SATELE: UA OU SAUNI E AVE LE MATAUPU I LE FAAMASINOGA

E ui e le’i finagalo le afioga i le Alo o Salamasina ia Satele Galu Satele e toe fai sana saunoaga, faasaga i le mataupu i le fa’ate’aeseina o Availopa ‘Lopa’ Seti mai le faiganuu a Vailotai, peitai na pau lana saunoaga na tuuina mai i le Samoa News ina ua fesiligia o ia ananafi, ua ia sauni e ave le mataupu i le fa’amasinoga e pei ona faailoa atu e le loia a Lopa ia te ia i sana tusi.

“Ua ou sauni e ave le mataupu i luma o le fa’amasinoga, afai o le mana’o lea o Lopa ma lana loia, e le toe faia sa’u tala ae o le a ou sauni matou te feiloa’i i le Fa’amasinoga,” o le saunoaga lea a Satele i le Samoa News.

Na faamaonia mai foi e Satele lona tauaao ai o le tusi na tuuina atu i le loia a Lopa, le susuga Fiti Sunia e tusa ai o lenei mataupu, ma ua i’u lana fa’aiuga e le toe faia i ai sana fa’amatalaga.

Na fesiligia e le Samoa News le afioga Satele pe ua tuuina atu sana tali e tusa ai o le tusi  a le loia a Lopa ua maea ona tuuina atu ia te ia, na soisoi le Failautusi o le Ofisa o Mataupu Tau Samoa ma tali mai e faapea, e le avea sana tali e le toe fia talanoa fo’i faatatau i lenei mataupu.

Ae ina ua toe fesiligia le tofa Lopa e tusa ai o le finagalo o Satele, na ia taua ai lo la sauni ma lana loia e finau le mataupu i le isi laasaga e aofia ai le tuuina atu o se tagi i luma o le fa’amasinioga.

I le tusi na tuuina atu e Sunia i le aso 6 Iuni i le afioga a Satele ma le Sui Failautusi o le Ofisa o Mataupu Tau Samoa, le tofa Tuiagamoa Tavai, o lo o ia tuuina atu ai sana faatonuga ina ia oo atu i le aso 17 Iuni, o le aso Gafua lea o le vaiaso fou ua maea ona toe tuuina atu se tusi a Satele e toe liliu ai lana faaiuga ua faia e faate’a ese ai le tofa Lopa mai le faiganuu a Vailoatai.

E faapena fo’i mo le tofa a Tuiagamoa, o le aso 17 Iuni ua faatonuina e le loia ia oo atu ai ua maea ona toe tuuina atu se isi ana faaaliga ia Satele ma le afioaga o Vailoatai, e toe sui ai lana tusi na tuuina atu i le aso 13 Me 2013, e faailoa atu ai le lagolagoina e le Ofisa o Mataupu Tau Samoa o le faaiuga a Satele ma le pulega a alii ma faipule o Vailoatai ina ia faate’a Lopa ma le faiganuu.

Ae na taua e Sunia i lana tusi ia Tuiagamoa e faapea, afai e oo atu i le aso 17 Iuni 2013 na te le’i faatinoina le talosaga ua tuuina atu na te faia, e ono sailia e Lopa ni isi auala e aofia ai ma le tuuina atu o lenei mataupu i luma o le Fa’amasinoga faasaga i le malo o Amerika Samoa atoa ai ma le isi mataupu e faasaga ia te ia ma lona tagata.

Na faailoa e Sunia i lana tusi ia Tuiagamoa e faapea, e leai se malosi o le Ofisa o Mataupu Tau Samoa na te tuuina atu ai se faaiuga e pei ona ia faia i le aso 13 Me 2013 ia Satele ma Vailoatai.

Na faailoa e Sunia ia Tuiagamoa e faapea, o le tiute o le Ofisa o Mataupu Tau Samoa o le teuteu o mataupu e tulai mai ae le o le faia o faaiuga, ae afai foi e i ai se malosi o le Ofisa o Mataupu Tau Samoa faasaga i mataupu faapenei, e talitonu Sunia e le o sa’o le auala na faaaoga ai e Tuiagamoa lona tulaga o le Sui Failautusi, aua ua ia faia lea faaiuga ina ia faafiafia ai le finagalo o Satele o ia o le Failautusi o le Ofisa o Mataupu Tau Samoa.

Ae afai e i ai se malosi e faia ai lea faaiuga, lona uiga ua soon faaaoga i se auala le tatau ina ia faamalieina ai Satele o lo o avea ma Failautusi o le Ofisa o Mataupu Tau Samoa, ae o le tulaga e pito sili ai ona leaga lea tulaga, ua ia le amanaia ina ai tiute tauave a lea Ofisa e pei ona faataoto mai i le Faavae ma le Tulafono a Amerika Samoa, ma o lea faaiuga ua ia faia, e le gata ua ia le amanaina ai aia tatau a Lopa ma lona aiga, ae ua o se auala fo’i e tau faaleaga ai i le suafa Availopa.

I se vaega o le tusi a Sunia i le afioga Satele, e le gata o lo o ia taua ai le leai o se malosiaga o Satele na te faate’a ese ai Lopa mai le faiganuu a Vailoatai, ae ua ia tuuina atu foi le aso 17 Iuni 2013 e tatau ona oo atu i ai ua toe tuu atu se tusi a Satele e toe sui ai lana faaiuga ua maea ona faia faasaga ia Lopa, ae a leai, o le a tuuina atu e Lopa sana tagi i le faamasinoga faasaga ia te ia ona o le faaiuga ua ia faia e faate’a ese ai o ia mai Vailoatai.

Fai mai Sunia, o Lopa na filifilia e lona aiga na te tauaveina le suafa Availopa, ma e leai se isi po o mea e mafai ai ona taofi Lopa mai lona faaaogaina o le suafa i soo se mea e alu i ai o ia.

O le masina o Mati na tuuina atu ai e le pulega a Alii ma Faipule o Vailoatai sa latou faaiuga i le Ofisa o Mataupu Tau Samoa, e faate’a ai le tofa Lopa mai totonu o le faiganuu a Vailoatai.

O le faaiuga a Alii ma Faipule a Vailoatai e faate’a Lopa mai le faiganuu a Vailoatai, sa faavae mai i se fonotaga sa faia a le afioaga, lea na fesiligia ai e Lopa le afioga Satele i le faaaogaina o tupe a le afioaga na maua atu i le ta’i $1miliona a Falelima e tolu i le atunuu.

O lo o tu’uaia e Alii ma Faipule le tofa Lopa i lona le ava ia Satele faatasi ai ma sana saunoaga na lafo i le fa’aao o le afioaga ma le Itumalo.

Na taua e ni isi o sui o le afioaga o Vailoatai i le Samoa News e faapea, na pau le popolega o le afioaga i lenei mataupu, ona o lea ua oia ai le faatumutumuga o le afioaga ma le itumalo, ae o tulaga nei e tatau ona faapelepele i ai soo se matai Samoa, o le taumafai lea e puipui e ua faauluulu i ai se nuu, itumalo e oo lava foi i aiga.

Na fesiligia ni isi o matai po o i ai sa gaioiga a le pulega a alii ma faipule a Vailoatai faasaga i lenei mataupu, na tali le molimau e faapea, ua taoto atu lava le mataupu i le va o loia.