Ads by Google Ads by Google

LE FA’AMAONIA TU’UAIGA FA’ASAGA IA EMAU AMOSA

E le’i faamaonia e le Faamasinoga Faaitumalo tuuaiga faasaga ia Emau Amosa, i lona faia lea o ni faamatalaga tau faafefe i le Taitai o le Ofisa o Tupe a le falemai o le LBJ, ina ua maea ona faafofoga le faamasinoga i mau faamaonia uma o lenei mataupu, ma tuuina mai ai loa lana faasalaga i le masina na te’a nei.

O le faaiuga a le alii faamasino ia John Ward II e faaleaoga ai tuuaiga faasaga ia Amosa, na afua mai lea ina ua maea se faamasinoga iloilo (bench trial) na faia i le amataga o le masina na te’a nei i le va o Amosa ma le malo.

E leai se molimau na valaauina e le itu a Amosa, sei vagana ai molimau e toalua na valauaina e le itu a le malo e molimau, o i laua ia e aofia ai le na aafia i lenei mataupu, o ia foi lea o le Taitai o le Vaega o Tupe a le falemai o le LBJ ia Biola Babcock ma Anna Haggert, o ia lea o le Faatonu o le vaega o tagata faigaluega a le falema’i.

E ese mai i molimau faatauto na tuuina atu e i laua nei i le faamasinoga, sa faapea foi ona faafofoga le faamasinoga i taualumaga o le fonotaga i le va o Amosa ma Babcock sa pu’eina, lea na mafai ona ki i totonu o le potu faamasino ae faafofoga i ai loia, o molimau ma alii faamasino.

Ae i le maea ai ona iloilo e le faamasinoga o mau faamaonia uma e faatatau i lenei mataupu, sa faaiuina ai loa e Ward le le nofosala o Amosa i le tuuaiga a le malo faasaga ia te ia.

O le susuga a Amosa na tuuaia e le malo i le moliaga mama o lona faia lea o ni gaioiga e save’uina ai le filemu o tagata lautele, o se solitulafono B o solitulafono mama, lea e mafai ona faasala ai se tasi i le toese mo le umi e le silia i le 6 tausaga, pe faasala foi i le salatupe e le silia i le $500, po o le faasala foi i faasalaga uma ia e lua.

O lea tuuaiga na afua mai i se faalavelave na tulai mai i le taimi ao avea Amosa ma tagata faigaluega i le falemai o le LBJ i le vaega o Tupe, ina ua faia sa laua fonotaga ma le tamaitai sa faauluulu i ai le vaega o tupe a le falemai ia Viola Babcock i le amataga o le tausaga na te’a nei, e faatatau i le faatinoina e Amosa o ona tiute i lana galuega.

I lea fonotaga, sa tuuaia ai e le malo ia Amosa i lona faia o ni faamatalaga tau faamata’u e faafefe ai Babcock e faapea, o ia o le matai taua i totonu o lona aiga, e puipui foi e lona aiga o ia o le matai taua e ala i le fasiotia lea o tagata latou te faalumaina lo latou matai.