Ads by Google Ads by Google

Ulua’i taimi ua tausinio ai AS i le Youth Olympic i fusuaga


Le ali’i fusu ia Falaniko Tauta lea ua filifilia e fai ma sui o Amerika Samoa i le ta’amilosaga o le Youth Olympic lea e faia i Argentina ia Oketopa o le tausaga nei. [ata AF]
ausage@samoanews.com

O le aloaia ai o le filifilia o le ali’i fusu ia Falaniko Tauta e fai ma sui o Amerika Samoa, i le ta’amilosaga o le Youth Olympic a le lalolagi i le masina o Oketopa o le tausaga nei, i le aai o Buenos Aires i Argentina, ua faamaonia ai le maua o le avanoa o Amerika Samoa e tausinio ai i sona sui i ta’aloga tetele faapenei a le lalolagi mo le taimi muamua i le taaloga o fusuaga.

 

O le alii o Tauta, 18 tausaga le matua, ua fa’amoemoe e tausinio i le aupaga o le welterweight, poo le 69kg.

 

I se tusi mai le Fa’atonu o Fusuaga amata a le lalolagi (AIBA), le susuga ia Tom Virgets, lea sa tuuina mai i le Peresetene o le Komiti o le Olimipeka i Amerika Samoa (ASNOC), susuga Ed Imo, o loo taua ai e Virgets le filifilia aloaia lea o Tauta e fai ma sui o Amerika Samoa i le Youth Olympic o lenei tausaga.

 

I se vaega o le tusi a Virgets ia Imo, o lo o ia taua ai e fa’apea, o le filifilia o Tauta e tausinio i lenei ta’amilosaga maualuga a le lalolagi, na afua mai lea i le tulaga maualuga sa i ai lana taumafaiga i ta’amilosaga ua mae’a atu, lea sa sailia mai ai ni isi e ofi atu i le Youth Olympic o lenei tausaga.

 

Pau le itu lea ua fa’atali mai ai le AIBA, o se tusi mai le ASNOC e fa’amaonia atu ai lo latou sauni e auina atu Tauta e tausinio i lenei ta’amilosaga tele a le lalolagi.

 

O le susuga a Tauta, o se ali’i fusu mai le kalapu fusu a le American Samoa Boxing Federation (ASBF), lea o loo i lalo o le vaavaaiga a le afioga a Paepaetele Mapu Jamaias, o le sui peresetene ia Okesene Malala, faapea ai ma le faiaoga sinia ia Sala Sanele Etuale.

 

Na taua e Paepaetele i le Samoa News lona lagona faagaeetia ina ua mautinoa le avanoa o Tauta e tausinio ai i lenei ta’amilosaga.

 

Saunoa atili le ali’i peresetene e fa’apea, o se tala fiafia lenei mo Amerika Samoa, ina ua maua sona sui e tausinio i le ta’amilosaga a le Youth Olympic mo le taimi muamua i le tala fa’asolopito o le atunu’u, aemaise ai le ta’aloga o le fusuaga.

 

O se ta’amilosaga sa faia i Ausetalia i le masina o Aperila o le tausaga na te’a nei, le International Training Competition, lea na tausinio ai Tauta ma le ali’i o Jeffrey Tago, na maua ai loa le avanoa o Tauta e ulufale atu ai i le Olimipeka, i lalo o tuutuuga faapitoa, e ao ona ia manumalo i isi ta’amilosaga fa’avevela o lo o mulimuli mai, lea e aofia ai ma le Oceania Championship sa faia i Samoa i le masina o Me o le tausaga nei.

 

E ui e le i manuia taumafaiga a Tauta i se pine auro i le ta’amilosaga fa’avevela a le Oceania, ae na manumalo i le pine apa memea, peita’i o le tulaga maualuga o le taalo a Tauta na mafua ai ona manatu ali’i Faiaoga o le AIBA ina ia filifilia pea o ia e tausinio i le ta’amilosaga o le Olimipeka o lenei tausaga.

 

Na faiaina Tauta i ‘ai i le ali’i mai Ausetalia lea na ia maua le pine auro i le latou aupaga. I fa’amaumauga a le asosi fusu a Ausetalia, talu lava ona fusu le latou tama fusu lea na manumalo i le pine auro, e manumalo lava o ia i le tu’i oti, peita’i, e na o le la fusuaga ma Tauta na manumalo ai i ‘ai.

 

O ni isi o ta’amilosaga faavaomalo na fai ai Tauta ma sui o Amerika Samoa, e aofia ai le Samoa Games sa faia i Samoa i le 2016, lea na ia manumalo ai i le pine auro. O le masina o Fepuari o le tausaga na te’a nei na toe maua ai fo’i le isi ana pine auro i le ta’amilosaga o le Oceania Championship sa faia i Samoa.

 

Ua filifilia Tauta o se tasi o le au fusu a le ASBF lea ua sauni atu e puipui le ipu o le siamupini o le Teuila sa latou manumalo ai i le tausaga na te’a nei.

 

O le ta’amilosaga o le Teuila mo lenei tausaga ua fa’amoemoe e faia i Tuana’imato Sports Complex i le aso 7-8 o Setema, 2018 i Samoa.