Faamasino 7:1-14, Ioane 9:13-23

O le tagata e ola mai o tauaso, lea na feanu (tulou) loa Iesu i le palapala, ua nini mata o le tauaso i le palapala, ma tuli e alu i le taelega i Seloa ma taele ai pe mulumulu ai, ona pupula lea o ana mata.  A'o le aso Sa le aso lea na fai ai le faamalomaloga lea a Iesu.

I le vaitaimi tonu na faailoga ai le 'Tausamiga o le Faleapitaga' ma le 'Tausamiga o le Faaulufaleina', aua o vaitaimi malulu lea i Ierusalema lea na faatino ai le faia ai le vavega lenei.

E pei o le a le fiti o le 'au farasaio ina ua mautinoa o le tagata tauaso lea ua pupula, tiga ona latou vaai ai i aso uma o le tagata tauaso a'o lea ua toe pupula mai. Ua oo i matua o le tagata sa tauaso, ua aumai ma fesiligia, ae lilo ai le mea na manoa a le 'aufarasaio, ia aua nei talitonu tagata ia Iesu.

O le mea lava e lelei ai o le fai atu lava i le tagata tauaso, ae ta'u sa'o mai e le tagata le mea moni ua vaai o ia i ai, o Iesu o le Faaola mo le lalolagi, pe moni lou faatuatua ia te Ia.

Lea na fetalai ai Iesu i le mataupu e 8:12, 'Ona fetalai atu lea o Iesu ia te te latou, 'O 'au nei o le malamala o le lalolagi, o le mulimuli mai ia te 'au e le savali o ia i le pouliuli, a e ia te ia le malamala le pouliuli, a e ia te ia le malamala o le ola.'

O le faamatalaga a Ioane o le galuega na faia e Iesu, e ta'u mai ai le ola faatuatua a le Alii Faaola, e i ai le fasi fuaupu lea na faia i le (4.10,) 'Ua tali atu Iesu ia te ia, "Ana e iloa le mea foai fua a le Atua, ma le ua fai atu ia te oe, Au mai ia te 'au, ou te inu, po ua e ole mai ia te ia, ona foai atu lea e ia ia te oe le vaiola."

O mea uma a Iesu na faia i lona faatuatua, ia tau atu ai i le tagata soifua, e i ai le fuaitau lea na faia mai i le (7:37) e faapea, 'O le toe aso, o le aso tele o le tausamiga, ua tulai ai Iesu, ma alaga, ua faapea atu, "Afai e fia inu se tasi, ina sau ia te au e inu ai."

Ia ma tau atu ai Iesu le Ola e Faavavau, e pei o le fuaiupu e (6:27), 'Aua tou te galulue i mea e 'ai e pala, a o mea e 'ai e tumau i le ola faavavau, e foaiina atu ia te outou e le Atalii o le tagata; aua ua faaalitinoina mai o ia e le Atua le Tama."

I le amataga o le Feagaiga Tuai lea e taua mai i le (Esoto 4:11) "Ona fetalai mai lea o le alii ia te ia, O ai ea na na faia le gugu, po o le tutuli, po o le vaai, po o le tauaso ?”

Lea na toe tali mai ai le (Salamo 146:8) e faapea, "E tatala e le Alii i e ua noanoatia, e faafepulafia e le Alii e ua tauaso, e faatutusa'oina e le Alii i e ua faano'uno'u; e alofa le Alii i e amiotonu."

O le Atua lava na fetalai mai i le Feagaiga Tuai i le (Isaia 42:,7) "E faapupula i mata o e tauaso, e aumaia i fafo nai le fale puipui le ua fusifusia, atoa ma e ua nonofo i le pogisa ia aumaia i latou nai le fale ua taofiina ai."

Le tagatagai lena a le tagata ua fia ola i le Ola e Faavavau, e tumau pea lona ola i le Atua e tumau pea lona ola i vavega na faia e le Atua, aua e manumalo pea vavega a le Atua i o outou finagalo ma mafaufau.

I le tusi lea i le Feagaiga Tuai, na silifia lelei e le Atua le manatu o le tagata ola ma lona finagalo, e 32,000 afe tagata ma aoina mai e Kitiona mo le latou taua lea ma Mitiana, ae fai Atua ia Kitiona, e le finagalo ai le Atua, ina ne'i te'i ua faapea se manatu o Isaraelu, o lona malosi na fai ai le taua.

E faaalia pea le malosi o le Atua i lona nu'u filifilia, a finagalo lava i ai le Atua, e 300 pe 100 pe 50, e faaali ai lona mana ma ona vavega, e manumalo lava le faalagolago i le finagalo a le Atua, i soo se mea e faia, e manumalo le mea moni. 'E le tau masina le tagata ola ma le mea e finagalo i ai le Atua.' e moni ma faamaoni mea uma na te faia i lona silafia ma lona finagalo paia, E MANUMALO PEA VAVEGA O LE ATUA. Amene.