E lata i le $5 miliona le fa’aopoopoga i le paketi a le Matagaluega o Aoga a le malo e pei ona fa’alauiloa e le kovana sili i le vaiaso na te’a nei, e fesoasoani ai i le faaleleia atili o le auaunaga a le matagaluega mo a’oa’oga a fanau a le atunuu.

Na taua e le tofa Matalasi Moliga i luma o le kapeneta i le Aso Lulu na te’a nei e faapea, o se ulua’i taimi lenei ua faia ai se faaopoopoga faapenei i le paketi a le matagaluega o aoga, mai le tele o tausaga ua tuana’i atu.

O se tasi o manulauti ua uma ona folafola e le alii kovana i le matagaluega o aoga i le tausaga nei, o le siitia lea o totogi o faiaoga, ina ia talafeagai le maualuluga o a latou faailoga ua maua ma le totogi e avatu e le malo.

 E 20% lea ua maualuga ai le Paketi e $7.4 miliona a le matagaluega o aoga mo le Tausaga Tupe 2014 nai lo le paketi e $6.1 miliona o le Tausaga Tupe lenei 2013.

E $5.9 miliona o lo o faaalu e le matagaluega o aoga i totogi o faiaoga ma tagata faigaluega i le tausaga tupe lenei, ae o lea ua suia i le $6.1 miliona mo le tausaga tupe fou, tusa lea e 3% le faaopoopoga ua i ai.

O faaopoopoga tetele i le paketi a le matagaluega o aoga e aofia ai le silia i le $35,000 ua faaopoopo mo galuega e pei o le toe fausia ma le toe faafouina o fale aoga (contractual services), ma le $90,000 lea ua faaopoopo i le faatauina o mea e faaaoga i aoga a le fanau (materials & supplies).

O ni isi o fa’amatalaga ua maea ona tuuina atu i le alii kovana mai le matagaluega o aoga, o ni isi o taimi e faaalu ai e faiaoga tupe mai a latou taga e faatau ai mea faitino e faaaoga i aoga a le fanau, ona e le lava sapalai o lo o tuuina atu i aoga ta’itasi.

Mo se ta’ita’iga o se tasi o aoga i Manu’a na asia e le kovana i le masina o Me na te’a nei, lea na maofa ai le kovana ma le kapeneta i le matagofie o le teuteuina o ni isi o potu aoga, atoa ai ma le mautu o mea faitino e faatino ai aoga a le fanau, peita’i na iloa mulimuli ane e le kovana, o le tele o sapalai nei sa faatauina lava e le faiaoga.

I le tulaga o le toe fausia ma le toe faafouina o faleaoga ma fale taalo i aoga maualuluga i le atunuu, o le isi lea faamoemoe e pei ona taua e le alii kovana i ni isi o fonotaga a le kapeneta ua mavae atu, ina ia toe faafouina uma fale taalo a aoga ina ia mafai ona faaaoga i ni isi taimi e fai ai aoga mo le fanau po o galuega faa ofisa, ma taofia ai tulaga faaletonu o lo o maitauina i le taimi nei, i le faigofie lea ona sao i ai le timu pe a tetele timuga.

O le faaopoopoga pito maualuga o le silia il e $900,000 lea ua faaopoopo i isi tautua (all others)

O ni isi o vaega o le a faamalosia i le matagaluega o aoga e pei ona faalauiloa e le Faatonusili ia Vaitinasa Dr. Salu Hunkin Finau i le kapeneta, o le siitia lea i luga o faagaioiga mo aoga maualuluga, unaia faiaoga ina ia lava tapena mo le aoaoina o fanau, ma ia faia fo’i ni aoaoga e toe faalautele ai le silafia o le faiaoga mo le aoaoina o vasega ta’itasi.

Ua i ai le fa’amoemoe o le a iloiloina e le Fono Faitulafono le paketi a le malo mo le tausaga tupe fou, pe afai ae toe a’e atu le fono i le aso 19 Aokuso 2013 mai lana malologa e tolu vaiaso e pei ona faagasolo i le taimi nei.

A’o lumana’i ai le iloiloina e le fono o le paketi a le malo, ua fautuaina e le alii kovana lana kapeneta ina ia sauni e molimau mo le paketi, ma ia tasi fo’i le leo latou te molimau ai i luma o le fono, ina ia atagia atu ai e le gata e tasi le leo o lo o ta’ita’iina ai le malo ae loto gatasi uma fo’i le faigamalo i fa’aiuga ua latou faia i le paketi.