Ua i ai nei se lapataiga i atumotu o Tutuila ma Manu’a mo matagi malolosi e to fa’ata’uta’u mai i ni isi o taimi, ma ua fautuaina ai le atunu’u ina ia sauniuni ma tapenapena i so o se taimi e ono oo mai ai nei matagi malolosi i le atunu’u.

O lapataiga mo savili e agi malolosi atoa ai ma le siisii o le gataifale, e afua mai i se taaviliga o matagi malolosi o lo o taoto tonu nei i luga o le motu o Savai’i, lea o lo o valoia e le Ofisa o Vaaitau a le atunu’u, e ono a’afia ai Amerika Samoa i se taimi o le aso.

E ui fo’i sa valoia le toulu o timuga i le aso kerisimasi, peita’i sa maitauina le lagi lelei o le aso atoa, se’i vagana ai lava le afiafi ma le taeao ananafi na maitauina ai le toulu o uaga i le atunu’u.

O le tele o afioaga i le atunu’u sa fa’asalalau solo ai e a latou pulenu’u lapataiga mo matagi malolosi ma puipuiga o le gataifale, ma vaaia ai ni isi o aiga ua amata ona tapenapena i le ono mai lea o matagi malolosi, po o se ‘afa fo’i i le fa’aiuga o lenei tausaga.

O lo o galulue fa’atasi ofisa o le malo e aofia ai le TEMCO, Ofisa Vaaitau, ofisa o le kovana ma le Ofisa o Mataupu Tau Samoa, i le fa’asoaina atu lea o fa’amatalaga uma e fa’atatau i le tulaga o le tau i le atunu’u, ina ia mafai ai ona silafia e le atunu’u tulaga uma i tapenaga ma sauniuniga pe a fa’aletonu mai le tau.

Ua fautuaina fo’i le atunu’u ina ia fa’afeso’ota’i le Ofisa o fesootaiga a le malo i Tafuna, atoa ai ma le ofisa o leoleo i so o se taimi e manaomia ai se fesoasoani.

I se ripoti mai le Ofisa Vaaitau a le atunu’u i le taeao ananafi, o lo o taua ai le nofovaavaaia o Tutuila ma Manu’a mo lapataiga mo matagi malolosi, ma ua tu’uina mai ai loa lapataiga mo le gataifale o le atunu’u.

O savili e pei ona taua e o o atu i le 30 note le malolosi, ae i ai fo’i taimi e to fa’ata’uta’u mai ai, o le a o o atu fo’i le maualuluga o galu o le sami i le 10 futu, e mafai fo’i ona oo atu i le 13 futu le maualuluga.

O le po nei lea fo’i ua valoia mai ai e le Ofisa o le Vaaitau, e ono oo atu fo’i le malolosi o savili i le 30 note, ae i ai fo’i taimi e to fa’ata’uta’u mai ai.

Ona o tulaga siisii maualuga o galu o le gataifale, ua tuuina mai ai foi se lapataiga mo vaa fagota laiti ina ia fa’aeteete i suiga o le gataifale o le a i ai i le fa’aiuga o le vaiaso, lea ua valoia le ono oo atu i le 25 note i le 40 note le malolosi o savili pe a agi, ae i ai fo’i taimi e to fa’ata’uta’u ai.

O galu o le sami e mafai ona o o atu i le 13 futu le maualuluga i le aso To’ona’i, o le a tetele fo’i timuga ma faititili e pa pa solo ai.

O le aso To’ona’i e oo atu i le ao Lua o le vaiaso fou, o le a oo atu i le 25 note le malolosi o le agi o savili, o galu o le a oo atu fo’i i le 13 futu le maualuluga pe a fafati, o le a toulu ai fo’i timuga i ni isi o taimi.

O lo o tumau pea lapataiga mo tulaga leaga o le tau mo le atunu’u seia oo atu i le vaiaso fou, ma ua fautuaina ai matua ina ia mataala i soo se taimi i fanau laiti, ma ia taumamao ese fo’i mai le gataifale i le taimi e fa’aletonu mai ai le tau.

O lapataiga uma nei o lo o aofia ai motu o Tutuila, Manu’a, Aunu’u ma Swains Island, e le gata i lapataiga mo le gataifale ae fa’apea fo’i i lapataiga o tulaga fa’aletonu o le tau.

O le toatele o le atunu’u sa malaga i Samoa i le aso kerisimasi na te’a nei, sa latou taua i le Samoa News tulaga fa’aletonu o le tau o lo o i ai Samoa, i le malolosi lea o timuga i ni isi o taimi, atoa ai ma savili e agi malolosi i ni isi o taimi.

Na taua e ni isi e fa’apea, o vaitaimi lava nei o le tausaga e fa’aletonu ai le tala o le tau, e to’atele ai fo’i le mamalu o le atunu’u e le manana’o e faimalaga aga’i i Samoa, ona o le popole i ono tula’i mai ni fa’aletonu i luga o le ea i va’alele.

E ui i tulaga fa’aletonu o le tau ma lapataiga e pei ona tu’uina mai, e le i fa’atafa le atunuu i le faia lea o tafaoga i matafaga, e pei o matafaga i Utulei lea na matua fa’atumulia i taelega a matua ma fanau i le aso o le kerisimasi faapea ai ma le aso ananafi.