To’atele le atunu’u na sulufa’i mo ni lafitaga ina ua lulu le mafui’e

ausage@samoanews.com

O ripoti mai vaega eseese o le atunu’u na taua ai le to’atele o ni isi o le mamalu lautele o le atunu’u na mafai ona sulufa’i solo i nofoaga maualuluga mo se lafitaga, ina ua fa’atoa mae’a lava ona lulu le mafi’e lea na fa’alogoina i totonu o le atunu’u ma le atu Samoa i le po o le so Faraile na te’a nei.

 

E tusa ai o ripoti na mafai ona tuuina mai e le Ofisa Vaaitau i Tafuna, o le mafui’e e tusa lona malosi i le 6.9 i le masini fua mafui’e.

 

Tusa o le ta tonu o le itula e 10 i le po o le aso Faraile, aso 3 Novema na lulu ai le mafui’e, tusa lea o le mamao e 88 maila le mamao ese mai i atumotu o Samoa. O se lipoti fa’apitoa lea a le ofisa o le fetarale e gafa ma le vaaia o mafuie ma galulolo i Hawaii

 

E le i atoa se tasi le minute talu ona mae’a le lulu o le mafui’e, ae molimauina i luga o fesootaiga fa’aonapo nei e pei o le Facebook ma le Tweeter, le to’atele o le atunu’u i Amerika Samoa nei atoa ai ma Samoa ua fetusia’i solo i aiga ina ia mautinoa o lo o saogalemu i latou, atoa ai fo’i ma o latou fia maua o se ripoti tu’u sa’o mai i le tulaga o le mafui’e, pe ono alia’e mai ai se galulolo i tua.

 

Na taua e ni isi o molimau mai itu eseese o le atunu’u i le Samoa News, le vaaia o ni isi o le atunu’u ua sulufa’i i nofoaga maualuluga, e sauniuni ai mo se galulolo e tula’i mai.

 

O ni isi o tagata na taua mai i ripoti le aga’i atu i luga o le mauga i Aua mo se lafitaga, o isi na aga’i atu i nofoaga maualuluga i Pago Pago, Utulei ma Fagatogo mo se fesoasoani.

 

O le to’atele o le atunu’u ua fa’aleo o latou lagona fa’asea i luga o fesootaiga fa’aonaponei, i le fiu e fa’alogo se taimi e fa’ailoa atu ai i Sailini a le malo se gaioiga e tatau ona faia.

 

Na taua e se ripoti mai le Ofisa Vaaitau i Hawaii ina ua tuana’i le lulu o le mafui’e i ni mai minute lava, le leai lea o se tulaga e fa’apopoleina ai fua le atunu’u, e le gata e leai se galulolo e ono tula’i mai ona o le mafui’e, ae leai fo’i se lapataiga mo se galulolo, ua na o ni fautuaga.

 

Na taua e se sui sinia o le Ofisa o le Puipuiga o le Saogalemu Lotoifale ina ua fesiligia e le Samoa News i lea po, e le tatau i le atunu’u ona popole vale, ae tatau ona silafia tulaga uma ua leva ona fa’ailoa atu i taimi e tutupu mai ai fa’alavelave fa’alenatura fa’apenei, e aofia ai le tatau lea ona i ai ni a latou leitio e fa’afofoga ai i le tala o le tau.

Comment Here