Ads by Google Ads by Google

To’alima sui agava'a galue fa'atasi ma Ta'ifau Sosogi K-9


O i latou nei e to'afa o le Ofisa o Tiute sa malaga i Florida ina ia a'oa'o fa'apitoa i tomai e galulue fa'atasi ai ma Ta'ifau Sosogi K-9. l-r: David McMoore, Shehan Seigafo, Tavae Leovao Tulia ma Fa'ifua Suafo'i Jr. [ata: Leua Aiono Frost]

O i latou e to'alima taua'ao tusi pasi e galulue fa'atasi ai ma Ta'ifau Sosogi K-9 lea ua nofoia lo latou ofisa autu i le lotoa a le Matagaluega o Fa'ato'aga i Tafuna. [ata: Leua Aiono Frost]

O le susuga Daniel Evin Cornier, le faia'oga mai le jamupani o le AMK9 i Florida sa fa'atautaia a'oa'oga e mo'omia ona agava'a ai sui e faigaluega fa'atasi ma Ta'ifau Sosogi K-9. [ata: Leua Aiono Frost]

Ua mae'a taua'aoina tusi pasi e fa'ailo ma fa'amautu ai agava'a o sui e to'alima o le aufaigaluega a le Ofisa o Tiute, e galulue fa'atasi ai ma Ta'ifau Sosogi K-9, ma sa faia lea sauniga i le ofisa autu i le lotoa a le Matagaluega o Fa'ato'aga i Tafuna.

 

O lenei aufaigaluega, ua mo'omia ona latou mua'i pasia lenei kosi, ina ia fa'atino ai le siakiga o uta ma atopa'u fa'atasi ai ma va'a e taunu’u i le teritori.

 

Ua ma’ea tamau le mau a le malo ina ia fa'aleleia atoatoa auaunaga e fa'asaga atu e "Tete'e i Fuala'au ma Vaila'au Fa'asaina", lea o lo’o fa’amalosia e le Ofisa o Tiute, ma le vaega a le ofisa o leoleo.

 

O le susuga Daniel Evin Cornier, le faia'oga o lo'o faigaluega mo Bill Heiser ma lana kamupani o le AMK9 i Florida sa fa'atautaia a'oa'oga uma e mo'omia ona agava'a ai sui e faigaluega fa'atasi ma Ta'ifau Sosogi K-9. Ua toe taliu o ia i Florida, ina ua mae'a nei a'oa'oga mo le vaiaso e tasi na auai mai ai.

 

Ua fa'ailoa mai e le tama'ita'i o Tava'e Leovao Tulia, "O le ta'ifau lava lea sa matou a'oa'o fa'atasi i Florida ua matou toe aumaia iinei, aua e tatau ona e masani lelei i lau ta'ifau, ma masani fo'i o ia ia te oe. Ua ese fo'i lo ta alofa i ai, ua foliga mai o sau tama ma o se uo mamae ua e fa'alagolago i ai i le galuega, e saili e i latou fuala'au ma vaila'au fa'asaina uma lava."

 

Na fesiligia po'o a tonu ituaiga o fuala'au ma vaila'au o'ona fa'asaina ua fa'atulaga nei ta'ifau e sogitia.

 

"O Ta'ifau nei ua mafai ona latou sogitia le aisa, coccaine ma le marijuana. Ua faigata ona sao mai nei mea uma pe afai e fa'aaoga lava Ta'ifau. E i ai taimi e mafai ai e se tasi ona fa'asese le Scanner po'o le masini va'ai fuala'au ma vaila'au fa'asaina, peita'i e le taitai ona sao se mea fa'apenei i le atunu'u pe a fa'aaoga Ta'ifau sosogi nei,” o se tala lea a le susuga Iuliano Falaniko o le Ofisa o Tiute.

 

E to'afa ali'i ma le tama'ita'i e to'atasi  mai le Ofisa o Tiute ua mae'a fa'aauupegaina i tomai mo'omia e galulue fa'atasi ai ma Ta'ifau e 9 ua mautu nei i le latou ofisa autu i le nofoaga o le Matagaluega o Fa'ato'aga i Tafuna, ma e soso'o lava ma le ofisa autu o le Foma'i Manu lea fo'i e nafa lona va'ava'aiga e le Matagaluega o Fa'ato'aga a le malo.

