Ads by Google Ads by Google

To’atolu molia fa’aaoga fa’asolitulafono pepa ‘ai mai Food Stamp


[ata: SN]
ausage@samoanews.com

E to’atolu i latou ua taofia ma molia e le malo i moliaga mamafa eseese, e mafua mai i le mataupu e pei ona fa’aaoga fa’asolitulafono ai pepa ‘ai mai le polokalame o le Food Stamp a le Matagaluega o Auaunaga ma Tautua Eseese (DHSS).

 

O i latou e to’atolu e aofia ai tagata faigaluega a le DHSS, o le ali’i o Vincent Toeava ma le tama’ita’i o Jane Vasa, fa’apea ai ma le ali’i faipisinisi Asia ia Liren Zhang poo Kevin fo’i e pei ona iloa ai o ia e le to’atele.

 

E $10,000 le tupe lea ua faatulaga e le ali’i Fa’amasino ia Fiti Sunia e totogi ona faatoa mafai lea ona tatala i tua Vasa, ae o Toeava ma Zhang e ta’i $450,000 lea ua fa’atulaga e tatala ai i laua i tua.

 

O le mataupu lenei na tofu atu i le Ofisa o Leoleo, ina ua maitauina e le Sui Faatonusili o le DHSS se suiga fa’afuase’i i le tulaga o tupe o loo totogi atu i le polokalame o le Food Stamp, e tusa ai i pepa ‘ai ua mae’a ona tufatufa atu i tagata, i masina fa’ai’u e tolu o le tausaga na te’a nei, pe a fa’atusatusa i le aofa’i o le tupe e masani ona totogi atu i le tele o masina o le tausaga.

 

O le pulega a le Faletupe o le ANZ Bank sa latou faailoaina i le DHSS le tulaga mata’utia e pei ona maitauina, i le mae’a ai lea ona totogi atu e le Faletupe i pisinisi o lo o latou taliaina pepa ‘ai mai le Food Stamp le vaega tupe e tusa ma le $667,555 mai le masina o Oketopa e oo mai ia Tesema o le tausaga na te’a nei.

 

I le taulimaina ai e le DHSS o le ripoti mai le Faletupe, na logoina ai loa le Fa’atonusili o le Matagaluega i le aso 4 Ianuari 2018. O le taeao o le aso 11 Ianuari na tauaao aloaia atu ai loa e le Komesina o Leoleo le suesueina o lenei mataupu i le ali’i Leoleo ia Capt. Pierre R.G Clements, o ia lea o lo o fa’auluulu i ai le Ofisa o Suesuega Lotoifale a le Ofisa o Leoleo (Internal Affairs Section).

 

I suesuega sa fa’atautaia e le ali’i Leoleo na mafai ai ona maua le tulaga lea, e tolu lava Faleoloa sa latou tuuina atu pepa ‘ai uma nei o lo o masalomia le faia i ai o gaioiga fa’asolitulafono i le Faletupe. O Faleoloa e 2, o le ‘JFL Malae Store’ ma le ‘Fast By Food Mart’ e pulea lea e le ali’i faipisinisi o Zhang, o le isi lea o loo molia i lenei mataupu. Ae o le Faleoloa o le ‘Harbor View Mart’ e pulea lea e Feng Xiao Guo, o se ali’i faipisinisi fo’i mai Asia.

 

Na faailoa e se tagata faigaluega a le DHSS i Leoleo, le taumafai o le ali’i o Toeava e tauanau se tama’ita’i faigaluega o le Food Stamp, mo se avanoa na te tuuina atu ai kopi o pepa ‘ai e le o lolomia ai ni faaupuga i luga, ina ia fesoasoani ai i le taumafaiga o lana pisinisi fou o lo o tau amata. Na folafola e Toeava i le tama’ita’i faigaluega lea, o le a la fai paaga i lana pisinisi pe afai ae mautu ma solosolo lelei. Na taua e le tama’ita’i faigaluega i Leoleo lona teena o le ofa a Toeava, i lalo o lona talitonuga e le tusa ma le tulafono lona manaoga.

 

O le ali’i faipisinisi o Zhang e pei ona taua i fa’amaumauga a le fa’amasinoga, o i ai lana pisinisi Taavale Mautotogi e taua o le Malae Rental na amata i le 2016. E 2 lava ta’avale na amata mai ai lea pisinisi, o le Nissan Rogue o le 2013 ma le 2015.

 

I le masina o Me 2017, na alu ai Zhang ma talanoa ia Toeaoafua Meki Solomona ao avea o ia ma Faatonusili o le DHSS, ma faailoa i ai tulaga faaletonu o lana pisinisi o Taavale Mautotogi, ona e le tausi mea lelei tagata Samoa i le tele o taimi latou te fa’aaogaina ai lana ta’avale. Sa faailoa fo’i e Zhang ia Taeaoafua lona manaomia o lana fesoasoani i se auala e toe faaolaola lelei ai lana pisinisi.

 

Na fai Taeaoafua ia Zhang, o se tulaga lelei ua ia talanoa atu ai, ona o loo mana’omia fo’i lona to’alua e fai sana pisinisi o Taavale Mautotogi. Ona o tulaga e pei ona talanoaina, na fai ai loa Taeaoafua ia Zhang e sili pe a talanoa i le to’alua o lona afafine o Toeava, mo le fa’amautuina o se la tonu i se la’asaga e tatau ona faia.

 

O le talanoaga a Zhang ma Toeava na faia ai loa se la maliliega, o le a liliu atu le pisinisi Taavale Mautotogi a Zhang e faatautaia e le tausi o Taeaoafua o Vaofu’a Solomona, poo ‘Mama’ fo’i e pei ona taua ai i totonu o fa’amaumauga a le fa’amasinoga. Na fai le laisene pisinisi a Mama ma fa’aalu i lalo o le igoa o Meki Tavita & Mikaele Rental. O tuutuuga o le maliliega sa faia, o le mae’a ai o le tausaga e tasi talu ona fa’atautaia e Mama le pisinisi, ona maua loa lea e Zhang o le 40% o meatotino a le pisinisi. O le Kerisimasi fo’i o le 2017 o le a totogi atu ai e Mama ia Zhang le $8,000 mo le ta’avale Nissan Rogue o le 2013 ma le $10,000 mo le Nissan Rogue 2015.

 

E lei umi ona taulima e Mama le pisinisi, ae telefoni loa Taeaoafua ia Zhang ma faailoa i ai, ua mana’omia e le pisinisi nisi ta’avale fou se 3. Na alu Zhang ma fai lana nonogatupe, ma fa’atau mai ai ta’avale e 3 e pei ona talosagaina e Taeaoafua. O le Ford Escape mai le Samoa Motors e $10,000 le tau; Hyndai mai le Samoa Ford e $14,000 lona tau, ma le Ford Escape e $15,000 lona tau.

 

O le a fa’aauau atu i le isi lomia le vaega lona lua o lenei ripoti. O lo o taofia pea i latou  nei e to’atolu i le toese i Tafuna, e fa’atalitali ai taualumaga o a latou mataupu o lo o fa’agasolo i luma o le Fa’amasinoga Fa’aitumalo i le taimi nei.