Ads by Google Ads by Google

Lau toe Ta - Mau ai le Fao!

Ua sauni le Leationie mo le toe taeao nai Moamoa, e le o se faiva e mautinoa lava se’iloga ua ivi le filigaimalae, peita’i, ia tautuana le tulaga ta’alo mama, ta’alo fa’atausala aua e le o se polo e na’o oe, ae o le polo e kiki atu kiki mai!

Ua manino le mata o le vai, sa tau fa’anenefu mai le amataga o le filigamaea, ae o lea ua tula’i o le a su’e lava le ‘auro i le afi, o le taeao ma le mea e tupu ai! Ia ta’i alalo le i’a a Sa Sa’umani, aua lava ma le fa’amaualuga, aua e leai se mea e maua ai, na’o le fefulituaa’i ma le maua ai se mea lelei.

Sa tatou faifai upu, ma afua ai le tele o mau fa’amatalaga e fesoua’i ai fua le tai o finagalo, peita’i, lea lava ua o’o i le taimi e fa’ailo ai e le Atua Ta’ita’i, o ai lava e tula’i mai, ia tatou fai le faiva o fa’aaloalo, ia talisapaia ma ia mulimulita’i i ana ta’ita’iga.

Ou te fa’afetai i le nofoa’iga a Togiola, e tele mea ua mae’a ma fa’atulaga lelei, ona o lau fo’i fa’autaga sa tula’i mai ma e fai! E ui ina tetele Pesega, ae sa tua atu i lau fa’atamali’i le atunu’u sa’i i le tele o faitioga. Manatu, o le mea lava e masani ai so’o se malo, ae le taofia ai le taumafaiga e fa’aleleia nisi mea sa alia’i mai e ao ina fa’amuamua.

O lo’u lava manatu, e ao ina matua va’ai toto’a le malo e faia se matagaluega po’o se ofisa autu e talosagaina ai so’o se tupe atofa [grants] mo so’o se matagaluega o le Malo, ae maise le tele o NGOs, ia le tau o i latou e tusi, ae ia tusia ma galulue fa’atasi ma nai na fa’alapotopotoga ia fa’ateleina ma fa’aumiumi ona maua na vaega tupe e nai o tatou asosi i totonu o lea atunu’u.

Afai ae to’aselau nisi e faigaluega i lena matagaluega, ona e ausia e i latou le matati’a o le lelei o le fa’aperetania tusitusi ma ala e talosagaina ai e i latou vaega tupe atofa na mo fa’alapotopotoga, e le toe tigaina le atunu’u e fa’aleleia le tele o galuega e tatau ona fa’atino e le Malo i ana matagaluega ta’itasi.

O nai motuga’afa na e mafai ona filifili toto’a ai se isi ta’ita’i e tula’i mai, aua e le o toe mamao, ae tatou iloa le finagalo o le atunu’u e ala i lana palota. Sole va’ai vaega tupe ma mea na toina mai e fa’aaoga sa’o i ai, ma tausaili atili ala e mafai ona fa’aauau ai pea le ‘aumaia o nei vaega tupe, ia le motu ona ua lusi le fuafuaga fa’ataoto e soso’o ai le galuea’ina o na vaega tupe!

Ou te iloa o le isi lea ala e mafai ai ona fa’atupe fo’i le Falema’i latou, talosaga solo i isi vaega tupe e fa’aleleia atili ai le nofoaga e tautua mai ai le atunu’u i lo latou togafitiga, po’o ituaiga fa’ama’i tuga, lea e masani ona tele vaega tupe e mafai ona atofa mai ai, tu’u i nisi sosaiete e fa’agaoioia ai, ae ia lava le toe siaki e lea matagaluega, po’o fa’atautaia sa’o galuega ma fa’aalu sa’o i ai nei tinoitupe.