Ads by Google Ads by Google

To’a 47 Leoleo pasia aoga mo a’upega ae to’a 24 agava’a umia a’upega

ausage@samoanews.com

Mai le to’a 47 o ali’i ma tama’ita’i Leoleo ua pasia aoaoga e agava’a ai i latou i le tauaveina o a’upega, e na o le to’a 24 Leoleo ua aloaia le tauaveina o a’upega i le taimi nei. I le iloiloga a le Komiti o le Puipuiga o le Saogalemu Lautele a le maota o sui sa faia i le vaiaso na te’a nei ma le Komesina o Leoleo, tofa Le’i Sonny Thompson, na tauaao atu ai e Le’i i afioga i faipule le lisi o leoleo uma ua pasia lenei suega.

 

O lo o aofia ai i le lisi o Leoleo ua taulimaina a’upega le tofa Le’i, atoa ai ma Leoleo o lo o umia tulaga ta’ita’i i totonu o le Matagaluega o Leoleo e aofia ai ‘commanders’, kapeteni, lutena, satini, ma ni isi o leoleo sinia.

 

O le iloiloga sa ta’ita’ia e le Ta’ita’i Komiti, afioga i le ali’i faipule ia Manumaua Wayne Wilson. O molimau e aofia ai le tofa Le’i, o sui komesina e to’alua ia Vaimaga Maiava ma le afioga i le matua ia Falana’ipupu Taase Sagapolutele, o le Pule o le Toese i Tafuna ia Tauese Vaaomala Sunia, ma le Pulesili o le Vaega o le Fuimu.

 

O se tasi o mataupu sa fesiligia i le taimi o le iloiloga, pe to’afia leoleo ua pasia aoaoga e tauave ai a’upega, ae aisea fo’i e fa’aaoga ai e leoleo a’upega i ni isi o taimi latou te taofia ai ta’avale i luga o le alatele.

 

Na taua e Le’i e fa’apea, e mafua ona fa’aaoga e leoleo a’upega i luga o le alatele i le taimi e fa’atino ai ni isi o latou tiute, e le ona o se taumafaiga e fa’aaoga ina ia manu’a ai se tagata, ae a vaai pea tagata i leoleo ma a latou a’upega, ona fa’aitiitia lea o latou gaioiga faasolitulafono e faia.

 

Na faailoa e Le’i i faipule e fa’apea, e fautua lava i ana ta’ita’i i soo se taimi latou te fono ai, soo se taimi latou te fa’aaogaina ai a’upega i taimi e taofia ai ta’avale e i ai a’upega ma fualaau fa’asaina, ia taumafai lava e saili se auala e fofo filemu ai le fa’afitauli, e aunoa ma se fa’alavelave e tula’i mai ai.

 

“O la’u tala lava lea e fai i a’u ta’ita’i i soo se taimi matou te fono ai, ia fofo fa’afitauli e tutupu mai i le taimi o galuega i le auala filemu”, o le saunoaga lea a Le’i.

 

O le mataupu lea na fa’aaoga ai e leoleo a’upega e taofi ai se ta’avale sa malaga ai i totonu se ulugali’i ma le la pepe e 4 tausaga le matua, na fa’amanino e le ali’i Komesina e fa’apea, na mafua ona taofia e leoleo lea ta’avale, ona sa i ai le tusi saisai e pu’e faapagota ai le Tama o le aiga, e mafua mai i se fa’alavelave sa ia fa’apapaina ai se fana i fafo o se fale kalapu i le po tonu sa faia ai le ta’aloga a le Super Bowl.

 

Saunoa Le’i e faapea, o le matuia o le tulaga sa i ai le mataupu, na mafua ai ona aga’i atu leoleo ma latou taofi le taavale i luga o le auala e fa’aaoga ai a’upega, ona sa i ai le manatu o lo o i ai a’upega i totonu o le ta’avale.

 

O le mataupu e pei ona molia ai le ali’i o Hapakuki Fatuaika lea na mafua ai ona fesili Manumaua i le Komesina, e fa’amanino le tulaga o le mataupu, atoa ai ma le fa’asea a le Tina i le fa’aaoga e leoleo o a’upega e taofi ai le latou ta’avale ao i ai lana tama i totonu o le ta’avale.

 

Na toe fa’amanino atili e Tauese i afioga i faipule e faapea, soo se taimi e tali atu ai leoleo i mataupu matuia faapenei e aofia ai a’upega, e muamua lava le saogalemu o le leoleo. O le taumafaiga fo’i e taofi le ta’avale i le aso e pei ona fesiligia, sa faia i lalo o le poloaiga mai le fa’amasinoga e pu’e fa’apagota ai lea ali’i.

 

“E le i mafaufauina e leoleo o le a i ai le Tina ma lana tama e 4 tausaga i totonu o le ta’avale, ae o mea fa’apea lava e tutupu i ni isi o taimi. Ae ui i lea tulaga, ia manatua pea le matuia o le mataupu, ona o lea sa aofia ai se a’upega sa fa’apa e ono aafia ai le saogalemu o tagata lautele”, o le saunoaga lea a Tauese.

 

I le tulaga o aoaoga mo leolelo ina ia faatuputeleina lea lo latou iloa e tauave ai a’upega, o le a toe faia le isi aoaoga i totonu o le 4 masina, ina ia fesoasoani ai pea i le a’otauina o leoleo i auala e fa’aleleia ai a latou galuega.