Ads by Google Ads by Google

A’oa’i Sui Fofoga Fetalai ia Fatulegae’e e tausisi tulafono a le maota

 Le afioga i le ali’i faipule ia Fatulegae’e Palepoi Mauga  [ata AF]
ausage@samoanews.com

“...aua ne’i toe tula’i mai le fa’aletonu lea ua tula’i mai i le aso lenei (aso ananafi), o lea ua ova ma le afa itula o fa’atalitali afioga i faipule i molimau a le malo, a o lea ua manino le mata o le vai o oe lea na e alu ma fa’afeso’ota’i molimau, ae le o sau galuega lena, o le matafaioi lena a le Failautusi a le maota, o ia e faia le feso’otaiga i le ofisa o le Kovana, e talosagaina ai molimau ina ia oo mai mo iloiloga a le komiti, o le fautuaga, ia e tausisi i tulafono a le maota”, o le saunoaga tu’u sa’o lea a le afioga i le sui fofoga fetalai i le afioga ia Fatulegae’e Palepoi Mauga, ina ua le taunu’u le iloiloga sa fa’atulaga e faia i le taeao ananafi.

 

O le itula e 11:00 i le taeao ananafi na fa’atulaga e faia ai le iloiloga a le Komiti o le Sailiga o le Tamaoaiga o le malo a le maota o sui, e fesiligia ai le tulafono taufa’aofi a le maota o sui “HB 34-30” sa talosagaina e le faigamalo, e fa’ataga ai sui o le Ofisa o Tiute e saili ma siaki uma soo se va’a, va’alele ma tagata e ulufale mai i le teritori, e fa’aaoga ai masini fa’ata (scanner) e siaki ai soo se ituaiga uta e ulufale mai i le atunu’u.

 

Ina ua silia i le 35 minute e te’a ai le taimi sa fa’atulagaina mo le iloiloga, ae o lo o fa’atalitali pea afioga i faipule mo le taunu’u ane o molimau, na fesiligia ai loa e le sui fofoga fetalai ia Fetu Fetui Jr le afioga a Fatulegae’e, pe sa maua sa latou feso’ota’iga ma molimau a le malo, pe ua i ai se mafua’aga ua ala ai ona tuai atu i le iloiloga, o lea ua silia i le afa itula o fa’atalitali afioga i faipule, ae na tali Fatulegae’e, ua mae’a ona ave i ai le “avea’i” mo le iloiiloga, ae ua le iloa le mafua’aga ua tuai mai ai.

 

O le taimi lea na talosaga ai loa Fatulegae’e i le komiti, mo se avanoa e fa’aagafua ai tulafono a le maota o sui, ae fa’aauau pea le iloiloga e aunoa ma ni molimau, ina ia mafai ai ona fai se fa’aiuga ae ripoti loa le pili mo lona pasiaina mo galuega a le maota i le aso e sosoo ai, peita’i sa teena e le sui fofoga fetalai.

 

“E le talafeagai le talosaga a lau afioga i le ta’ita’i komiti, e tatau lava ona i ai molimau a le malo mo le iloiloga lenei, e mafai ona faia le tulaga lena pe afai o se i’ugafono, ae afai loa o se pili, e mana’omia le i ai o molimau i le iloiloga e pei ona manino i tulafono a le maota, o le mea lena e tatau ona malamalama i ai lau afioga i le ta’ita’i komiti”, o le saunoaga lea a Fetui Jr.

 

Na fa’ailoa e Fatulegae’e i luma o le komiti e fa’apea, o ia na alu e fa’afeso’ota’i molimau a le malo mo le iloiloga lenei, lea fo’i sa latou fa’amaonia ane ia te ia, o le a latou oo mai i le taimi o le iloiloga.

 

Na fa’aalia finagalo le fiafia o ni isi o afioga i faipule, i le fa’aletonu o feso’otaiga ma molimau a le malo, lea ua mafua ai ona tuai atu molimau, peita’i na fa’aalia e le Loia a le Fono ia Nathaniel Savali i luma o le komiti e fa’apea, ua taunu’u mai se fa’aaliga mai le ofisa o le ali’i kovana, e fa’ailoa mai ai le le avanoa o molimau sa fuafua e oo mai i le iloiloga, ona o lo o i ai i latou i se fonotaga fa’afuase’i i le ofisa o le ali’i kovana.

 

Na fa’aalia e le afioga a Maugaoali’i Leapai Tusipa Anoa’i lona fa’anoanoa tele i le tulaga ua tula’i mai, o le pule mai lea i tua o galuega a le maota ua leva ona fa’atulaga, ae na fa’alalolalo ia Fatulegae’e ma fa’amalulu i le komiti e tusa ai o lea fa’aletonu.

 

I le fa’aiuga o felafolafoaiga a le komiti, na pasia ai loa le mau ina ia toe tolopo le iloiloga e fa’ataunu’uina i le itula e 1:00 i le aoauli lava ananafi.

 

Sa fautuaina e Fetui Jr ia Fatulegae’e ina ia mulimulita’i i tulafono a le maota o lo o fa’afoe ai ana galuega fa’atino, i le mae’a ai lea ona lafo e Fatulegae’e o le fa’aletonu i luga o le Ofisa o le Failautusi a le maota o sui, o i latou ua mafua ai ona fa’aletonu feso’otaiga ma molimau, ua mafua ai ona le oo mai molimau i le iloiloga.

 

“Taofi lau tala lena aua ne’i toe faia i luma o le maota e le fetaui, e leai se mea e te faitioina ai fua le ofisa i le fa’aletonu ua tula’i mai, ua mafua ona tula’i mai le fa’aletonu ona o le sese o le auala sa e uia, o le mea moni lava, e tatau ona e usitaia tulafono e fa’afeso’ota’i ai molimau mo iloiloga a le maota”, o le saunoaga lea a Fetui Jr.