Ads by Google Ads by Google

To’atolu isi tofiga a le kovana ua pasia Fono Faitulafono


[ata: archive]
ausage@samoanews.com

E to’atolu isi tofiga a le kovana ua mae’a ona pasia e le Fono Faitulafono i le vaiaso na te’a nei, i le mae’a ai lea ona fa’atinoina o iloiloga a komiti ta’itasi a maota e lua.

 

O ia tofiga e aofia ai le tofa Le’i Sonny Thompson e avea ma Komesina o le Matagaluega o le Puipuiga o le Saogalemu Lautele, o le faletua ia Catherine Saelua e avea ma Fa’atonusili o le Ofisa o le Paketi a le malo, ma le tama’ita’i foma’i ia Taimalelagi Dr. Claire Poumele e avea ma Fa’atonusili o le Pulega o Uafu ma Malaeva’alele a le malo.

 

E tasi le tofiga a le kovana na teena e le maota o sui i le vaiaso na te’a nei, o le tofiga lea mo le tofa a Va’amua Henry Sesepasara e avea ai o ia ma Fa’atonusili o le Matagaluega o Alamanuia o le Sami ma le Vaomatua (DMWR).

 

E 7-10 le palota na teena ai e le maota o sui le suafa o Va’amua, i le mae’a ai lea o se iloiloga sa fesiligia ai ona agava’a e uiga i lenei tofiga.

 

Ina ua le manuia le palota mo Va’amua, na fa’atula’i ai e le afioga i le ali’i faipule mai Pago Pago ia Ve’evalu Meauta L. Mageo le mau ina ia toe tu’uina atu le suafa o Va’amua i totonu o le komiti e toe iloilo, lea fo’i na fulisia uma i ai finagalo o le maota ina ia toe tu’uina atu le suafa o Va’amua e toe iloilo.

 

E pei ona silafia, e le fou le tofa a Va’amua i le nofoa o le Fa’atonusili mo le Ofisa o Alamanuia o le Sami ma le Vaomatua, sa avea ai fo’i o ia ma Fa’atonusili i taimi o le nofoaiga a Kovana Uifa’atali P. Coleman.

 

O isi tofiga sa pasia e le maota o sui i le aso Faraile na te’a nei e aofia ai tofiga mo Faleosina Voigt e avea ma Faatonusili o le Matagaluega o Galuega Lautele a le malo, e pei ona i ai le palota e 18-1 na pasia ai o ia e afioga i Faipule, ae 13-5 le palota na pasia ai tofiga a le kovana mo le afioga a Tamaaiga Maeata’anoa P. Gaoteote e toe avea ai o ia ma Fa’atonusili o le Pulega o Paka ma Malaetaalo a le malo.

 

I le toe fa’aauau ai o iloiloga a komiti ta’itasi a maota e lua mo a latou iloiloga i le taeao nei, ua fautuaina ai e le afioga i le ali’i Fofoga Fetalai o le maota o sui ia Savali Talavou Ale afioga i Faipule, ina ia silasila toto’a i tulaga o fa’aiuga i taimi o palota, ina ia aua ne’i avea lagona le fiafia fa’asaga i le Ta’ita’i Komiti i auala e fa’afoe ai iloiloga, ma auala e afaina ai filifiliga o loo faia mo tofiga a le ali’i kovana.

 

Saunoa Savali e faapea, o i latou e pei ona tofia e le kovana e avea ma sui o le Kapeneta, e le fou i latou i le galuega, pau le vaega o loo mana’omia le Fono latou fa’atinoina, o le fa’amaonia ma avatu i ai fa’amanuiaga mo le fa’atinoina o le latou galuega.