"O LE AIGA MAU, E FALE FA'ATASI MA LE ALI'I"

O le fafine o lo'o taua i totonu o le tusi lea o le Fa'ataoto 31, o se fafine e matu'ai 'ese mai lava i le tele o fafine o le olaga lenei. E fiafia uma ai lona aiga, ma aiga o lona to'alua, ma lona fanau ma lona aiga atoa ae maise ai le Atua.

E fai uma ona tiute i totonu o lona aiga, e fiafia ai tagata e o atu i lona fale, aua e le maua ai se fa'auu, misa, mata fa'asiasia, po'o le 'ai u.

Ae a le fafine leaga, e fa'alogo mai tagata nao mea leaga e fai atu i ai, e le fiafia i ai tagata e o mai i lona fale, e fiafia e fai tala a isi fafine.

O le fafine lelei e le faia e ia se mea e maasiasi ai lona tane i luma o tagata, po'o le aiga a ia po'o le aiga o lona tane, e fiafia uma tagata ia te ia.

E sili lona tau i penina tau tele, e maona fua le tagata e ulufale mai i totonu o lona fale ma e fiafia uma le aiga o le tane e fiafia tagata e o uma i ai, e talie uma tagata uma i lana amio lelei.

Fai mai ai Martin Luther i lana toalua, "O le meaalofa sili lea na aumai i le Atua, o le fafine lelei i ona uiga toe lelei i le va ma tagata, le fafine e to'aga i le lotu ma e 'ava foi i le Atua, alofa i lona aiga atoa ma aiga o lona tane, ma e fiafia tagata uma ona o ia."

O le tele o aiga ua le toe maua le mea lena na sau ai i vaitaimi ia, o le lotu i le afiafi ma le fanau i afiafi uma, a uma ona fai lea o le mea'ai soso'o ai loa ma fiaga o mea aoga, ona fa'atoa fai le lotu i le taimi e momoe ai.

Ua tau le faia le finagalo o le sa'o o le aiga, ae fai uma mea nei e mana'o i ai le fafine toalua, (1) Talu ai e fefe le tou tama i lana toalua. (2) O lena aiga e pisa lava e aso uma e potopoto ai le aiga, ona o le le sa'o mai o le tagata lea ua tu'u i ai le aiga le vaaiga o aiga.

E tusa o ia ma va'a o le fa'atauoa, e mamao le mea e aumai ana mea e 'ai. Ua tautala o ia ma le poto, ua i lona laulaufaiva le tulafono o le alofa, ua va'ava'ai o ia i amioga a lona aiga, e le 'ai foi o ia mea e 'ai a le paie.

E toatele fafine e amio lelei i latou uma, o le matagofie e pepelo lea, o le mea faatauvaa le lalelei, a o le fafine ua mata'u i le Ali'i e viia lava o ia.

Avatu ia te ia le fua o ona lima, o ana galuega foi e viia ai o ia i le faitotoa.

Le Bingo ua fai lea ma ala o le malaia, le mea leaga ae tiai le fanau iti e vaai e le tamaloa ae usu fo'i le faigaluega i le taeao, o le mea na e alu atu nei i le fia maua mai o se tupe.

Ua e sau fo'i i le fale ma le tiapolo, aua e ne'i te'i lava ua mao le sese o se tala o le tamaloa e fai atu, ia e pei o le i'a feai le fai o tala, "Oi e tigaina le mea e fai atu feau i le fale ae fai mai e tau tu'u alu so'o i le Bingo, ua e iloa o se pologa le mea nei….."

A ua galo le fanau laiti lena o lo'o pupula lava mata, e pei o mea pu'e ata ia a latou mafaufau, aua o le mea na vaai fo'i latou ia i le ai sa e faia.

Fai mai le upu, "E te fiu lava e tuli le tupe e le maua, na o le mea lena ua tele ai ina tutupu nei fa'alavelave i alo ma fanau. A o le la lava e tuli le tupe, a maua i le po lenei, e toe gau fo'i i le vaiaso a sau. E mase'ese'e le tupe e le mafai ona 'uu i lou lima le mea lena o le tupe. O le ta'amilosaga lava lena o mea nei o tupe."

Manatua e fai le tatou matua, "O LE AIGA MAU,E FA'ATASI MA LE ALI'I."

E tasi lava le mea moni ma le faamaoni o le tulivae lava i le Atua, ta'u uma i ai mea o lo'o tatou matitiva ai ma le olaga lenei i isi uso a tagata, tau i ai i le Atua, ua leva ona silafia e le Atua mea o loo e vaivai ai.

Pei ona fai mai le Salamo 23 "O le Ali'i o lo'u leoleo mamoe o ia, e leai se mea e te mativa ai na ave a'u i le mea e i ai le vao mu'a ou te taoto ai."

Amene.