Ads by Google Ads by Google

ULUFALEILUPE TA'ALA FILI FA'ASUAMALIE FUIMAONO: FITAFITA TUAI O LE US NAVY


85 Tausaga o le Tama Vetereni - Ulufaleilupe Ta'ala Fili F. Fuimaono - tele lona sao i le fa'atulagaga ma le fa'atula'ia o le Falepuipui i le teritori. 17 Tausaga o le Tautua i le US Navy.

Ua atoa le 85 tausaga o le tama matua sa avea ma Fa'asuaga o le Falelima i Sisifo o le Ofisa o Mataupu Tau Samoa, peita'i, e le galo ia te ia lana tautua mo le 17 tausaga i le Fuava'a a le Malo Tele po'o le US Navy.

 

E tu'ua e ia lana lea tautua ua avea ma "Chief Quartermaster" ma le "Standing Officer of the Deck [O.D] e fa'afoea va'a tetele a le US Navy i luga o le sami. O se tautua e le faigofie ona o'o i ai se tasi o le atunu'u i lea vaitau o le 1954-1971.

 

I lona amata mai sa avea ma Petty Officer ma e ta'i 20-30 fitafita e ao ina ia ta'ita'ia i a latou koleniga fa'apitoa ina ia iloa galuega e faia i luga o va'a folau a le Navy, e a'oa'oina fo'i i latou i tulafono ma aiaiga e fa'atino ai tiute fa'afitafita, ma sa fa'aautu ana a'oa'oga i tulaga tau toe fa'asa'oga ona tausisia o tulafono e nisi o fitafita ua taituina ua solitu tulafono a le Navy ina ia toe fa'afo'ia o latou agava'a ma fa'aauau tautua.

 

I le 1966 na avea ai o ia ma "Chief Master" o le Military Sea Transport  o le Navigation Department. Na fa'aauau fo'i ona ia a'oa'oina nisi o lo'o taumafai e fesuia'i i ai le fa'afoega o va'a i folauga i le sami ma ala fo'i e mautinoa ai ua sao atu va'a tetele i le ava o Suesa ma Panama, lea e matele ina fa'aaogaina e va'a o le Fuava'a.

 

Mai le tausaga e 1967 se'ia o'o i le 1969 na galue ai i Bremerton, Washington o se Supervisor i le Puget Sound Naval Shipyard ma e tusa ma le 10-15 tagata faigaluega e na te va'aia fa'apitoa a latou galuega.

 

O lana toe tautua i le Navy na fa'atino i le 1969-1971, na fa'ai'u mai lea i lona avea ma Project Supervisor & Counselor i A'oga maualuluga i Bremerton.

 

Sa toe taliu mai i Amerika Samoa i le 1970, sa ia mua'i iloa ai, o se tasi sa masani ai o ia i le US Navy lea ua avea ma Kovana o se mea na una'ia ai o ia e fa'amavae aloa'ia mai le USNavy ae sau e galue i sana galuega i le tatou nei malo. Na avea ai o ia ma Patrol Man i le Ofisa o Leoleo, ae ua fa'agaoioia fo'i lona tu'ua o le US Navi i lenei vaitausaga. 1970-72 na avea ai loa o ia ma Warden o le Falepuipui ma taumafai ai e fa'atumau le nofoaga i Tafuna. I le taimi muamua sa loka lava tagata i le Falepuipui i Fagatogo.

 

O Ulufaleilupe, o ia lea sa tu'u i ai le fa'atuatuaga o Kovana John Morse Haydon, o se tasi sa la'ua mafuta fo'i i le US Navy, ina ia sailia se nofoaga e lelei ma agava'a mo le fa'atula'ia ai o le Falepuipui ma le Juvenile mo fanau laiti.

 

I le tasuaga 1972-74, na avea ai o ia ma se tasi e ta'ua o le "Associate Planner" e galulue feso'ota'i lava ma Kovana Haydon e fuafua lelei le fa'aa'e maia o le Ofisa o le Junvenile ma le Criminal Justice Planning mo le Malo o Amerika Samoa.

 

I lena vaitaimi “sa tele mea na ou iloa, e aoga mo o'u tagata e ala lea i le feso'ota'i pea i le Kovana Papalagi ma feutaga'i nei ituaiga o alamanuia aua e fa'auia mai ai alagatupe e fa'atupe ai le falepuipui o fanau talavou, le falepuipui e toe fa'asa'osa'o ai olaga o e ua solitulafono TCF, ma le Ofisa e fa'auia mai ai ona fesoasoani tupe, le Criminal Justice lea ua a'ea'e ai i tatou i lenei vaitau,” o se tala ata lea a Ulufaleilupe.

