Ua fa’amaonia mai e se ali’i Faipisinisi i le atunu’u lona usitaia o le poloaiga a le Fa’amasinoga Maualuga na tuuina mai i le amataga o le masina nei, na te totogiina ai le salatupe e $3,000 a se ali’i mai Fiti sa faigaluega ia te ia, fa’apea ai ma le totogiina o le pasese e toe fo’i atu ai lea ali’i i lona aiga i Fiti.

I se fa’atalatalanoaga a le Samoa News ma le ali’i faipisinisi lea i le vaiaso na te’a nei, na fa’amaonia mai ai e Mr. Kim le mae’a lea ona ia totogiina o le salatupe e $3,000, ae fa’atoa totogi le pasese pe a magalo mai i tua le ali’i Fiti ma sauni ai loa e toe fo’i atu i lona aiga.

O le aso 2 o Me, 2018 na tuuina mai ai e le afioga i le ali’i Fa’amasino ia Elvis P. Patea sana poloaiga e totogi ai e Kim le salatupe ma le pasese o Rusiate Tabete, i le mae’a ai lea ona ta’usala e le faamasinoga o lea ali’i i moliaga mamafa e 3 o le talepe fale i le tulaga lua.

O ia moliaga na afua mai i le fa’alavelave lea na gaoia ai e Tabete ni oloa e silia i le $5,000 lo latou tau aofa’i mai se pisinisi i Faleniu.

E 7 tausaga lea ua faanofonvaavaaia ai Tabete e le fa’amasinoga ma le tuutuuga, a mae’a ona ia tuliina masina e 12 i le falepuipui i Tafuna, ona ia tuua loa lea o Amerika Samoa ae toe fo’i atu i lona atunu’u na malaga mai ai.

E $3,000 le salatupe a Tabete, ae na poloaina e le fa’amasinoga lana sponsor, le kamupani a le Manuia Fisheries na te totogiina. O le Manuia Fisheries, e pulea e le ali’i faipisinisi ia Mr. Kim, o ia lea na aumaia Tabete i Amerika Samoa e galue o se tagata fagota i luga o lana va’a fagota, le INJA.

Na taua e Kim i le Samoa News i le vaiaso na te’a nei, ua mafua ona ia talia le poloaiga a le fa’amasinoga na te totogiina le salatupe, ona ua ia talitonu atoatoa ua fa’atamala o ia i le fa’atinoina o ona tiute o le sponsor, o le mautinoa lea o lo o galue pea Tabete ma nofo ia te ia.

E tusa ai o le fa’amatalaga a Kim, o Tabete, o se tasi lea o ali’i e to’alima i ai tagata fagogota o lana va’a fagota. O le au va’a a Kim e aofia ai ali’i Samoa e to’alua; ali’i Fiti e to’alua, ma se ali’i Vanuatu e to’atasi.

Ua tele tausaga o malaga Tabete ma lana auva’a e fagogota, peita’i o le tausaga na te’a nei ina ua fa’aletonu ogasami e maua mai ai i’a, ma ua fai fo’i si taugata o le tulaga e fa’atupe ai fa’agaioiga uma o le va’a fagota, sa ia manatu ai loa e taofi lana va’a e aua ne’i toe alu e fagota.

O se taimi la o le tausaga na te’a nei ina ua le toe alu lana va’a e fagota, na talosaga atu ai Tabete ia te ia e fia alu e nofo i lona uso o loo nofo i se vaega o Tafuna, e fa’atalitali ai le taimi e toe alu ai le latou va’a e fagota.

Na taua e Kim lona taliaina o le talosaga a Tabete fa’atasi ai ma le tuutuuga, a toe sauni loa le va’a e alu e fagota, ona toe valaau atu lea o ia e sau e faigaluega. Ina ua alu ese atu Tabete, sa totoe ai loa isi ali’i fagogota e to’a 4. Na taua e Kim e fa’apea, o le isi to’a 2 o lo o nonofo ai lava i luga o le va’a i le taimi nei, o le isi to’atasi o loo fagota i luga o le isi va’a, ma le isi toatasi, o le isi lea ali’i Fiti, ua toe fo’i atu nei o ia i Fiti e fa’atalitali ai le taimi e toe alu ai le va’a, ona toe malaga mai fo’i lea i Amerika Samoa.

Ina ua latalata i le faaiuga o le tausaga na te’a nei, na taua e Kim le fa’ateia o ia ina ua toe alu atu Tabete ma talosaga atu ia te ia, pe mafai ona aumai ona pepa nofomau e fa’agaioi e se tasi o ona aiga, ma avea ai lena tagata ma ana sponsor fou.

Na taua e Kim lona teena o le manaoga o Tabete, ona o lona manatu, na te mana’omia o ia i lana va’a fagota.

“Sa ou fai ia Tabete, pau lava le mafua’aga na ala ai ona ou fa’ataga oe e te alu e te nofo i lou aiga i Tafuna, ona e laititi le va’a e le ofi uma ai outou e to’a 5, ae lei tuuina atu se fa’atanaga e te alu ai e te faigaluega,” o le molimau lea a Kim i le Samoa News.

Na taua e Kim le fa’ateia o ia ina ua asiasi atu ni ali’i Ofisa se to’alua mai le Ofisa o le Loia Fautua i le 2 masina talu ai, ma fa’ailoa atu ia te ia o Tabete o loo loka i le falepuipui i Tafuna, ona o tu’uaiga o le gaoi ma le talepe fale.

“O le masina na te’a nei na fa’afesoota’i mai ai a’u e le Ofisa o Femalagaaiga, ma fesiligia a’u i le mafua’aga ua ala ai ona ou fa’atamala e logo atu Tabete ua le toe galue i luga o le va’a fagota,” o le saunoaga lea a Kim.

Na taua e Kim le fa’ateia o ia i nei mau ripoti ua tuuina atu, ae aunoa ma sona iloaina o nei mau fa’aletonu ua tutupu mai.

“O le 2 vaiaso talu ai sa ma talanoa ai ma le Pulesili o le Ofisa Faanofovaavaaia, lea na ia faailoa mai ia le poloaiga a le Fa’amasinoga, ina ia ou totogiina le salatupe a Tabete atoa ai ma ona pasese e toe fo’i atu ai i Fiti,” o le molimau lea a Kim, ma ia fa’amaonia mai ai i le Samoa News le mae’a lea ona ia totogiina o le salatupe.

O Tabete, o se tagatanu’u mai Fiti na ulufale mai i Amerika Samoa i le 2015 e galue o se ali’i fagota i luga o le va’a fagota a le kamupani a le Manuia Fisheries.

O le va o le masina o Novema ma Tesema o le 2017 na tu’uaia ai o ia i lona gaoia o ni meatotino mai se kamupani i Faleniu, ma mafua ai loa ona taofia o ia e Leoleo ma molia i le tulafono. E tula’i mai lea fa’alavelave ae o le taimi lea ua mae’a ai le aoga o le pepa nofomau e fa’ataga ai i lalo o Tulafono tau Femalagaaiga ona nofo Tabete i Amerika Samoa.