To’atolu isi Senatoa fou ua fa’aopoopo i le maota maualuga

ausage@samoanews.com

O le vaiaso nei na filifilia ai e Itumalo o le Manu’a #1 ma Sua #1 a latou sui i le maota maualuga o le Senate, i le mae’a ai lea o fonotaga sa fa’atautaia e mamalu o Itumalo ta’itasi.

 

Mo le Itumalo o Manu’a #1, ua toe filifilia le afioga i le na Mua i Ao ia Galea’i M. Tu’ufuli ma le afioga ia Nuanuaolefeagaiga S. Nua la te toe tauaveina nofoa e 2 o le itumalo mo le isi 4 tausaga.

 

Ae mo le Itumalo o Sua #1, ua filifilia ai nei le afioga a Faamausili Mau Mau Jr e avea ma senatoa o le itumalo mo le isi 4 tausaga, e sui tulaga i le afioga a Sua M. Afonotele o lo o ia nofoia le nofoa i le nofoaiga lona 34 lenei a le Fono Faitulafono, lea e fa’amuta aloaia i le itula e 12:00 i le aoauli o le aso 3 Ianuari 2017, o le taimi lea e fa’atauto ai senatoa fou mo le isi nofoaga fou o le a soso’o ai.

 

E pei ona taua e le afioga a Galea’i i se fa’atalatalanoaga ma le Samoa News e faapea, ina ua sauni le Itumalo o Manu’a #1 e saili ni o latou senatoa fou, sa muamua ona fono lava itumalo ta’itasi e aofia ai Ta’u, Faleasao ma Fitiuta mo le sailiina o le tofa.

 

O le aso Tofi la o le vaiaso na te’a nei, le Aso Fa’afetai o lenei tausaga, na fono ai loa le Itumalo i Malaetele mo le fa’ailoaina o sa latou fa’aiuga e tusa ai o latou senatoa filifilia, ma tasi ai loa le fa’afitiga o aleaga i le mamalu o le itumalo atoa, o le a toe taoto atu le fa’aaloalo i le afioga a Galea’i ma Nuanuaolefeagaiga la te tauaveina tofi o le itumalo mo le isi 4 tausaga.

 

Na fa’amaonia mai e le afioga a Nuanuaolefeaiga, o ia fo’i lea o lo o avea ma Sui Peresetene o le Senate i le taimi nei tofiga e pei ona taua. Saunoa atili Nuanuaolefeaiga e fa’apea, e ui e lei auai le afioga a Galea’i i le fonotaga a le Itumalo na fa’alauiloa ai le tofa saili, peita’i ua mae’a ona fa’ailoa i ai le finagalo o le itumalo, e fa’atatau i le toe filifilia lea o i laua.

 

Na taua e le afioga Nuanuaolefeagaiga i se fa’atalatalanoaga ma le Samoa News e fa’apea, sa i ai suafa na fa’ailoa ane i le taimi o le fonotaga a le Itumalo e talafeagai mo le tofi, peita’i e le i umi se taimi na saili ai le tofa ma le fa’autaga i le mamalu o le itumalo, ae tasi loa ia te i laua ma le afioga a Galea’i.

 

“Ina ua mae’a le filifiliga a le Itumalo, sa avea ai a’u e fai ma o ma sui ma le afioga a Galea’i e fa’afetaia ai le Itumalo atoa, ona o le toe filifilia o i maua ma te tauaveina nei tofi taua ma le maualuga a le itumalo”, o le saunoaga lea a Nuanuaolefeaiga.

 

Sa ia taua atili fo’i e fa’apea, o le fa’anaunauga atili o lo o ia i laua ma le afioga a Galea’i, ia avea i laua ma sui la te fa’aleoina manaoga o le itumalo i totonu o le Fono Faitulafono a Tutuila ma Manu’a.

 

Ina ua fesiligia le afioga a Nuanuaolefeagaiga po o a ni isi manaoga o le itumalo ua la fa’amoemoe e fa’aoo atu i luma o le Fono Faitulafono i le isi nofoaiga o le a sosoo nei, saunoa le suiga i le Sui Peresetene e fa’apea, “e tele naua isi manaoga o le itumalo e tatau ona fa’aleoina i le Fono, aemaise lava i auala e siitia ai le soifua manuia o le itumalo i tulaga o auala o femalagaaiga”.

