Ads by Google Ads by Google

Lavea’i e le Seabourne Odyssey ia ni ali’i …

Samoa na tafefea

O alii fai faiva e toatolu mai Aleipata ia sa tafefea i le lua vaiaso talu ai, na toe maua i le aso ananafi, ina ua piki mai e le vaa meli o le Seabourne Odyssey, a’o aga’i mai mo lana tafaoga i Pago Pago, i le taeao ananafi.

O lea ripoti na mafai ona fa’amaonia mai e le susuga Lt. Steven Caskey, o ia lea o lo o fa’auluulu i ai le Ofisa o le U.S Coast Guard i Pago Pago.

Na ta’ua e Lt. Caskey e fa’apea, o alii fai faiva nei na maua e le va’a meli i le po o le Aso Toona’i, a’o aga’i mai i le taulaga i Pago Pago, sa togafitia e le foma’i e galue i luga o le meli.

“Ina ua taunuu mai le va’a, sa auina sa’o atu loa i latou i le falemai i Fagaalu mo nisi o togafitiga i lo latou soifua maloloina, ma o le taimi nei o lo o maloloina ma malolosi i latou,” o le saunoaga lea a Lt. Caskey, i se fa’atalatalanoaga ma le Samoa News i luga o le telefoni i le aoauli ananafi.

Na soisoi Lt. Caskey a’o ia fa’amatala i le Samoa News, le tala e uiga i lo latou fiu e saili alii fai faiva nei i le tasi le vaiaso, peitai o se tala fiafia ina ua maua mafai ona lavea’i i latou e le Seabourne.

E 17 aso na tafefea ai alii nei, e pei ona fa’amaonia mai e Lt. Caskey, ma o lo o faia feutanaiga a le Ofisa o le U.S Coast Guard ma le malo o Samoa, tauala atu i le Ofisa o Femalagaaiga mo le toe faafoia atu o i latou i Samoa, ma o lo o i ai le fa’amoemoe e tatau ona mae’a le aso po o taeao foi, ua toe taliu atu i latou nei i Samoa.

O fa’amatalaga na mafai ona maua e le Samoa News, na taua ai e faapea, o alii faifaiva nei sa malaga fagota i le lua vaiaso talu ai i le latou alia o le Fefe i le Sou II.

O le taeao o le Aso Gafua na tea nei, aso 6 Fepuari na o latou tu’ua ai Aleipata mo le latou fagotaga ma le fa’amoemoe, e toe fo’i ane i le isi aso e soso’o ai, peitai ina ua siliga ma le taimi fa’atulagaina sa tatau ona toe fo’i atu ai lenei faigafaiva, na amata loa ona fa’afeso’ota’i ofisa a leoleo ma matagaluega e puipuia gataifale.

Ina ua salalau ripoti i le tafefea ai o alii fai faiva nei, na faia ai loa se sailiga mo i latou e le vaega a le US Coast Guard, o le vaega a le Samoa Maritime ma se vaega suesue mai Niu Sila, peitai na taofia lea sailiga i le maea ai o le vaiaso e lei maua lava i latou nei.

E le o manino mai i le taimi na tusia ai lenei ripoti le tulaga o le soifua maloloina o alii fai faiva i le taimi na taunuu mai ai i le atunuu i le aso ananafi.

Na malaga atu le tusitala a le Samoa News i le falema’i mo se fa’atalanoaga ma nei ali’i, ae peita’i, ua mae’a ona togafitia i latou ma toe faimalaga ese ma sui o le malo.

O se tala fiafia lenei mo aiga o nei alii fai faiva pe afai latou te maua se tala e uiga i le galuega lelei sa faatinoina e le vaa meli ma lana auvaa, ao malaga asiasi mai ai i le aso malolo ananafi e faapitoa mo le Aso Peresetene.

E lei umi se taimi na i ai le Seabourne Odyssey i le atunuu ae toe malaga ese atu i le aoauli ananafi i le itula e 1:00.

Mai vaa meli o lo o agai mai pea i le teritori i lenei tausaga atoa ai ma tausaga ua mavae, o se tasi lenei o va’a meli pito sili ona laititi toe toalaiti lana pasese, lea e pei ona i ai le aofai e tusa ma le 450 le pasese, ma le auvaa e tusa ma le toa 335.

E ui o ananafi le aso malolo, ae sa va’aia lava le toatele o turisi sa feoai solo i le taulaga mo faatauga.

O le toatele foi o i latou sa faia nai a latou faatauga  laiti mo mea taulima, o nisi sa tietie pasi ma taxi taamilo i le atunuu, ae o nisi sa fiafia e savavali i sasae ma sisifo o le taulaga, e aofia ai ma nisi sa taeele i le taelega i Utulei.