Lava Saunia Tausaga A’oga Fou mo le Autalavou Siteki a Pago Tutotonu

E ui ina “sa vao’eseese, ae ua toe fuifui fa’atasi” le fuifui lupe o foaga a le Ekalesia a Iesu Keriso o le Au Pa’ia o Aso e Gata Ai i le Siteki Tutotonu, ina ua mae’a le tele o polokalama sa fa’atautaia i le vaitau atoa o le tu’uaga sa fa’atasi atu i ai nisi, ae o nisi fo’i sa nofo fa’atali mo le toe ta lenei o polokalama fa’apitoa mo i latou le Autalavou, e tapena e le latou siteki.

 

O le latou koneferenisi lenei, e lua aso atoaota ae fa’amae’a i le afiafi o le aso To’ona’i e faia ai le latou sauniga fa’aleagaga ma tutu ai latou sulu!

 

O nisi sa malaga atu i Samoa e asia le Malumalu Sa ma sa avea lea ma sini i o latou fa’amoemoe a’o savalia le taimi e to’ai taunu’u ai i lea vaitau! O se malaga sa matua aoga mo i latou na o, ma ua fa’ailoa mai e i latou, “E tatau ona e uia lea ala lelei, a’o saunia oe mo se faiva aoga mo le Ekalesia i le lumana’i, o le avea lea o oe ma se tasi o Misiona Tala’i.”

 

Peita’i, ua mautu ma maua’a le fa’atautaiga o nei polokalama uma a le Ekalesia, ina ia saunia lelei o latou olaga talavou, ia tau le taua o lu’iga nei, ma ia manumalo ai, ia fa’amuamua le ola mama ma savalia le ala o le amio lelei.

 

O le nofoaga lea ua tapena mo lea fa’amoemoe lelei, o le Hall tele i Mesepa na amatalia ai i le taeao ananafi lea koneferenisi, lea ua mae’a tusia o latou suafa ma lesitalaina. Ona vaevaea lea i vaega e lua e fa’atino ai nisi o polokalama ae fa’ai’u i le siva fa’amasani anapo.

 

Ua fa’atulaga le ala usu i le taeao i le lotoa a Tafuna Elementary ina ia faia ai se galuega fa’amama, ae matua fuli ai i le latou Fireside i le afiafi. O i’ina o le a maua ai e i latou se avanoa e fesiligia ai se fesoasoani mai a o latou ta’ita’i, ma latou fa’alogologo ai fo’i i ni tima’iga mai o latou Peresetene o Autalavou a lo latou Siteki.

 

E tusa ai o se manatu fa’aalia Bro. Mamea, le Peresetene o Autalavou Ali’i a le Siteki Tutotonu, sa ia fa’ailoa ai, “O le auga tonu lava lea o le fa’atasiga lenei a le Autalavou, ina ia fa’afesili e i latou ni mea e le o malamalama lelei ai, i ni a latou fa’ai’uga, po’o ni filifiliga tatau e tusa o ni fa’afitauli o lo’o latou feagai ai, ina ia mafai ona fa’afaigofie le latou folauga i lea fo’i tausaga a’oga o le a savalia nei, ma le olaga talavou lava latou.”

 

“O le isi lea fa’anaunauta’iga, ia savavali le fanau i ala pa’ia, ina ia fa’atumauina lo latou ola fa’apa’iaina!” O se isi lea ana fa’aopoopo mai.

 

O le Siteki Tutotonu o lo’o ta’ita’ia lea e Peresetene Starlite Lotulelei, e aofia ai ma ona faufautua fa’apitoa Pres.Sikaleti Ma’ukoloa ma Pres. Fa’asega Tanielu, ma o i latou lea o lo’o i ai le latou fa’amalumaluga i le fitu Uarota o lo’o tu’ufa’atasia i ai afio’aga o Iliili, Tafuna ma Mesepa e aofia ai ma le Uarota a Uso mai Tonga.

 

 

Comment Here