Ads by Google Ads by Google

To’atele ua le fiafia ina ua leai se tuuga fautasi o le fu’a

Na fa’aalia e le to’atele o le atunu’u na mafai ona fesiligia e le Samoa News lo latou le fiafia, ina ua fa’alauiloa e le Komiti o Tuuga Fautasi la latou fa’aiuga e taofi tuuga fautasi sa fuafua e fa’ataunu’u i le taeao ananafi.

Na taua e se tasi o tama matua e lei finagalo e fa’ailoa lona suafa e fa’apea, afai o le faiga lava lea o tuuga fautasi i tausaga uma e fa’amanatu ai le fu’a a Amerika Samoa, e aofia ai ta’ita’i o le malo i totonu o le komiti o tuuga fautasi, o le mea moni lava e fa’aauau pea ona fa’aletonu fa’aiuga e faia i tuuga fautasi.

Na taua e lea tama matua lona agaga fa’anoanoa ina ua toe sui e le komiti o tuuga fautasi la latou faaiuga mo le faataunuuina o le sailiga siamupini i le taeao ananafi, e aunoa ma le fa’ailoaina i le atunu’u.

“Na tula’i mai fo’i fa’afitauli lava nei i le tuuga o le fu’a o le tausaga ua tuana’i, ina ua aofia le kovana i le faia o faaiuga o tuuga fautasi, ao lea fo’i ua toe tula’i mai lea fa’aletonu i lenei tausaga, ma ua foliga mai ai e fa’aauau pea ona tutupu fa’afitauli i tuuga fautasi pe afai ae aofia ai ta’ita’i o le malo”, o le saunoaga lea a lea tama matua.

Na fesili i ai le Samoa News po o ai tonu na te manatu e tatau ona faia fa’aiuga o tuuga fautasi, ae na saunoa le tama matua, “E tatau lava ona tu’u sa’o lava le fa’atautaiga o tuuga fautasi i le Ofisa o Mataupu Tau Samoa, o i latou tonu lava na e faia le fa’aiuga”.

Na felanulanua’i finagalo o le to’atele o le atunu’u i le fa’aiuga sa faia e le Komiti o le Tuuga Fautasi i le aso Toona’i na te’a nei, e fa’asala ai Sa e 5 mai le auai i le sailiga siamupini i le taeao ananafi.

O ni isi na latou fa’afetaia le Komiti o le Tuuga Fautasi i lo latou faia o le faaiuga sa’o e fa’asala ai Sa e lei usitai i tulafono o le tuuga, peita’i na taua e ni isi e fa’apea, e lei fa’amaoni le Komiti i le latou fa’aiuga, ona sa i ai fo’i isi Sa e lei fa’amaoni i tulafono, ae sa fa’aauau pea ona auai i le lisi o Sa e 6 na lautogia mo le sailiga siamupini o lenei tausaga, lea sa fuafua e fa’ataunu’u i le taeao ananafi, lea na mulimuli ane toe suia e le Komiti, i le mae’a ai o se fonotaga ma le afioga i le ali’i kovana ia Lolo Matalasi Moliga, faapea ai sui o le Komiti o Tuuga Fautasi e aofia ai Lemanu Peleti Mauga ma le afioga i le Maoputasi ia Mauga Tasi Asuega, fa’apea ai Kapeteni o Sa uma sa faamoemoe e tausinio i tuuga o lenei tausaga.

E to’atolu isi ali’i alo va’a i ni isi o Sa sa fa’amoemoe e auai i tuuga fautasi o lenei tausaga na latou fa’aalia o latou lagona faanoanoa ina ua toe sui e le Komiti o Tuuga Fautasi la latou faa’iuga.

Na taua e se tasi o ali’i alo va’a i le Samoa News e fa’apea, sa tatau i le Komiti ona silasila alofa i le tautiga o afioaga taitasi i le koleniina o a latou Sa, aemaise ai o le taimi sa tausi ma fafaga ai.

“E le faigofie le nofo ese mai le aiga i le silia i le 3 vaiaso ona o le tau fa’amaopopoina o koleniga a au va’a, ao lenei ua toe tula’i mai fo’i le fa’afitauli lenei o le toe suia o fa’aiuga i lagona fa’amatai ma lagona fa’ata’ita’i, mo a’u lava ia, sa tatua lava ona fa’ataunu’u le tuuga, ua leva ona tapena afioaga ma a latou auva’a, ua leva fo’i ona tuli mata’i mai i ai le tapuaiga a le atunu’u”, o le saunoaga lea a le isi alii alo va’a.

Na taua e le afioga i le Maoputasi ia Mauga i le Samoa News e faapea, o se tasi o mafua’aga na manatu ai le Komiti ma le alii kovana e taofi le tuuga fautasi, e le gata ia tausi le filemu i le va o afioaga taitasi, ae ia maua ai fo’i se tulaga nonofo lelei o le atunu’u atoa, peita’i na taua e le isi ali’i alo va’a e fa’apea, e le mafai ona vevesi au va’a o afioaga taitasi ona o lo o malu puipuia pulega a ali’i ma faipule.

“O le matou nu’u, ua mae’a lava ona faia le faaiuga a ali’i ma faipule, o le tagata lava e tula’i mai ai se vevesi i taimi o tuuga fautasi, e matua mamafa lava lona fa’asalaga, toe tu’u atu fo’i i leoleo mo le fa’atinoina o a latou tiute pe molia fo’i i le tulafono, lona uiga, e le mafai ona tula’i mai se vevesi aua o lo o malu puipua pulega a ali’i ma faipule”, o le talitonuga lea a lea ali’i alo va’a.

E ui i finagalo ma lagona o le atunu’u, a o lea lava ua fa’alava le amo a i le finagalo o ta’ita’i o le atunu’u faapea ai sui o le komiti o tuuga fautasi ma kapeteni, ina ia taofia le faataunuuina o tuuga fautasi o lenei tausaga, ae taupule ola i le alofa o le Atua le sisigafu’a o le tausaga fou 2017.