I le mae’a ai ona fa’aalia e le to’atele o le aufai fa’atoaga a le atunu’u lo latou le lagolagoina o le fa’aiuga a le Ofisa o Fa’atoaga, e taofia ai le toe faatauina atu o fualaau’aina uma o lo o toto i totonu o le atunu’u, i le polokalame o le ‘School Lunch Program’ a le Ofisa o Aoga, o le vaiaso nei na faamanino ai e le Ofisa o Fa’atoaga i le Samoa News le to’atele o le aufai fa’atoaga latou te le o ausia ta’iala e tatau ona ausia mo le tausia lelei o a latou fa’atoaga.

“E le sa’o fa’amatalaga fa’apea e lei asia e le Ofisa o Fa’atoaga nofoaga ta’itasi o lo o i ai fa’atoaga eseese i totonu o le atunu’u, o lo o faia sa matou galuega, o lo o i ai fo’i fa’amaumauga e fa’amaonia ai vaega taitasi o lo o mafai ona maua mai e le Ofisa o Fa’atoaga mai fa’atoaga eseese nei ma fa’afitauli o lo o tutupu mai ai”, o le saunoaga lea a le Faatonusili le Tumau o le Ofisa o Fa’atoaga ia Peter Gurr i le Samoa News, atoa ai ma lona tu’uina mai o le lisi o lo o i ai igoa uma o le aufai fa’atoaga faapea ai fa’amaumauga i tulaga o lo o aafia ai fai faatoaga taitasi i le atunu’u.

Mai le aofa’i e silia i le to’a 100 o le aufai fa’atoaga ua mae’a ona lesitala mo le sapalaiina o fualaau’aina i le “school lunch program”, o le silia i le afa o i latou e le o ausia ta’iala ma tulafono mo le tausiaina o fa’atoaga i le atunu’u, e aofia ai le to’atele o le aufai fa’atoaga Asia faapea ai ma se vaega to’atele o le aufai fa’atoaga Samoa.

“O le tiute tauave a le Ofisa o Fa’atoaga, ia fa’amuamua lava le saogalemu o le mamalu lautele o le atunu’u, aemaise lava fanau aoga o lo o fa’aaogaina le polokalame a le “school lunch program”, o le taimi lava na maua ai e le Ofisa tulaga faaletonu e pei ona taua i la matou fa’asalalauga, na tu’uina atu ai loa ma le fa’aiuga ina ia taofia le toe taliaina o fualaau’aina, ae sei galulue le Ofisa o Faatoaga faapea ai ma le aufai fa’atoaga e saili ni auala e fofo ai fa’afitauli ua alia’e mai”, o le saunoaga lea susuga Gurr i se feiloaiga ma le Samoa News i le aso ananafi.

Saunoa Gurr e fa’apea, o vaiaso uma lava o masina ta’itasi e faia ai asiasiga a le Ofisa o Fa’atoaga mo le mata’ituina o le saogalemu o fa’atoaga i le atunu’u.

O ni isi o fa’afitauli e pei ona maua, o le malosi lea o le mea faalelei eleele o lo o fa’aaoga i luga o eleele o lo o toto ai fa’atoaga, atoa ai ma le malosi o le vailaau o lo o maua i le tino o fualaau’aina o lo o faia i ai su’esu’ega.

“E i ai a matou masini e fa’aaoga e fua ai le malosi o mea fa’alelei eleele o lo o fa’aaoga i le tausiga o fa’atoaga eseese, ma o ni isi o a matou su’esu’ega ua maua ai le ova atu i le 1000% o le fa’alelei eleele ua fa’aaoga e tausi ai ni isi o fa’atoaga, ona o le naunau o le aufai fa’atoaga ina ia vave ona matua le fa’atoaga ae faatau atu ina ia maua ai le tupe, peita’i o le fa’afitauli o lo o i ai, o le a’afia ai lea o le soifua maloloina o le atunu’u o lo o fa’aaogaina fua o fa’atoaga nei”, o le saunoaga lea a le susuga a Arona Palamo, o se tasi o ali’i Sinia i Vaega o Fa’atoaga.

O ni isi o fa’afitauli na taua e le susuga Palamo, o le malosi o vailaau o lo o fana ai tino o togalaau’aina, fa’aaoga fa’asolitulafono o vailaau e le o fa’atagaina mai e le Ofisa o le Siosiomaga a le malo o Amerika Samoa (AS-EPA), atoa ai ma le fa’aaoga o vailaau e le o i ai ni tusitusiga i le gagana fa’aperetania.

“Mo se fa’ata’ita’iga, ua fa’aaoga vailaau e fana ai le tino o le esi poo le fa’i fo’i ina ia vave ona pula, poo le soona fa’aaoga o le vailaau e fana ai le kapisi, kukama poo isi lava ituaiga fualaau’aina ina ia vave ona lapopo’a, ae a’afia ai le soifua maloloina o le atunu’u e fa’aaogaina fualaau’aina nei ona o le malolosi o vailaau o lo o fana ai”, o le saunoaga lea a Palamo.

Ae na fa’amanino atili e le susuga a Gurr e fa’apea, e eseese uma lava faatoaga ma fa’afitauli o lo o a’afia ai, ma o le galuega a le aufaigaluega a le Ofisa o Fa’atoaga, o le asia lea o faatoaga uma o lo o a’afia i vaiaso ta’itasi ina ia mautinoa ua mafai ona latou fa’atinoina fautuaga ua tuuina atu mo le fa’aleleia o a latou fa’atoaga.

“O le isi fa’afitauli o loo maitauina i le taimi nei, o le tagata fai fa’atoaga lea ua manumalo i tauofoga mo le sapalaiina atu o fualaau’aina i le ‘school lunch program’, ae a o atu le aufaigaluega e siaki fa’atoaga a i latou ia, e leai ni fa’atoaga o i ai, ona tula’i mai ai fo’i lea iina o le isi fa’afitauli, ona e alu le tagata fai fa’atoaga lea ua manumalo i le tauofoga e fa’atau mai fualaau’aina mai le isi tagata fai fa’atoaga, lona uiga la, e tatau fo’i la ona suesue ma asia e le aufaigaluega le isi faatoaga lea ua faamoemoe e maua mai ai le sapalai, ma atili ai lava ona tula’i mai le fa’afitauli i le fa’atinoina o le matou galuega, pau le galuega e fai e le matou ofisa, o le tapunia uma o fa’atoaga nei mai le toe fa’atau atu i le ‘school lunch program’, ae se’i su’esu’e muamua poo ausia tulaga uma e fa’atatau i le saogalemu o le fofoga taumafa o le atunu’u”, o le saunoaga lea a le susuga a Gurr.

O le aso ananafi na toe asia ai fo’i e sui o le ofisa o fa’atoaga ni is o fa’atoaga i le atunu’u, ina ia mautinoa o lo o mulimulita’i i latou i ta’iala ma tulafono e pei ona fa’ataoto atu e le Ofisa.

“O lo o i ai le fa’amoemoe e tatau ona mae’a ane le 4 vaiaso pe 6 fo’i vaiaso, ua mautu gaioiga o lo o faia mo le fa’amalosia o le saogalemu o le atunu’u i tulaga o fa’atoaga, ona toe tatala loa lea o le avanoa mo le sapalaiina atu o fa’atoaga i le ‘school lunch program’ maua ai ni taumafa lelei mo le atunu’u, ae maua tupe mo le aufai fa’atoaga a le atunu’u”, o le saunoaga lea a Gurr.