To’atele Fa’atonu e le i auai i le iloiloga o a latou paketi


Komiti Soofaatasi o le Paketi a le Fono Faitulafono. Le afioga i le ali’i faipule ia Vailiuama S. Leasiolagi (agavale), afioga i le ali’i senatoa ia Magalei Logovi’i (ogatotonu) ma le Fofoga Fetalai o le maota o sui ia Savali Talavou Ale. [ata AF]
ausage@samoanews.com

O le aso lona lua o le iloiloga a le Komiti Soofaatasi o le Paketi a le Fono Faitulafono ananafi, mo le iloiloina o le tupe fa’asoasoa a le faigamalo mo le tausaga tupe fou 2018, na maitauina ai e afioga i Ta’ita’i Komiti le fa’afitauli, o le to’atele lea o Fa’atonusili e le i mafai ona auai atu mo le iloiloina o paketi a latou Ofisa.

 

O ni isi o Faatonu e pei ona fa’aalia e sui o latou ofisa o lo o fa’ataotolia i gasegae o le tino, ae o ni isi o lo o malaga i fafo.

 

I le maitauina ai e le Komiti Soofa’atasi o lea fa’aletonu, na taua ai loa e le peresetene o le Senate ia Gaoteote Palaie Tofau le fuafuaga ua i ai, o le a la valaauina ma le fofoga fetalai ia Savali Talavou Ale sa latou fonotaga faapitoa ma le Kovana, e toe fa’amanatu ai le taua tele o le oo atu o afioga i Fa’atonu i taimi o iloiloga o a latou paketi.

 

Saunoa Gaoteote e fa’apea, ua mae’a ona tu’uina atu le fa’aaliga i le afioga i le ali’i kovana ia Lolo M. Moliga ma le faigamalo, e le taliaina e le Fono ni sui fa’atonusili mo iloiloga a le paketi, se’i vagana ai afioga i Fa’atonusili.

 

“E i ai mataupu o lo o fia fesili i ai afioga i Senatoa ma Faipule mo le paketi, ae o le fa’alavelave, e le mafai e sui fa’atonusili ona tali mai, se’i vagana ai afioga i Fa’atonu, o le mafua’aga lena e taua ai le auai mai o i latou i iloiloga, ae afai loa o le a toe tula’i mai le tulaga lea i le lumana’i, e sili ai loa pe a taofi iloiloga o le paketi,” o le saunoaga lea a Gaoteote.

 

Mai Ofisa e 9 na iloilo e le Komiti Soofa’atasi a latou paketi ananafi, e na o le fa Ofisa na mafai ona auai atu a latou Fa’atonusili, o isi ofisa e 5 e na o sui fa’atonusili na auai atu.

 

Ina ua fesiligia le mafua’aga o le le oo atu o afioga i Fa’atonusili, ae o le tali sa tu’uina atu i le Komiti Soofaatasi, o lo o gasegase afioga i Fa’atonusili, ae o isi o lo o malaga i fafo.

 

Na lagolagoina e le tofa Savali le finagalo o le ali’i peresetene o le Senate, i le tatau lea ona toe faia sa latou feiloaiga ma le afioga i le ali’i Kovana, se’i toe fa’amautu i ai le tatau lea ona auai afioga i Fa’atonusili i taimi o iloiloga.

 

O le to’atele o senatoa ma faipule na maua avanoa e fesiligia ai molimau, na mafuli lava a latou saunoaga i le agaga fa’afetai ona o auaunaga a ofisa ta’itasi mo le malo.

 

Na taua fo’i e sui o le Komiti Soofaatasi se tasi o tulaga faaletonu ua maitauina i le tele o paketi a ofisa, o le leai lea o se vaega tupe e fa’atupe ai vaega e fa’atino ai galuega.

 

Ae na saunoa Magalei e fa’apea, e le mafai e le Komiti Soofaatasi ona fai se suiga i le paketi, pe talia fo’i talosaga a ofisa taitasi, ona o le paketi na aumai e le Kovana, e le o se paketi a le Fono Faitulafono.

 

O le itula e 9:30 i le taeao nei lea ua fa’amoemoe e toe fa’aauau ai iloiloga a le Fono mo le iloiloina o le tupe fa’asoasoa a le malo.

Comment Here