Ads by Google Ads by Google

To’a 6 sui o le Kapeneta fou a le Kovana ua mae’a ona tofia


Ni isi o totino o le kapeneta tuai a le ali’i kovana lea ua toe filifilia e fa’aauau la latou tautua mo le isi 4 tausaga o loo lumana’i nei. [ata AF]

Le sa avea ma Komesina o Keoleo i le 4 tausaga ua mavae atu, afioga Save Liuato Tuitele. [ata AF]
ausage@samoanews.com

E to’a 6 sui o le Kapeneta fou a le afioga i le ali’i kovana ia Lolo Matalasi Moliga ma le lutena kovana ia Lemanu Peleti Mauga ua mae’a ona tofia i le vaiaso na te’a nei, ao lumana’i ai le sauniga o le fa’atautoina o le nofoaiga fou i le itula e 12:00 i le aoauli nei.

 

O tofiga mo afioga i Fa’atonusili e pei ona fa’alauiloa mai e le Ofisa o le Kovana, ua tofia ai i latou e avea ma Fa’atonusili le tumau e fa’atali ai le aso e fa’amaonia ai a latou tofiga i luma o le Fono Faitulafono, se’i vagana ai le tofiga o le Failautusi o le Ofisa o Mataupu Tau Samoa ma le Sui Failautusi, o le taimi lava e tofia ai e le kovana, o le taimi fo’i lea e aloaia ai lea tofiga, e le tau mana’omia le tu’uina atu i luma o le Fono Faitulafono e fa’amaonia mai ai, e tusa ai ma le Fa’avae Toe Teuteu a Amerika Samoa.

 

E tusa ai ma le poloaiga na sainia e le ali’i kovana i le vaiaso na te’a nei, o le tofiga o le Failautusi o le Ofisa o Mataupu Tau Samoa ma le tofiga o le Sui Failautusi, o le a aloaia i le itula e 12:00 i le aoauli o le aso, aso 3 Ianuari 2017.

 

O sui fou o le Kapeneta a le kovana na fa’amaonia e ala i ni poloaiga sa ia sainia i le aso Faraile na te’a nei, e aofia ai le toe filifilia o le afioga i le Maoputasi ia Mauga Tasi Asuega e avea ma Failautusi o le Ofisa o Mataupu Tau Samoa, ma ua aloaia nei le avea o le afioga i le Maoputasi ma Failautusi o le Ofisa o le Faigamalo Fa’alotoifale.

 

O isi tofiga o le a fa’atoa aloaia le avea ma fa’atonusili pe afai e fa’amaonia mai e le Fono Faitulafono, e aofia ai le tofa a Talauega Eleasalo Ale lea ua toe filifilia e avea ma Loia Sili a le malo, o le afioga a Taimalelagi Dr. Claire Poumele lea ua toe filifilia e avea ma Fa’atonusili o le Pulega o Uafu ma Malaeva’alele, ma le susuga ia Ueligitone Tonumaipe’a lea ua toe filifilia e avea ma Teutupe a le malo.

 

O le tofa i le Tootoo ia Malemo Tausaga lea ua tofia e avea ma Sui Failautusi o le Ofisa o Mataupu Tau Samoa, e sui tulaga i le tofa i le Tama Matua ia Tuiagamoa Tavai lea ua filifilia e avea ma Senatoa fou o le Itumalo o Leasina/Atiulagi mo le isi 4 tausaga o loo lumana’i nei.

 

Mo le tofiga o le Komesina o Leoleo, ua filifilia i ai le tofa a Tuaolo Manaia Fruean na te tauaveina lenei tofiga mo le isi 4 tausaga o loo lumana’i nei, e sui tulaga ai i le afioga ia Save Liuato Tuitele sa ia tauaveina mai le tofiga ua mavae.

 

O le nofoaiga mulimuli a Togiola ma Faoa na tofia ai le tofa Tuaolo e avea ma Komesina o Leoleo, amata mai i le 2009 seia oo mai i le 2012.

 

O le ogatotonu o le tausaga e 2015 na filifilia ai o ia na te fa’aauauina le tofi Senatoa o le afioaga o Pago Pago, le tofiga sa ia tauaveina muamua, ina ua tofia e le afioga i le ali’i kovana ia Lolo le afioga i le Maoputasi ia Mauga sa avea ma Senatoa o Pago Pago, e avea ma Failautusi o le Ofisa o Mataupu Tau Samoa i le masina o Aperila 2015, e sui tulaga i le afioga i le Alo o Salamasina ia Satele Galu Satele.

 

O le fonotaga a le afioga i Pago Pago i le masina o Novema 2016, na toe filifilia ai Tuaolo e avea ma o latou senatoa mo le isi 4 tausaga o loo lumana’i nei, ae o le tofia ai e le alii kovana o Tuaolo e avea ma Komesina le tumau, ua avanoa ai loa le nofoa o le afioaga i Pago Pago, ma ua fa’amoemoe o se taimi o lenei masina o le a fono ai le afioaga mo le sailia o so latou sui fou.

 

Na taua e le afioga a Save i le Samoa News i se fa’atalatalanoaga i luga o le telefoni i le aso Faraile na te’a nei e fa’apea, e lei toe tuuina atu sana tusi talosaga mo le tofi Komesina i le taimi na tu’u aloaia atu ai lana tusi fa’amavae, ona e lua masina lea o le a aumau ai i fafo mo ana talavai, aemaise ai o le asiasi atu i fanau ma aiga.

 

O le po o le aso Faraile na te’a nei na malaga atu ai Save mo lana talavai i fafo fa’apea ai ma le malaga asiasi i fanau ma aiga.