Ads by Google Ads by Google

Vevela felafolafoaiga i le fonotaga a le Komiti o Ta’aloga a le Olimipeka


[ata: foa'i]
ausage@samoanews.com

Na sii sii le tai i finauga i le va o le Peresitene o le Asosi Alova’a a Amerika Samoa (SAASI) ma sui o le Komiti o Ta’aloga o le Olimipeka a Amerika Samoa (ASNOC), i le tau fa’amaninoina o le mataupu e fa’atatau i le mafua’aga ua ala ai ona le toe aloaia le SAASI o se sui totino i lalo o le ASNOC mo ta’aloga a le lalolagi.

 

O le fonotaga a le ASNOC ma sui o Faalapotopotoga o Ta’aloga uma i le atunu’u i le vaiaso na te’a nei, i le potu fono a le ASNOC e fa’amautu ai tapenaga mo le malaga atu i Ta’aloga a le Pasefika i Samoa i le masina o Iulai o le tausaga nei, na alia’e mai ai loa finauga i le va o le peresitene a le SAASI ia Genhall Manu’a Chen ma sui o le ASNOC e aofia ai le alii peresitene ia Ed Imo ma le Failautusi Aoao ia Ethan Lake.

 

Fa’atoa amata lava le fonotaga ae fa’aleo loa e Chen le mataupu e fa’atatau i le tusi a le ASNOC ua ia tauaaoina, lea o lo o fa’ailoa atu ai le le toe aloaia e le ASNOC o le SAASI o sona sui totino.

 

I le tusi a le ASNOC sa tuuina atu ia Chen, lea fo’i o lo o saini ai le susuga a Imo, o lo o fa’amanino ai e fa’apea, i lalo o tulafono ma ta’iala a le Komiti o Ta’aloga a le Lalolagi (NOC), o lo o fa’amanino mai ai le tatau lea i le ASNOC ona latou aloaia faalapotopotoga o ta’aloga o loo aloaia i lalo o le Faalapotopotoga o Ta’aloga a le Lalolagi (International Federations-IF).

 

“I lalo o ta’iala ma tulafono fa’avae, o le Asosi o Va’a Faila a Pago Pago (PPYC), o lo o aloaia e le IF, ae le o le SAASI, o le mea la lea ua mafua ai ona aloaia e le ASNOC le PPYC ae le o le SAASI,” o se vaega lea o le tusi na mafua ai loa ona alia’e mai fa’afinauga i le va o Chen ma sui o le ASNOC, ina ua fesili Chen i le mafuaaga ua ala ai ona faia e le ASNOC lenei fa’aiuga e fa’aleaoga le toe avea o le SAASI ma sui aloaia o le ASNOC, ao lea ua toe 2 masina amata aloaia ta’aloga a le Pasefika i Samoa.

 

Na faailoa e Chen i le fonotaga e fa’apea, talu mai lava le tausaga e 2008, o iina na fa’avae aloaia ai ma lesitala le SAASI o se faalapotopotoga o taaloga alova’a aloaia i totonu o Amerika Samoa.

 

“Ua tele tausaga o avea le SAASI ma sui lesitala toe aloaia a le ASNOC, a o lea ua faia faanatinati lenei faaiuga e le toe aloaia ai e le ASNOC ia le SAASI. Aisea ua mafua ai lenei faaiuga ae o fea fo’i ni faiga fa’avae sa lima ta’ita’iina ai lenei faaiuga,” o le fesili lea a Chen.

 

Na avaavau le susuga Chen a o fa’afofoga sui o Asosi o Ta’aloga eseese i le taimi o le fonotaga ma ia saunoa e fa’apea, “afai o le faaiuga lea a le ASNOC, tu’u mai sina 5 minute se’i o’u taumafai e fa’amanino atu ai la’u itu o le peresitene o le SAASI, ona fa’atoa ou tula’i ese ai loa lea ma le fonotaga”.

 

“Ua silia ma le 10 tausaga o matou auauna i le atunu’u e ala i le koleniina o tama fanau i le ta’aloga o le alova’a, a o lenei ua toe 2 masina amata aloaia le fa’amoemoe i Samoa ae o lenei ua kiki fa’afuase’i la matou Asosi i fafo e le ASNOC,” o le saunoaga lea a Chen.

