Ads by Google Ads by Google

Le auai CNMI Fa’aaliga Tu ma Aganuu Pasefika

O le vaiaso fou lea ua faamoemoe e tuua ai e le au malaga a le atunuu le teritori mo Solomona, e auai atu ai i le Faaaliga o Tu ma Aganuu a le Pasefika o le a faia ai, ma ua faailoa mai le le auai o le atunuu o le CNMI i lenei faamoemoe. O le au siva a le Kolisi Tuufaatasi lea na manumalo i faaaliga sa faia i le taimi o le sisiga fu’a ua filifilia e fai ma sui o le atunuu i lenei faamoemoe.

O le faaaliga lona 11 lenei o Tu ma Aganuu a le Pasefika talu ona amataina lenei faamoemoe, ma o Amerika Samoa na tali malo i le faaaliga lona 10 i le 2008. O le fonotaga i Solomona i le maea ai o lenei faamoemoe o le a iloa ai le atunuu o le a talimalo i le isi faaaliga lea e tai fa tausaga ma faia.

I se ripoti na tuuina mai e le Solomon Times o loo taua ai le faanoanoa o le CNMI ina ua le mafai ona malaga atu, e mafua mai i faaletonu o itu tau tupe mo ana tapena. Na faamaonia Angel S Hocog lea o loo faauluulu i a le Ofisa a le Arts Council le le malaga o le latiou au malaga.

I ni ripoti mai Solomona ua taua ai le auai atu o le malo o Ausetalia i lenei faamoemoe, ma e toa 50 le aofai o le latou aumalaga o le a fai ma sui o le atunuu. O le aofai foi lea o le aumalaga a Amerika Samoa e pei ona faamaonia mai e le faatonu ia Leala Elisara.

E ui o lea ua toe o se aga taunuu i le faamoemoe, ae ua faailoa mai e le malo o Solomona le lava tapena o lona atunuu i soo se itu uma e manaomia, ma ua tapena foi mo le siakiina o uta uma e ulufale atu i le atunuu ina ia mautinoa e saogalemu mea uma mo le faamoemoe.

E oo lava foi i le puipuiga i le saogalemu ua tapena uma i ai le atunuu o Solomona i lea tulaga, aemaise ai lava o le nofoaga i Honiara lea o le a faatautaia ai le faaaliga o le a toatele tagata e lolofi atu i ai, aemaise ai le silia i le toa 3,000 sui mai atunuu e 22  o le a faatasi atu i ai i lenei faamoemoe.

I Solomona lava ia, e tusa ma le 50,000 le faitau aofai o tagata o lona atunuu o loo i ai, lona uiga afai e faaopoopo atu i ai ma le isi toatele lea o le a malaga atu, o lona uiga o le a faatoateleina tagata i totonu o le aai ma nofoaga o le a tumutumu i ai lenei polokalame.

E oo mai lava i le vaiaso na tea nei o loo faia pea tapenaga a le malo o Solomona mo le tau faaleleia o noifoaga uma e manaomia mo le taligamalo.