"O LE FEFE E FAALUMAINA AI"

(1 Samuelu 17: 1-17. ) O le faaaliga lea o le mana ma le maoa'e o le finagalo a le Atua Soifua, ma lona le toe manao ia Saulo le tupu muamua a Isaraelu.

Ua fai lava le malosi o le Malo o Isaraelu ma mea ua fefefe uma ai malo tuaoi e i ai Moapi, Amoni, Etoma Sopa, ma Filisitia. Na tau uma lava ma malo ia, ae tau ma le malo o Amaleka, ua fai lava le poto o Saulo e le Atua Soifua, ua uma na fasi uma tagata atoa ai ma mea uma na maua i totonu o Amaleka.

Ae ua faasao mai povi, mamoe, atoa ai ma tamai povi ua le toe mafai ona faaumatia ae o manu leaga ma mama'i ua faaumatia. Lena na totama'i ai loa le Finagalo o le Atua Soifua ia Saulo, 'ua le faia lona Finagalo ae ua fai i le manao a Saulo'.

Ua leva ua tau Isaraelu ma Filisitia, o le mea ua tupu, ua to'aitiiti le 'autau a Filisitia.

Ae o le faalogo tala Filisitia ua le toe manao i ai le Atua Soifua, ia lena na toe o mai ai foi ma tolauapi i le isi itu o Suka ma Aseka i Efesetame. Lena na latou aumaia ai loa le latou toa poo le siamupini o Koriata, ua le mananao i tau ae su'esu'e paga mai i le 'autau a Isaraelu, e tau ma Koriata.

'O LE FEFE E FAALUMAINA AI' ua 40 aso o fai mai lava le sauniga lea a Koriata, "O le a le mea tou te o mai ai e tofi le taua? E le o a'u ea le Filisitia, a o outou o auauna a Saulo outou? filifili ia e outou se tagata e alu ifo ia te a'u; afai na te mafaia ona ma tau, ma fasi ma auauna ia te outou; a e afai ou te malo ia te ia, ma ou fasi ia te ia, ona fai lea outou ma a matou auauna, e auauna mai ia te i matou."

O aso e fa selufu ma le tasi na faaeaina ai i luga le mamalu o Tavita e le Atua Soifua, ina ua fasiotia Koriata. Le aso lena na lalafi ai tagata na tu'u i ai le faamoemoega o le atunu'u, o le tinifu ma tagata matutua uma lava o Isaraelu.

Na ave uma o latou talitonuga ma latou ola ma tu'u uma i luga o latou tauau, ao lenei ua fa sefulu aso o faifai mai lava Koriata ia te'i latou.

Ua leai se faatuatuaga faatama i le tinifu ma tagata ua matutua poo tagata 'ua talifau', le 'autau ua pala'aai uma ia Koriata.

E le iloa pe a uma loa le aso ona alu lea o Koriata ua fai le taliega ma le 'autau a Filisitia, faapea atu Koriata, "Sole lenei ua masina atoa oute le'i vaai atu lava ia Saulo…ua maka'i palaai lava."

E manuia uma mea na faia pe'a usitai i le Atua ma Loto atoa ma le Agaga atoa, o le ta'ita'i faamaoni ma usita'i i lona Atua.

O oe o le tama e avatu uma i ai le faamoemoega o le aiga atoa ia te oe, o oe e te ta'ita'i i latou i ala uma e Finagalo i ai le Atua, i taimi uma, i aso uma ma le Olaga lenei e faavavau lava. Manuia le Aso Sa o tama. Amene.