i lau sailiga lena! Pe afai e te tausaili, fa'aaoga atoa au taleni ua mae'a foaia e le Atua ia te oe, e i ai isi mea e fa'aopoopo e le Atua ia te oe, ona o lou tausaili ma le naunauta'i ia a'emalo ou faiva!"

"Aua e te tutumau i le mea e tasi, e tele taleni ua mae'a fa'ao'aina ai oe e le Atua. Fa'aaoga uma avanoa ma taleni ua e agava'a ai, ma tausinio ia ausia ma mae'a au taumafaiga uma."

"O le vave ona e ausia o au sini o e tausailia, o lou maua lea o le fesoasoani a nisi o lo ua mae'a ona latou ausia sini lea e te naunau e te fia maua. Saili i latou na, ona fa'afaigofie atili lea o lau sailiga, ma o le a pu'upu'u fo'i le taimi e te fa'aalua i au sailiga,” o se tasi lea o ana fautuaga.

"Filifili i le taimi nei ma aua lava ne'i e fa'atalatu'u i lau sailiga, fa'amuamua lau sailiga,” o a Spitzenberg lea. "Po'o le a lava lau filifiliga e ao ina faia, ia faia ma lou fa'amaoni, ma lou naunau ia mae'a lelei! E ese o tatou lagona, e eseese fo'i faiva, ma e tali le Atua i o tatou mana'oga uma.”

O le filifiliga lona tolu na tomuli i ai lana tautalaga matagofie, "Ia e Fa'amuamua le Atua i mea uma! O le mea sili fo'i lea ona taua, e leai se mea e te mafaia pe afai e le toina mai e le Atua ia te oe le manuia o le malosi ma le ola i aso ta'itasi i lau savaliga. O lou olaga o se polomisi, e ao ina e fa'atumuina lou olaga i mea lelei!"

Sa ia si'itia mai le mau Fa'ataoto 3:5-6, “Ia e fa'atuatua i lou Atua, ae aua e te fa'alagolago i lou lava atamai. Ia e manatua o ia i ou ala uma...."

"Ia e fa'amuamua le Atua i mea uma, ona faia lea e ia o mea uma e mana'o i ai lou loto. Talia ma le fiafia fua ua maua i au taumafaiga uma, ia va'ai i le olaga o se lu'iga ia e manumalo, nai lo se mea ua le mafai ona e faia i ai se suiga. Manatua e i ai le mafuaga na tu'uina ai i tatou e le Atua i lenei lalolagi tatou te ola ai. Ia e faia se suiga lelei."

"Aua le fa'ameo i mea uma, ae filifili ia faia se suiga lelei i mea uma e te silafia e ao ina suia ia lelei. Alofa i se tasi a'o e faimalaga, e mautinoa e alofagia oe e le Atua i taimi faigata ma le le mautonu. O mea e le mafaia e i tatou, e mafaia ona o le Atua!"

O le afioga Senatoa Faiivae Alexander Godinet, taitaifono o le Komiti Fa'afoe o A'oaoga Maualuluga sa ia tolaulauina suafa o le au fa’au’u ua maua sikolasipi a le Malo i le latou sailiga o fa'ailoga maualuluga i Iunivesite i fafo.