 

“Ua fa’aalia fo’i le agha fa’afetai o le Itumalo atoa ina ua mafai ona tatala aloaia se tasi o galuega tele ua mafai ona fesoasoani tele ai i aiga ta’itasi o le itumalo, e ala i le eletise lea ua maua mai i le malosiaga o le la (solar), ma ua mafai ai fo’i e maua ma le afioga a Galea’i ona maua isi metotia fou e mafai ai ona talosaga atu i le malo mo ni isi atina’e fa’apenei mo le Itumalo atoa i le lumana’i”, o le saunoaga lea a Nuanuaolefeagaiga.

 

Ina ua fesiligia e le Samoa News le afioga i le Sui Peresetene po o a ni manaoga o loo faananau le Itumalo ia i laua ma Galea’i e tatau ona la fesoasoani e fa’aleo i le malo ma le Fono Faifulafono, na saunoa Nuanuaolefeaiga e fa’apea, “O lo o tagi mai le itumalo i le fia fa’aleleia lea o auala o femalagaaiga i le sami ma le ea, o ni isi ia o tulaga ua tele tausaga o pagatia ai le itumalo, aemaise fo’i i le toe fa’aleleia lea o le uafu i Faleasao, lea o lo o avea ma nofoaga autu e taunu’u atu i ai le va’a o le MV Sili i taimi e malaga atu ai i le Faletolu i Ta’u, Faleasao ma Fitiuta”.

 

E ese mai i tulaga o atina’e o lo o naunau le itumalo o le Manu’a tele i o latou sui ua filifilia la te fa’aleoina i le Fono, ae o lo o naunau fo’i i latou ina ia fa’auau pea le unaia o le mataupu e fa’atatau i le toe fa’afo’i lea o nofoa o le itumalo i totonu o le maota maualuga i le aofa’iga e 5 e pei ona taoto muamua ai i le Fa’avae o Tutuila ma Manu’a, fa’apea ai fo’i ma nofoa a le itumalo i le maota o sui.

 

“O se tasi o talosaga ua mae’a ona fa’ailoa mai e le itumalo ia i maua ma le afioga a Galea’i, o le fa’aleleia lea o tulaga i aoaoga i Manu’a ina ia tutusa ma le tulaga o lo o i ai aoaoga i Tutuila nei, atoa ai ma le fa’aleleia lea o le falema’i i totonu o le itumalo atoa, fa’apea ai ma le ave o ni foma’i lelei ma lava e galulue i le itumalo, ona o le to’atele o tagata matutua o le itumalo, ua to’atele i latou ua aumau i Tutuila nei ona o tulaga i talavai ma togafitiga a foma’i, e mafua mai i le fa’aletonu o falema’i ma foma’i i Manu’a”, o se vaega lea o le saunoaga a le afioga a Nuanuaolefeagaiga.

 

E talitonu fo’i le afioga i le senatoa filifilia o le itumalo mo le isi 4 tausaga o lo o lumana’i nei, e foliga mai o manaoga uma o lo o tagi mai ai le itumalo, sa lelei lona fa’atinoina i le silia i le 30 tausaga ua mavae, ae foliga mai ua tele le fa’aletonu i lenei vaitaimi, ma ua mana’omia ai le toe fa’aleleia atili.

 

E le i tu’uina mai se fa’amatalaga e fa’atatau i se senatoa fou mo le itumalo o Manu’a #2, lea e aofia ai le Falelua i Ofu ma Olosega/Sili, pe ua mae’a ona fono le itumalo mo so latou sui.

 

Ae mo le itumalo o Sua #1, ua tasi nei le fa’afitiga o Aleaga, o le a avea le afioga a Fa’amausili ma o latou sui i le maota maualuga a le Senate mo le isi 4 tausaga.

 

I le fonotaga a le Itumalo sa usuia i le aso Faraile o le vaiaso na te’a nei, na tasi ai le fa’afitiga o aleaga, o le afioga a Fa’amausili o le a seei i le nofoa.

 

Na taua e le afioga a Fa’amausili i le Samoa News le faigofie o le sailiga a le itumalo mo so latou sui, ona o le latou afioaga i Masefau lea ua o o atu i ai le fa’asologa.

 

I lona nofoia ai o le nofoa a le itumalo i le maota maualuga i nofoaiga ua mavae, na taua ai e le afioga a Fa’amausili lona sauni e tautua le itumalo i soo se manaoga o lo o tula’i mai, e ala i lona tulaga i upufai o malo mo le isi 4 tausaga.

Comment Here