E lata i le $300,000 le tupe lea ua faailoa mai e le Matagaluega o Faamasinoga a le malo tele o Amerika, e tatau ona totogi e Gustuv Nauer, ona o le mataupu lea na aafia ai faiga tau faasese e pei ona tulai mai i le va o le malo feterale ma le alii sa avea ma Taitai o le vaega o Pasi Aoga a le Matagaluega o Aoga i Amerika Samoa nei.

I faamaumauga a le malo na taua ai e faapea, o le aofaiga lea e lata i le $300,000 ua latou faailoa mai, o le tupe atoa lea sa maua e le ua molia mai gaioiga sa aafia ai o ia i lenei mataupu.

E pei ona taua i le ripoti a le malo e uiga i le tupe e tatau o na toe totogi ai, sa mafai ai ona tuu faatasia le aofaiga e $292,569.99, o le tupe lea e manatu le malo sa aofia i lenei gaioiga.

O le aso  5 Mati lea ua faatulaga e lau ina ai le faasalaga o Nauer i le faamasinoga feterale i Honolulu, ina ua tausalaina o ia i le moliaga o lona fesoasoani lea i le faatinoina o se solitulafono, ma o lea moliaga e ono mafai ona faasala ai o ia i le toese mo le umi e le silia ma le 5 tausaga, poo le salatupe e le silia ma le $250,000.

I se pepa o faamatalaga na tuuina atu e le malo i le amataga o le masina nei e uiga i se faasalaga mo Nauer, e le o aofia ai ni faamatalaga auiliili sei vagana ai lo latou faapea atu i le faamasinoga, e le o faatuiese le malo i soo se faasalaga e ono mafai ona tuuina atu i lenei mataupu, e pei foi ona taua i le latou ripoti e uiga i suesuega sa faia i le aso 18 Aperila 2011.

O le alii o Nauer, 47 tausaga le matua na tali ioe ia Ianuari 2011 i le moliaga o lona taupulepule lea ma se isi tagata e faatino le solitulafono o le faia lea o ni faiga faaalatua i polokalame a le feterale, ma o lea moliaga na afua mai ini faiga le sao na amata mai i le 2002, lea sa aofia ai nisi o tagata faigaluega a le Ofisa o aoga ma se kamupani tua.

O lea kamupani tua o loo taua i faamaumauga a le feterale o le Pacific Products.

O se vaega o lenei gaioiga sa taua ai e faapea, o Nauer ma nisi o tagata faigaluega a le malo sa latou oka ina se totoga o pasi aoga e taua o le “phantom” peitai o lea totoga e lei maua e le malo, ma o nei foi gaioiga uma sa latou faia i ni tau taugofie mai le kamupani tua.

Na tautino Nauer e faapea, i lona auai ai i nei faiga, sa ia maua ai se tupe e tusa ma le $300,000 i faiga faaalatua ia mai le masina o Ianuari 2003 seia oo atu ia Oketopa 2006.

E faatele ona tolopo le lauina o le faasalaga o Nauer ona sa tau faamaea le faamasinoga autu o se tasi o Ofisa Sinia o le Matagaluega o Aoga a le malo o Amerika Samoa, susuga Paul Solofa, lea ua tausalaina nei i moliaga e lua o lona taumafai e faaleaga mea molimau a le malo, atoa ai ma lona faalavelave i galuega a le faamasinoga, ona o le mataupu lava e uiga i totoga o pasi aoga.

O le aso 27 Aperila ua faatulaga e lau ai le faasalaga o Solofa i Uosigitone.

E lei umi ni aso talu ona tausala Solofa e le feterale ae poloaina loa o ia ina ia tuuina atuloa lona tagata e taofia i le falepuipui a le feterale i Honolulu, e faatali ai le taimi e lau ai lona faasalaga.

faaliliu Ausage Fausia