 

Na faauilavea le Peresitene o le Asosi o Fusuaga a Amerika Samoa (ASBF) ia Mapu Jamias ma ia saunoa e fa’apea, e matua mana’omia lava le o mai fa’atasi o le SAASI ma le PPYC e talanoaina le mafua’aga o lenei mataupu, ina ia mafai ai ona faia se leleiga ma faa faigofie ai loa ona aga’i tapenaga a fanau o le atunu’u i luma.

 

Na faauilavea Chen ma ia saunoa ia Mapu e fa’apea, “ou te le mana’o e fa’avae le faaiuga a le ASNOC i luga o tala fa’alogo e leai ni faamaoniga. E tatau ona i ai ni fa’amaoniga o fa’amatalaga ua tuuina mai e fa’atatau i le auaunaga a le SAASI,” o le saunoaga lea a Chen.

 

Na faailoa e Lake e fa’apea, e tatau ona malamalama lelei le SAASI i le mafua’aga o le faaiuga a le ASNOC, ina ia taofia ai tu’uaiga le sa’o a Chen lea ua tu’uaia ai le ASNOC i le le fetaui o le latou faaiuga ua faia.

 

A o taumafai atu Lake e faamalamalama le autu moni o le faaiuga a le ASNOC, sa faaauau pea ona faalavelave Chen ma ia finau fo’i e tusa ai o lona talitonuga e uiga i le mataupu.

 

O le taimi lea na faafuase’i ai loa ona tu’i e Imo le laulau ma ia saunoa atu ia Chen e fa’apea, “E le o se fonotaga lenei a le Fono Aoao e tatau ai ona talanoaina lenei mataupu, o le fono lenei a le ASNOC ma Asosi o ta’aloga e talanoaina ai tapenaga mo ta’aloga a le Pasefika i Samoa.”

 

A o fa’aauau pea ona tali mai Chen i soo se taimi e saunoa atu ai sui o le ASNOC, ma fa’ailoa atu ai loa e Imo ia Chen le faitoto’a o le potu fono o lo o matala, ina ia aga’i ese atu ai i fafo pe afai e le o toe fia i ai o ia i le fonotaga o lo o fa’agasolo.

 

I le faaiuga o felafolafoaiga sa faia, na tula’i ai loa Chen ma lona sui lagolago ma la tuua loa le potu fono.

 

TUSI A LE ASNOC

 

O le faaiuga a le ASNOC faasaga i le SAASI, na faavae mai lea i se suesuega sa faia e se Komiti Faapitoa e to’atolu ona sui, lea na iloilo ai fa’asea mai matua o talavou o loo auai i le kalapu alova’aa le SAASI, fa’asaga i le le faamaoni o faaiuga atoa ai ma le auala na fili ai le au lea ua fa’amoemoe e auina atu i Samoa mo ta’aloga a le Pasefika.

 

O sui e to’atolu o le Komiti Suesue sa faia e aofia ai le afioga i le ali’i Senatoa ia Faiivae Iuli Godinet, o le susuga ia Mapu Jamias, ma le susuga ia Don Fuimaono. I le faaiuga o le suesuega a le Komiti Suesue na latou fautuaina ai loa le ASNOC, ina ia mulimulita’i i faiga fa’avae o lo o fa’ataoto mai e le NOC faapea ai ma le IF.

 

O ia faiga fa’avae, e aofia ai le tatau lea i le ASNOC ona aloaia na o Asosi o Ta’aloga o lo o fai paaga ma le NOC atoa ai ma le IF. E tusa ai la o le fautuaga a le Komiti Suesue, o le kalapu alova’a a le PPYC, o i latou ia o lo o aloaia e le NOC ma le IF, ae le o le Asosi alova’a a le SAASI.

 

Na taua e se tasi o matua i sana tusi i le ASNOC e faapea, o nisi o faaiuga e le o sa’o a le SAASI e aofia ai le fai faanana o le filiina o le latou ‘au mo ta’aloga a le Pasefika, atoa ai ma le faaitu’au o faaiuga i koleniga, e ala i le fa’atuatuana’i lea o fanau a tagata Samoa o lo o i ai i totonu o le Asosi Alova’a.

 

O faasea ia na tuuina atu i le ASNOC, na mafua ai loa ona fa’atula’i le suesuega e pei ona fa’atinoina e le Komiti Suesue.

 

O lo o fa’agasolo pea lava i le taimi nei tapenaga a au ta’aalo uma mo le sauni atu i taaloga a le Pasefika i le isi 2 masina o lo o lumana’i nei.