Ads by Google Ads by Google

To’atele faipule e le lagolagoina pili Senate sui ai Tulafono o Palota


Komesina o Palota ia Uiagalelei Dr. Lealofi Uiagalelei, ma le Sui Komesina, afioga Falana’ipupu Sagapolutele. [ata AF]
ausage@samoanews.com

E to’atele afioga i Faipule ua fa’aalia lo latou le lagolagoina o le pili a le Senate lea ua mae’a ona pasia, e fa’amanino atili ai le fa’auigaina o nofoaga e faia ai faiga fa’atosina i le aso o le palota a le atunu’u.

 

Ona o finagalo sa fa’aalia e afioga i faipule e tusa ai o lenei tulafono, na pasia ai loa le mau ina ua mae’a le latou iloiloga i le taeao ananafi, ina ia toe taoto le pili i le Komiti ae sei toe fesiligia le Senate e fa’amanino atili le uiga o le tulafono ma suiga ua faia.

 

O le Komesina o Palota, afioga Uiagalelei Dr. Lealofi Uiagalelei, ma le Sui Komesina o Leoleo ia Falana’ipupu Sagapolutele na molimau e fa’atatau i lenei tulafono taufa’aofi, i le iloiloga sa taitaia e le afioga i le ali’i faipule ia Sataua Dr. Samuelu Mataese o le Taitai o le Komiti o Palotaga a le maota o sui.

 

E pei ona manino i totonu o le tulafono a le senate, talu ai e le o manino i le tulafono o Palotaga le mamao e tatau ona i ai fale ie a komiti fa’afoe a sui tauva, ma le fale o lo o faia ai le palota, o le mafua’aga lena ua faia ai loa le suiga, ina ia fa’atulaga loa le mamao e ‘200 iata pe 600 futu’, e va ai le fale o lo o faia ai le palota ma nofoaga e tatau ona i ai fale ie a komiti mo sui tauva.

 

Na fesili le sui fofoga fetalai ia Fetui Fetu Jr i le Komesina o Palotaga, pe aisea ua mafua ai suiga e pei ona aumai i le tulafono, ae na saunoa Uiagalelei, talu ai e le o lava le 100 iata e pei ona i ai i le tulafono, o le mafu’aaga lena ua manatu ai e sui loa i le 200 iata.

 

Ae ina ua fesili le afioga i le tama’ita’i faipule ia Vui Florence Saulo ia Uiagalelei e fa’amanino atu poo fea o le tulafono o loo taua mai ai le 100 iata, na vaaia le nofo o le molimau ua le tali.

 

Saunoa Vui e fa’apea, e le o i ai se 100 iata i totonu o le tulafono tuai o lo o i ai, ma ua atagia mai ai le fete’ena’i o le suiga fou lea ua pasia e le senate ma le tulafono o lo o i ai. Na lagolagoina e le afioga a Vailoata E. Amituana’i le fesili a Vui.

 

Na fautuaina e le sui komesina o Leoleo ia Falana’ipupu le Komiti, ina ia silasila toto’a i le fa’aupuga o suiga, pe le mafai ona tu’u i ai ma le fa’aupuga, “ia le itiiti ifo i le 200 iata”, ina ia fa’a faigofie ai i le Ofisa o Leoleo ona fa’amalosi le tulafono.

 

O popolega e pei ona saunoa le sui komesina, ina nei agai atu Leoleo e fa’amalosi le tulafono, ae fa’asea le atunu’u ma fa’atonu malu o le malo e o atu e fua le mamao pe atoa le 200 iata pe leai.

 

O se tasi o mataupu na tele i ai fesili a afioga i Faipule, o le auala o le a fa’amalosia ai le tulafono pe afai ae pasia suiga o le 200 iata

 

Na taua e Vailiuama S. Leasiolagi e fa’apea, afai o le a pasia le suiga e 200 iata e va ai le fale palota ma nofoaga e i ai fale ie ma komiti, lona uiga o le a i ai se tulaga fa’aletonu mo lona afioaga i Fagatogo, talu ai le va apiapi o le nofoaga o lo o i ai le fale palota i le taimi nei.

 

“Afai tatou te fa’amalosia sa’o lava le tulafono i le gagana o lo o aumai ai, lona uiga e tatau ona tapuni le fale fa’amasino i le aso atoa o le palota, ae saili se nofoaga e fai aia latou galuega, e oo lava fo’i i faleoloa o lo o latalata ane i le fale palota, e tapunia uma i le aso lea, o popolega na o lo’u sui e uiga i lenei suiga,” o le saunoaga lea a Vailiuama na lagolagoina e Fetui.

 

Saunoa Fetui e fa’apea, o le nofoaga a le ekalesia o lo o fa’aaoga mo le palota a Manu’a i Tafuna, e le o se nofoaga tele, afai la e fua le 200 iata, lona uiga o totonu o le falesa e fai ai fale ie a komiti mo sui tauva, ae afai e tuu atu i le isi itu, lona uiga o le togavao, ma ua atili ai ona faigata le faauigaina o le tulafono.

 

Na fautuaina e le afioga i le ali’i faipule ia Vaetasi S. Moliga, le tatau lea ona toso lipine a le ofisa o palota e si’omia ai le nofoaga lea ua latou manatu e tatau ona puipuia mo le aso o le palota, ina ia taofia ai le toe tula’i mai o ni isi fa’afinauga i le lumana’i.

 

I le mae’a ai o le iloiloga, na finauina ai loa le fautuaga i luma o le komiti, pe tatau ona tuuina atu le pili e palota ina ia teena, poo le toe taoto atu foi i le komiti mo ni isi galuega mae’ae’a, ae i le mae’a ai ona fetufaa’i o le tofa ma le fa’autaga i le va o afioga i sui filifilia o le atunu’u, na tasi ai loa le fa’afitiga o aleaga, o le a toe taoto le pili i le Komiti mo ni isi suesuega mae’ae’a i le lumana’i.