 

"Ona o lo ua tu'u mai le malamalama e silafia lelei ai lau Ta'ifau Sosogi K-9, ua ia te oe fo'i le tausiga e ao ina faia mo i latou. Ua fai sifi fo'i i matou ina ia mautinoa le tausia lelei o i latou, ua pei lava fo'i o sau tama i latou e fa'amoemoe lona soifua maloloina ia oe ma lou iloa fo'i o ona uiga pe afai ua fa'alelelei lona tausiga,” o se tala lea a Tulia.

 

I le taimi o le sauniga pu'upu'u e taua'ao aloaia ai  tusi pasi fa'apitoa e Cornier, na ia tima'ia ai i latou uma nei, "Ia outou to'aga e galulue ma fa'alautele atili lou iloa o lau K-9 atoa ma le lua galuega faito'alua, saili auiliilia oloa uma ina ia le ulufale mai ai nei vaila'au o'ona ma e fa'asaina. Afai e i ai se mea e te lagona e ao ina e toe fesiligia ai a'u e mafai lava ona feso'ota'i atu i emeli ma telefoni ua mae'a fa'ailoa ia te outou, ae ui ina la'ititi la outou aufaigaluega, ae o tomai uma ua avatu, o le sosia lea e mo'omia e ofisa tetele uma ma le to'atele o tagata faigaluega i la outou matata i so'o se setete o Amerika."

 

O le kamupani a le AMK9 e fa lelei K-9 ua mae'a fa'atauina mai e le Ofisa o Tuite a le malo ma e ta'i $8,500 i le ta’ifau e tasi.

 

Na fesiligia le ali'i e fa'auluulu i ai lea vaega, Iuliano Falaniko, pe fa'apefea ona fa'aosofia le naunau o le K9 ina ia sogitia le fuala'au ma vaila'au fa'asaina?

 

Na tali mai Falaniko, "E ui lava ina tau le mafai ona fa'ailoa atu, ae fa'ailoa pea. E tutusa lelei lava le ta’ifau sosogi ma le tagata, ua naunau fo'i o ia e fia maua mai le aisa, coccaine po'o marijuana aua e fafaga ai fo'i e matou ia naunau i ai."

 

O ta'ifau K9 nei ua fa'atulaga e galulue lava mo le Ofisa o Tiute, ae le'o aofia ai ma le vasega o Ta'ifau a le vasega o Leoleo Suesue a le Matagaluega o Puipuiga o le Saogalemu Lautele.

 

E tuaoi lava fo'i nofoaga o nei vaega e lua i le lotoa a le ofisa o Fa'ato'aga  i Tafuna.

 

Na fesiligia Cornier i se umi e fa'aaogaina ai ta'ifau nei fa'ato'a le toe mau talitonuina lea, "O nei ta'ifau e tatau lava ona atoa le 12 tausaga o latou fa'atinoa lenei tiute, ae mafai fo'i ona sili atu, ae agava'a lava i latou mo lea tautua. Afai e mae'a le auaunaga a le Ta'ifau e mafai ona tausia loa o ia e pei o se fagafao a se aiga, ae o lo'o ia te ia lava le tomai fa'aleoleo lea ua mae'a ona a'oa'oina ai."

 

Ina ua fesiligia i latou ua agava'a mo lea galuega e tusa o ta'ifau nei ae faaalia e i latou, "Matou te manana'o uma lava e fa'afagafao e matou nai matou K9 pe a mae'a latou taimi lautogia mo le galuega Ua foliga mai nei K9 o nisi o matou fanau, ua sili atu lota fia mafuta fo'i i le ta'ifau ma fagaina lelei, nai lo le faatigaulu o lata fanau i le aiga,” o se tala lea a Tulia.

 

O i latou ua agava'a mai le Ofisa Tiute: Tavae Leovao Tulia, David B. McMoore, Sheehan S. Seigafo, Faifua Suafo'i Jr. ma le latou ta'ita'i o Iuliano Falaniko.