 

I lea fo'i vaitausaga, sa avea ai o ia ma se tasi e Fa'atonu maia lana Kalapu fusu ae koleni mai le Kalapu i le To'ese. O le 'au fusu sili ona malosi lea i lena vaitau mai Amerika Samoa sa auina atu i Tahiti mo fusuaga a le Oceania ma maua mai ai pine'auro e tasi, 2 siliva ma le 2 apamemea.

 

I le tausaga e 1974-76 ua mae'a fo'i le tautua a Haydon, ae toe masi'i Ulufaleilupe i fafo ma faigaluega ai i Ellensburg, Washington e avea ma Special Deputy Sheriff i Kittitas County Jail.

 

O i'ina fo'i ua fa'aaoga atili i ai ona agava'a i tulaga tau suesuega ma fa'atulagaga o aiaiga fa'aletulafono mo i latou ua solituina tulafono ma ua molia i le fa'amasinoga ona o na mea. E le gata i lea sa avea o ia ma faia'oga mo leoleo o lena itu o Washington.

 

I lona toe fo'i mai i Amerika Samoa i le tausaga e 1976-80, o iina sa avea ai loa o ina ma faia'oga fa'avaitaimi mo mataupu tau Criminal Justice i le tatou Kolisi Tu'ufa'atasi. O le taimi lea ua avea ai o ia ma Criminal Justice Spcialist 111 i le Territorial Criminal Justice Planning Agency, ma o le latou tiute fa'atulaga i le taimi lea o le tu'ufa'atasia ma fa'ataoto se fuafuaga e agava'a ai le teritori ina ia fa'atulaga latou palola ma ala e toe fa'atonutonu ai olaga o e ua solitulafono.

 

E le gata i lea ae o le tapena ma saunia ni ala e maua mai ai ni vaega tupe e fa'atupe ai lea itu o le malo, ma ia mautu ona fale nofo mo e nofo sala i le tulafono.

 

I le tausaga 1981 ua avea loa o ia ma So'oupu i le va o le Disaster Assitance Planning Office ma le Matagaluega o le Puipuiga o le Saogalemu Lautele a le tatou Malo.

 

Na avea o ia ma Pule o le Falepuipui mai le vaitausaga 1982-1997 ma litaea mai ai. I lalo o le ta'ita'iga a Komesina Galea'i Moaali'itele Tu'ufuli na toe pasia ai e Ulufaleilupe le kosi i le toe avea ai ma se tasi e faigaluega i le Matagaluega o le Puipuiga o le Saogalemu Lautele ma avea ma Pule o le Falepuipui  i Tafuna.

 

I le vaitau a'o tautua i le Setete o Washington, sa ia ausia ai fo'i ni matatia fa'aTa'ita'i o le Ekalesia Trinity Baptist Church Bremerton.

 

I le vaitausaga e 1978-79 na tofia ai o ia e Katinale Pio Taofinu'u e avea ma se tasi o le to'alima o Ta'ita'i a le Ekalesia i Pago Pago, e va'ai toto'a i eleele o le Ekalesia ina ia mautu Fatuoaiga.

 

I le 2005 na tofia ai o ia e le Fa'atonu o Paka ma Malae Ta'alo ina ia avea ma Sports Coordinator mo le Matagaluega i so'o se ta'aloga lava, a'o le taimi lea o lo'o avea fo'i o ia ma Sui Peresetene o Fusu'aga.

 

Peita'i i le vaitausaga e 2010 na umia ai e ia le nofoa o le Fa'asuaga mo le Falelima i Sisifo i le Ofisa o Mataupu Tau Samoa se'ia o'o mai ina finagalo malie o ia e tu'ua lea nofoa i le 2017.

 

I le 2002 na nofoia ai e ia le suafa o lona aiga, Ulufaleilupe i Futiga, ma ua fa'aauau mai ai pea ona ia vaaia lona aiga e o'o mai i lenei vaitau.

 

Ua atoa nei le 85 tausaga o lona soifua, le tama na amata mai ana a'oa'oga i le Marist Leala, soso'o ai ma le a'oga i Samoana ma fa'ai'u mai ai ma lona Diploma. O lo'o alaala tumau pea i Futiga ma le faletua Stella Maris Ulufale ma le fanau e to'a 5 i latou.