Ads by Google Ads by Google

Lata $40,000 tuuaia na gaoia e se tamaitai

E lata i le $40,000 se tinoitupe ua tuuaia ai nei e le malo le tamaitai o Leaga Oa, sa ia gaoia mai le kamupani na galue muamua ai. O ia tupe e aofia ai le $38,528.04 sa ia  talaina i  ni siaki sa ia saini faamalosi, ma le $4,530 o le totogi a le faletupe mo siaki sa toe fa’afo’i.

O Leaga sa galue i le vaega o tupe a le kamupani a le Kooline Refrigeration Samoa Ltd i Tafuna.

O le mataupu lenei na tofu atu i le Ofisa o Leoleo i Tafuna ona o se tagi na faaulu e le pule o le kamupani, ina ua ia masalomia le i ai o ni siaki a lana kamupani sa saini faamalosi ai e Leaga lona igoa ae tala i se faleoloa.

I faamaumauga a le faamasinoga o lo o taua ai e faapea, o le aso 27 Fepuari 2012 na fesiligia ai e le pule o le kamupani ia Leaga ona o ni siaki e ono a le kamupani ua leiloa po o fea ua ave i ai, leai se ripoti tau tupe faale masina, faapea ma se siaki na toe faafoi mai i se faleoloa.

Fai mai faamaumauga a le faamasinoga, na tagi le ula lea ma tautino i lona pule, e sa’o sa ia talaina le siaki lea e tasi.

Na augani le ua molia i lona pule e faamagalo o ia, ae o ia o le a faamavae ona o le aso lea e alu ai i Apia.  Na toe fesiligia e le alii pule ia Leaga po o fea uma isi siaki, ae na tali le tamaitai, ua uma ona tia’i.

O le aso 28 o Fepuari, na alu ai loa le alii pule i le faletupe o le ANZ i Tafuna ma piki mai ai faamaumauga o teugatupe a le kamupani mo le masina o Ianuari ma Fepuari, ma ia maua ai faamaumauga i siaki e fa ua uma ona tala e Leaga, ae e le’i maua i totonu o faamaumauga isi siaki e lua.

E $3,025.13 le aofai o le tupe na tala e Leaga mai siaki ia e fa lea sa saini faamalosi ai e le ua molia lona igoa.

Sa faaauau suesuega a le alii pule i faila a le kamupani, ina ua masalomia e ono tele ni isi siaki na saini faamalosi e le ua molia i totonu o tausaga e lua ao galue mo le kamupani, ae o le taimi foi lea ua faagasolo ai suesuega a le Ofisa o Leoleo, e ala i le fesiligia o le faleoloa lea na faafoi atu ai ni isi o siaki a le kamupani.

Na faailoa e le alii pule o le faleoloa i leoleo e faapea, toeititi lava o aso uma e alu atu ai se tagata faigaluega a le kamupani ma se siaki e fia tala, o lana galuega o le siaki lea o le saini o lo o i luga o le siaki pe tutusa ma le saini a le alii pule.

Na taua foi e le pule o le faleoloa i Leoleo, e tele siaki a le kamupani sa alu atu le ua molia ma tala mai i lona faleoloa.

O le taeao o le aso 2 o Mati 2012 na vili ai Leaga i le fale o lana pule, faatoese atu i luga o le telefoni i le toalua o le alii pule e alofa faamagalo o ia, ma toe ave i tua le tagi ua i luma o leoleo.

I le aoauli o le aso lava lea na toe telefoni ai  Leaga i le fale o lana pule, ma tautino i ai e le na o le tasi se siaki sa ia sainia, ae tele isi siaki sa ia saini faamalosi, talu mai le tausaga e 2010.

O le aso 20 o Mati na toe alu ai le alii pule o le kamupani i le ofisa o leoleo faamaumauga a le kamupani, lea o lo o taua ai isi siaki e 54 ua maua sa saini e Leaga, talu mai le aso 9 o Fepuari 2011 e oo mai ia Ianuari 13, 2012.

O siaki uma lava na tala e Leaga, sa ia saini faamalosi ai le igoa o lana pule i se auala faasolitulafono.

O le masina fou lea ua toe tolopo i ai le mataupu a Leaga ina ua tulai i luma o le Faamasinoga Maualuga i le vaiaso nei, ma o lo o taofia pea o ia i le toese i Tafuna, sei vagana ua ia totogia le $10,000 ona faatoa mafai lea ona tatala o ia i tua.